Read Nzema Edw 46 Bible Online

Edw 46 - Nzema bible

Edw 46

¹Nyamenle le yɛ ɛvealeka nee yɛ anwosesebɛ, yɛ mgbemgbene nu boavolɛ wɔ anwongyelelɛ nu.

²Yemɔti ewiade kakyi ɔ ti aze bɔbɔ a, yɛnrɛzulo, saa awoka tudu kɔgua nyevile buma nu,

³saa nyevile fudu na ɔtulutulu ɔ ti ɔgua zo, na ye ɛvundunlɛ ne maa awoka kpusu a, yɛnrɛzulo.

⁴Azule bie wɔ ɛkɛ mɔɔ ye nzule maa Nyamenle suakpole ne azo yɛ anyelielɛ; ɔle Anwuma Anwumanli ne tɛnlabelɛ.

⁵Nyamenle de ɛkɛ ne, awie ɛnrɛhola ye sɛkye, Nyamenle baboa ye ndɛndɛ ne ala.

⁶Maanle maanle ahonle futu, belemgbunlililɛ to bɛka nu, ɔ nloa edwɛkɛ kokye maa azɛlɛ kolo.

⁷Tumivolɛ Nyamenle ne nee yɛ de; Gyekɔbo Nyamenle ne le yɛ ɛvealeka.

⁸Bɛrɛla, baranlea Ɛdɛnkɛma gyima mɔɔ ɛli, yemaa azɛlɛ ye amuala ɛdɔ mgbane.

⁹Ɔmaa bɛgyakyi konle wɔ azɛlɛ ye amuala azo; ɔbubu ɛda nee atwɛ ne mɔ, ɔfa senle ɔyela konle ehwili ne mɔ!

¹⁰Ɔse: “Bɛgyinla diinyi, na bɛnwu kɛ medame a mele Nyamenle a. Mebo maanle maanle kɔsɔɔti anwo zo, mebo ewiade amuala anwo zo.”

¹¹Tumivolɛ Ɛdɛnkɛma nee yɛ de; Gyekɔbo Nyamenle ne le yɛ ɛvealeka.