Read Nzema Edw 5 Bible Online

Edw 5 - Nzema bible

Edw 5

¹[2] O Ɛdɛnkɛma, tie me edwɛkɛ, na tie me ɛkponlenlɛ.

²Me Belemgbunli nee me Nyamenle, mesɛlɛ wɔ, tie me ɛzunlɛ.

³O Ɛdɛnkɛma, ɛte me nwonlomɔ nzɛlɛlɛ; nwonlomɔ mebɔ azu memaa wɔ na mekendɛ.

⁴Ɛnle Nyamenle mɔɔ anye die amumuyɛ nwo a, ɛnlie ɛtane azie.

⁵Adubɛnwoma ɛngyinla ɛ nyunlu; ɛkyi ɛtaneyɛvoma amuala.

⁶Ɛsɛkye bɛdabɛ mɔɔ bɛbɔ adalɛ la; Ɛdɛnkɛma kyi adalɛma nee ahɔdiawu.

⁷Wɔ ɛhulolɛ kpole ne mɔɔ gyi kpundii la ati, mebara wɔ Ɛzonlenlɛ Sua ne anu, mebahakyi me nye wɔ wɔ Ɛzonlenlɛ Sua nwuanzanwuanza ne anwo, na meava ɛzulolɛ meazonle wɔ.

⁸O Ɛdɛnkɛma, me kpɔvolɛma ati, fa me dua wɔ tenlene adenle ne anu, na maa wɔ adenle ne ɛyɛ wienyi ɛmaa me.

⁹ Me kpɔvolɛma ɛnga nɔhalɛ, debie ɛzɛkyelɛ ala a wɔ bɛ adwenle nu a. Bɛ kɔmenzia ɛbuke kɛ azie zo nla, bɛ nloa anu menlemenle, noko adalɛ ngome.

¹⁰O Nyamenle, fa bɛ ɛtane soa bɛ; maa bɛ adwenle ɛtanevalɛ ɛbɔ bɛ ti. Bɛ mɛladonlɛ dɔɔnwo ne ati, ye bɛ fi ɛ nye zo, ɔluakɛ bɛde ɛ nwo atua.

¹¹Maa bɛdabɛ mɔɔ bɛbafea wɔ nuhua la anye ɛlie; na dahuu bɛdo anyelielɛ edwɛne. Die bɛ ti, amaa bɛdabɛ mɔɔ bɛkulo wɔ la, bɛava wɔ bɛadu bɛ nwo.

¹²O Ɛdɛnkɛma, ɛyila tenlenema; ɛfa wɔ ɛlolɛ ne ɛbɔ bɛ nwo bane.