Read Nzema Edw 49 Bible Online

Edw 49 - Nzema bible

Edw 49

¹Maanle maanle kɔsɔɔti, bɛdie ɛhye! Ewiade amra amuala, bɛyɛ ɛnzonlɛ,

²bɛmɛ awienvolɛma nee mgbolema, sukoavolɛma nee ehyianvolɛma, bɛdie!

³Mebaha nrɛlɛbɛ edwɛkɛ, ndelebɛbo wɔ mɔɔ medwenledwenle nwo la anu.

⁴Mebagyele me nzo meadie ɛrɛlɛ, mebabɔ getaa kpole meaye me agyebɛ nloa.

⁵Duzu ati yɛɛ saa ngyegyelɛ to me, na menli mɔɔ yɛ me kpɔdekpɔde la, bɔ yia me a, menwɔzulo ɛ?

⁶Duzu ati a menwɔzulo menli mɔɔ bɛ rɛle wɔ bɛ anwonyia nu na bɛfa bɛ anwonyia kpole ne bɛtu bɛ nwo la ɛ?

⁷Nɔhalɛ, awie biala ɛnrɛhola ɔ nwo kpɔne, anzɛɛ ye ngoane nwo kakɛ tua maa Nyamenle,

⁸ɔluakɛ ye ngoane ɛkpɔnedeɛ ne bolɛ yɛ se. mɔɔ ɔnrɛhola ye tua ɛlɛ,

⁹amaa yeadɛnla ngoane nu dahuu, na yeanwu ɛlɛ a.

¹⁰Ɛhɛe, yɛkola yɛnwu kɛ nrɛlɛbɛvolɛ bɔbɔ wu, koasea nee gyibilito wu, na bɛgyakyi bɛ anwonyia bɛmaa awie mɔ.

¹¹Bɛ nla ne mɔ a le bɛ sua nu dahuu a, ɔle bɛ tɛnlabelɛ wɔ awolɛndoazo muala anu, noko bɛka a bɛse azɛlɛ dɔɔnwo le bɛ ɛdeɛ.

¹²Sonla kpoleyɛlɛ ɛnlie ye, ɔbawu kɛ nane ala la.

¹³Bɛdabɛ mɔɔ bɛdie bɛ nwo bɛdi koasea nu la awieleɛ ɛne, bɛdabɛ mɔɔ bɛ nye die bɛ ngome bɛ nwo la awieleɛ ɛne.

¹⁴Bɛle kɛ mboane la, bɛ muala bɛbawu. Ewule bayɛ bɛ neavolɛ. Pɛlepɛlelilɛma bali bɛ nwo zo konim nwonlomɔ ne ala, na bɛmɛ, bɛ nwonane bakpɔlɔ. Mɔwuamra maanle nu a le bɛ sua nu a.

¹⁵Na Nyamenle bakpɔne me ɛkɛla avi ewule tumi bo, ɔluakɛ ɔbalie me ngoane.

¹⁶Saa awie nyia ɔ nwo a, mmasulo, saa ye anwonyia yɛ kpole bɔbɔ a, mmasulo.

¹⁷Ɔluakɛ saa ɔwu a ɔnrɛva ɛhwee ɔnrɛhɔ; ɔ nee ye anwonyia ne ɛnrɛhɔ ɛbolɔ.

¹⁸Saa ɔde aze la ɛnee ɔ nye die ɔ nwo, na ɔnyia ayɛlɛyelɛ wɔ kpalɛ mɔɔ yeyɛ la anwo a,

¹⁹ɔbadu adenle ne mɔɔ ɔ ze mɔ dule la, bɛnrɛnwu wienyi ne bieko ɛlɛ

²⁰Sonla ɛnga ye kpoleyɛlɛ nu dahuu, ɔbawu kɛ nane ala la.