Read Nzema Edw 45 Bible Online

Edw 45 - Nzema bible

Edw 45

¹Adwenle kpalɛ ɛyi me ahonle nu tɛkɛɛ, meto edwɛne memaa belemgbunli ne; me tafinlima le kɛ kɛlɛvolɛ mɔɔ anwo yɛ ndɛ la pɛne.

²Ɛ nwo yɛ fɛ tɛla mgbavolɛ kɔsɔɔti, ɛlolɛ ɛyi wɔ ɛdendɛlɛ tɛkɛɛ, yemɔti Nyamenle ɛyila wɔ dahuu.

³Fa wɔ dadeɛ ne kenda ɛ bo anwo, O katakyie, wɔ wɔ anyunlunyia nee wɔ belemgbunlililɛ nu.

⁴Dua wɔ belemgbunlililɛ zo kɔli konim maa nɔhalɛ ne, na die fɔɔnwoma ati; maa wɔ tumi ne ɛli konim mgbole.

⁵Wɔ ɛda mbaka ti yɛ nla, bɛwɔ bɛwolo belemgbunli ne kpɔvolɛma ahonle nu; maanle maanle tu gua ɛ nyunlu.

⁶ Wɔ belemgbunlililɛ nwuanzanwuanza ne wɔ ɛkɛ ne dahuu. Ɛfa pɛlepɛlelilɛ a ɛdi wɔ ebia ne a;

⁷ɛkulo pɛlepɛlelilɛ, ɛkyi amumuyɛ. Yemɔti Nyamenle, wɔ Nyamenle ne, ɛva anyelielɛ nwole ɛkpokpa wɔ ɛgyakyi ɛ gɔnwo mɔ.

⁸Wɔ adɛladeɛ nu bɔ evuanlɛ, ɔbɔnle alufuanlɛ, kasea, yɛɛ kolɔbo. Edwɛndolɛma dielie ɛ nye wɔ arelemgbunli azua mɔɔ bɛva ɛzɛlɛ bɛziezie nu la anu.

⁹Arelemgbunli mralɛ mraalɛ boka mbɛlɛra mɔɔ wɔ wɔ suakunlu ɛkɛ ne la anwo; belemgbunli raalɛ ne gyi wɔ fema zo ɛkɛ, yeva Ɔfɛ ezukoa nvutuke yeyɛ ɔ nwo sɔɔnwo.

¹⁰O ralɛ raalɛ, yɛ ɛnzonlɛ tie, na dwenle nwo, maa ɛ rɛle ɛvi wɔ menli nee ɛ ze sua nu.

¹¹Wɔ anwofɛlɛko ne bahwe belemgbunli ne ahonle; ɔle ɛ menle, yemɔti tie ɔ ne.

¹²Tayama barahyɛ wɔ ninyɛne, sukoavolɛma barahyɛ wɔ ninyɛne ngakyile.

¹³Belemgbunli ara raalɛ ne wɔ ye sua ne akunlu, ɔwula ezukoanzule adɛladeɛ.

¹⁴Bɛva ye bɛhɔ belemgbunli ne ɛkɛ, ye avoanlema mɔɔ ravale ye la doa ye.

¹⁵Bɛva bɛ anyelielɛ nee fɛlɛko nu bɛhɔ belemgbunli ne suakunlu ɛkɛ ne.

¹⁶Ɛ mra mrenya bayɛ kɛ ɛ ze mɔ, bɛbayɛ bɛ arelemgbunli wɔ ewiade amuala anu.

¹⁷Mebamaa awolɛndoazo kɔsɔɔti abɔ wɔ duma; na bɛaye wɔ ayɛlɛ mekɛ mɔɔ ɛnlɛ awieleɛ.