Read Nzema Edw 48 Bible Online

Edw 48 - Nzema bible

Edw 48

¹Ɛdɛnkɛma le kpole, ɔwɔ kɛ bɛye ye ayɛlɛ kpole wɔ yɛ Nyamenle ne suakpole ne azo!

² Ye boka nwuanzanwuanza ne le kpole, ɔwale, ɔle ewiade amuala anyelielɛ. Zayɔn Boka mɔɔ wɔ sɔlɔ afoa nu lɔ, le Belemgbunli kpole ne suakpole.

³Nyamenle ɛhile kɛ ɔle pepɛdievolɛ wɔ ye aranemgbole ne mɔ anu.

⁴Ɔluakɛ, nea, arelemgbunli boɔboale bɛ nloa, bɛlile anlɔma bɛrale ɔ nwo zo.

⁵Bɛnwunle ye ala la, ɛzulolɛ hanle bɛ; bɛ nye zo danle bɛ na bɛnriandile.

⁶Bɛ nwo wozowozole bɛ wɔ ɛkɛ, kɛ raalɛ mɔɔ ɛvo awolɛ zo la.

⁷Ɛvale aduduleɛ anwoma ne ɛbubule Tahyehye meli ne mɔ amuala.

⁸Kɛmɔ yɛde la, yemɔ ala a yɛnwu ye wɔ Tumivolɛ Ɛdɛnkɛma suakpole ne, wɔ yɛ Nyamenle ne suakpole ne mɔɔ yekyekye na ɔwɔ ɛkɛ dahuu la azo a.

⁹O Nyamenle, yɛdwenle wɔ ɛhulolɛ kpundii ne anwo, wɔ wɔ Ɛzonlenlɛ Sua ne anu.

¹⁰O Nyamenle, kɛ wɔ duma ne si de la, zɔhane ala yɛɛ wɔ ayɛlɛyelɛ dwu ewiade amuala a. Konimlilɛ wɔ ɛ sa fema ne anu.

¹¹Maa Zayɔn Boka zo amra ɛli fɛlɛko! Maa Dwudama anye ɛlie, ɔboalekɛ wɔ ndɛnebualɛ ne mɔ le fɔɔnwo.

¹²Bɛkpɔsa Zayɔn azo, bɛbɔ ye mgbɔlɔka bɛyia, bɛdia ye tawa ne mɔ;

¹³bɛnlea ye bane ne mɔ ati zo kpalɛ, bɛhɔ ye aranemgbole ne mɔ anu; amaa bɛaha bɛahile awolɛndoazo mɔɔ bara la kɛ,

¹⁴“Nyamenle ne ɛne, ɔle yɛ Nyamenle dahuu. Ɔbahile yɛ adenle mekɛ biala.”