Read Nzema Edw 50 Bible Online

Edw 50 - Nzema bible

Edw 50

¹Ɛdɛnkɛma Nyamenle, Tumivolɛ Ko ne fɛlɛ na ɔtendɛ ɔkile ewiade amra, ɔvi sɛnzɛne aduduleɛ mɔɔ kɔdwu adɔleɛ.

²Nyamenle ta fi Zayɔn, suakpole mɔɔ ye kɛnlɛma di munli.

³Yɛ Nyamenle ne ɛlɛba, ɔmba ye bɔnwobɔnwo; sendɔlɔra li ɔ nyunlu, ahumu kpole ɛbɔ ɛyia ye.

⁴Ɔlɛfɛlɛ anwumaneamra nee azɛlɛ, amaa yeabua ye menli ne ndɛne.

⁵Ɔse, “Bɛboɔboa me menli nɔhavoma ne anloa, bɛmɛ a bɛbɔle azu bɛ nee me yɛle ngyekyeleɛ a!

⁶Anwumaneamra kile ye tenleneyɛlɛ ne, ɔluakɛ Nyamenle mumua ne a le ndɛnebuavolɛ a.

⁷“O me menli, bɛdie na metendɛ, O Yizilayɛma, medi daselɛ meatia bɛ. Medame a mele Nyamenle, bɛ Nyamenle ne a.

⁸Mendea bɛ wɔ bɛ azubɔlɛ ne mɔ anwo; bɛ ɛyelalɛ azubɔdeɛ ne mɔ dwu me nyunlu dahuu.

⁹Menrɛlie nlankɛ nyinli biala menrɛvi bɛ ɛkɛ, yɛɛ menrɛlie abɔnkye nyinli biala wɔ bɛ ɛkɛ.

¹⁰Ɔluakɛ kpɔkɛ nu nane biala le me ɛdeɛ, awoka apenle apenle zo nlankɛ le me ɛdeɛ.

¹¹Meze anwomanyunlu nloma kɔsɔɔti, yɛɛ debie biala mɔɔ wɔ ɛbɔ nu la le me ɛdeɛ.

¹²“Saa ɛhɔne ku me a, menrɛha menrɛhile bɛ, ɔluakɛ ewiade nee nuhua ninyɛne kɔsɔɔti le me ɛdeɛ.

¹³Asoo medi nlankɛ nane, anzɛɛ meno mbɔnkye mogya?

¹⁴Bɛbɔ moyɛlɛ azu bɛmaa Nyamenle; bɛye bɛ ɛwɔkɛ mɔɔ bɛbɔle Anwuma Anwumanli ne la.

¹⁵Bɛzu bɛvɛlɛ me kenle biala mɔɔ ngyegyelɛ kɛdo bɛ la, na mebalie bɛ, na bɛaye me ayɛlɛ.”

¹⁶Na Nyamenle se amumuyɛma kɛ, “Duzu adenle a bɛlɛ mɔɔ ɔwɔ kɛ bɛka me mɛla ne mɔ, anzɛɛ bɛka me ngyekyeleɛ ne a?

¹⁷Ɔluakɛ bɛkyi ahwibɛnyunlu, yɛɛ bɛkpɔla me mɛla ne bɛgua bɛ nzo anzi.

¹⁸Bɛnwu awule a, bɛfa ye agɔnwolɛ; yɛɛ bɛ nee awuvolɛvalɛma tu.

¹⁹“Bɛkeha ɛtane ɛtane, yɛɛ bɛbɔ adalɛ.

²⁰Bɛtɛnla bɛye bɛ mediema mrenya ndɛne; bɛbɔ bɛdabɛ bɛ nli amra mrenya anwo nzekue.

²¹Bɛyɛ ɛhye mɔ, noko mendɛne bɛ zo, bɛdwenle kɛ mele kɛ bɛdabɛ la. Na kɛkala metwi bɛ nyunlu, na meava bɛ nwo edwɛkɛ meado gua.

²²“Bɛdabɛ mɔɔ bɛ rɛle fi Nyamenle la, bɛyɛ ɛhye nzonlɛ, anrɛɛ menwɔtete bɛ, na bɛnrɛnyia awie ɛnrɛlie bɛ!

²³Mɔɔ kɛva moyɛlɛ kɛra kɛ ye azubɔdeɛ la di me eni; mɔɔ kɛva adenle kpalɛ zo la, mebahile ye Nyamenle ngoanelielɛ ne!”