Read Nzema Edw 44 Bible Online

Edw 44 - Nzema bible

Edw 44

¹O Nyamenle, yɛde ye yɛ nzo nu, yɛ nlenya mɔ ɛha ɛhile yɛ, ninyɛne mgbole mɔɔ ɛyɛle bɛ mekɛ zo, wɔ mɔmoane mɔmoane ne.

²Ɛvale wɔ tumi ɛvoanle maanle maanle, na ɛvale bɛmɛ ɛziele bɛ gyakɛ anu. Ɛmanle menli ɛhendeɛ ne mɔ nwunle nyane, na ɛmanle bɛmɛ bɛvale bɛ nwo dwɔɔ.

³Bɛdabɛ bɛanva bɛ dadeɛ bɛango bɛanva azɛlɛ, bɛdabɛ bɛanva bɛ anwosesebɛ bɛanli konim; na ɛvale wɔ tumi kpole ne nee wɔ anwosesebɛ ne, yɛɛ ɛ nyunlu ɛdalɛ kpole ne ɛlile konim; ɔluakɛ ɛ nye die bɛ nwo.

⁴Ɛle me Belemgbunli nee me Nyamenle, mɔɔ maa Gyekɔbo di konim a.

⁵Yɛdua ɛ nwo zo a, yɛka yɛ agbɔvolɛ yɛgua; yɛdua wɔ duma nu yɛtietia yɛ kpɔvolɛma anwo zo.

⁶Menva me rɛle mendo me ɛda zo, yɛɛ me dadeɛ ɛnrɛhola me ngoane die.

⁷Wɔmɔ yɛɛ wɔlie yɛ wɔvi yɛ kpɔvolɛma asa anu, na wɔmaa bɛdabɛ mɔɔ bɛkyi yɛ la anye zo ɛda bɛ a.

⁸Yɛva Nyamenle yɛdu yɛ nwo dahuu, na yɛbayɛ ye mo dahuu.

⁹Noko wɔkpo yɛ wɔmaa bɛli yɛ nwo zo konim, ɛ nee yɛ ɛlɔnema ne angɔ konle ne.

¹⁰Wɔmaa yɛnriandi yɛ kpɔvolɛma ne anyunlu, na yɛ kpɔvolɛma ɛve yɛ nwo ninyɛne.

¹¹Wɔyɛ yɛ kɛ mboane mɔɔ bɛ nee bɛ ɛlɛkɔ ahunleɛ, na wɔkponde yɛ maanle maanle zo.

¹²Wɔdɔne wɔ menli ne anwonyiadeɛ, kɛ menli mɔɔ anwo ɛnlɛ nvasoɛ biala la.

¹³Wɔmaa yɛ nwo ɛyɛ menli mɔɔ zuozua yɛ la ahyi, yɛɛ bɛgolo yɛ nwo, bɛsi yɛ amgbu a.

¹⁴Wɔmaa yɛyɛ ɛfenle yɛmaa maanle maanle, yɛ nwo yɛ menli kɔsɔɔti ɛzelekɛ.

¹⁵Alehyenlɛ muala nyiane ala a ku me a; nyiane ɛkpɔlɔ me betaa,

¹⁶wɔ bɛdabɛ mɔɔ bɛtwi me nyunlu la edwɛkɛ ti, wɔ me kpɔvolɛ ne nee me senravolɛ ne anyunlu.

¹⁷Ɛhye mɔ amuala ɛra yɛ nwo zo, wɔ mekɛ mɔɔ yɛ rɛle ɛtɛfile wɔ, anzɛɛ yɛtɛtulule ngyekyeleɛ mɔɔ ɛ nee yɛ kyekyele la.

¹⁸Yɛtɛkpole wɔ wɔ yɛ ahonle nu, yɛɛ yɛtɛkakyile yɛ nzi yɛtɛsile wɔ ndenle ne,

¹⁹mɔɔ yemɔti ɔwɔ kɛ ɛye yɛ ɛgua nanemgbole avinli, na ɛfa awozinli kabii ɛkeda yɛ nwo zo a.

²⁰Saa yɛ rɛle ɛvi yɛ Nyamenle ne duma, anzɛɛ yɛzonle nyamenle gyɛne bie a,

²¹asoo anrɛɛ Nyamenle ɛnrɛnwu ye ɔ? Ɔluakɛ ɔze ahonle muala anu.

²² Kyɛkyɛ, wɔmɔ ti bɛku yɛ alehyenlɛ biala, na bɛbu yɛ kɛ mboane mɔɔ bɛ nee bɛ ɛlɛkɔ ahunleɛ.

²³Maa ɛ nwo zo! O Awulae, duzu ati a ɛlɛda ɛ? Dwazo! Mmakpo yɛ bɔkɔɔ!

²⁴Duzu ati a wɔva ɛ nye wɔvea ɛ? Duzu ati a ɛ rɛle ɛvi yɛ nyane nee yɛ amaneɛ ne mɔ ɛ?

²⁵Nyane ɛlɛku yɛ ɛkɛla ahɔ ewule nu; yɛmaa yɛ nwo zo a ɔnyɛ boɛ.

²⁶Maa ɛ nwo zo, bɛla baboa yɛ! Wɔ ɛhulolɛ kpundii ne ati die yɛ!