Read Nzema Edw 51 Bible Online

Edw 51 - Nzema bible

Edw 51

¹[32] O Nyamenle, nwu me anwunvɔne, kɛmɔ wɔ ɛhulolɛ kpundii ne de la; wɔ anwunvɔnezelɛ kpole ne ati, nunu me mɛladonlɛ ne mɔ.

²Nrinzi me ninyɛndane ne mɔ amuala bɔkɔɔ, na te me nwo fi me ɛtane ne anwo.

³Ɔluakɛ meze me mɛladonlɛ ne mɔ, yɛɛ me ɛtane gyi me nyunlu dahuu.

⁴ Wɔmɔ ala yɛɛ mevo wɔ, na mebɔ munzule ɛbɛla ɛhye wɔ ɛ nyunlu a, amaa wɔ ndɛnebualɛ ayɛ fɔɔnwo na wɔanli ɛzonle wɔ wɔ ndɛnebualɛ nu.

⁵Nea, bɛwole me amumuyɛ nu, yɛɛ ɛtane nu a ɔmɔ nrenzɛle me a.

⁶Nea, ɛkpondɛ nɔhalɛ mɔɔ wɔ sonla nu la; yemɔti kile me nrɛlɛbɛ.

⁷Fa nyinlanyinla nua me, na me nwo kɛde; bia me, na menwɔyɛ nwohyee menwɔdɛla ezukɔtweaba.

⁸Maa me anyelielɛ nee fɛlɛkolilɛ; maa mbowule mɔɔ wɔbubu nu la anye ɛlie.

⁹Ye ɛ nye fi me ɛtane ne mɔ anwo, na nunu me amumuyɛ ne mɔ amuala.

¹⁰O Nyamenle, bɔ ahonle mɔɔ anu te la wula me nu, na maa me sunsum fofolɛ mɔɔ gyi kpundii la.

¹¹Mmafuandi me ɛto, yɛɛ mmaye wɔ Sunsum Nwuanzanwuanza ne ɛfi me nu.

¹²Fa wɔ ngoanelielɛ nwo anyelielɛ ne sia bɛlɛ me, na buke wɔ munli nu sɔ me nu.

¹³Na menwɔhilehile mɛladonlɛma wɔ adenle ne, na ɛtanevolɛma bazia ara wɔ ɛkɛ.

¹⁴O Nyamenle, die me fi ewule nu, wɔmɔ Nyamenle, ɛle me ngoanelielɛ, na mebado wɔ ngoanelielɛ nwo edwɛne.

¹⁵O Awulae, buke me nloa, na mebaye wɔ ayɛlɛ.

¹⁶Ɔluakɛ ɛ nye ɛnlie azubɔlɛ nwo; saa mefa ɛyelalɛ azubɔdeɛ bɔbɔ memaa wɔ a, ɛ nye ɛnrɛlie nwolɛ.

¹⁷Ahonle bɛlɛvo a le azubɔlɛ mɔɔ sɔ Nyamenle anye a, O Nyamenle, ɛmkpo ahonle mɔɔ le bɛlɛvo na yenlu ɔ nwo la.

¹⁸Fa fɛlɛkolilɛ yɛ Zayɔn boɛ; die Gyɛlusalɛm bane ne mɔ fofolɛ,

¹⁹na ɛ nye alie azubɔlɛ kpalɛ nwo, ɛyelalɛ azubɔdeɛ nee nane mumua ɛyelalɛ azubɔdeɛ; na bɛkɛva nlankɛ bɛkɛbɔ azu wɔ wɔ azukponle zo.