Read Nzema Edw 55 Bible Online

Edw 55 - Nzema bible

Edw 55

¹O Nyamenle, yɛ ɛnzonlɛ tie me nzɛlɛlɛ; mmakakyi ɛ nzi ɛsi me modolɛ nzɛlɛlɛ!

²Bele ɛ nye nea me, na bua me; me amaneɛnwunlɛ ɛbo me nwo zo.

³Me kpɔvolɛma alɛrayɛlɛ ne kpu me ɛbolɛ, ɔlua amumuyɛma nzisi ne ati. Ɔluakɛ bɛgyegye me, bɛva me nwo ɛya, yɛɛ bɛkyi me.

⁴Me ahonle ɛlɛdi nyane kpole, ewule nwo ɛzulolɛ ɛdɔ me nwo zo.

⁵Mesulo yɛɛ me nwo wozo me; sulosulo ɛbɔ me kpɔkɛ.

⁶Na mese, “Anrɛɛ meanyia abubule ndɛbalɛ! Anrɛɛ menwɔdu menwɔhɔlie me ɛnwomenle;

⁷ɛhɛe, anrɛɛ menwɔhɔ moa moa menwɔhɔdɛnla fienemgbole ne anu.

⁸Anrɛɛ menwɔhɔkpondɛ kpɔda bie abo menwɔdɛnla, menwɔye me nwo menwɔvi anwoma nee ahumu ne anu ndɛndɛ.”

⁹O Awulae, sɛkye bɛ ngyehyɛlɛ biala; mmamaa bɛ adwenle yɛ ko. Ɔluakɛ menwu konle nee nzaka wɔ suakpole ne azo.

¹⁰Alehyenlɛ nee aledwolɛ bɛdua bane ne mɔ ati zo, bɛbɔ suakpole ne mgbɔlɔka bɛyia; ninyɛmunli nee ngyegyelɛ ɛyi ye tɛkɛɛ,

¹¹Awukade wɔ zolɛ ɛleka biala; nzisi nee awule ɛmkpa ye gua nu.

¹²Ɔnle kpɔvolɛ mɔɔ si me amgbu ala, anrɛɛ menwɔhola menwɔgyinla ɔ nloa; ɔnle kpɔvolɛ mɔɔ tu ɔ nwo kile me ala, anrɛɛ menwɔnriandi menwɔvea.

¹³Na wɔmɔ, mɔɔ ɛle me ti pɛne, mɔɔ me nee wɔ tu, na yɛle agɔnwolɛ kpalɛ kpalɛ la ɔ.

¹⁴Ɛnee yɛ mu nwiɔ yɛdi yɛ nwo adwelie; yɛdua nwo yɛkɔ Nyamenle sua nu yɛkɔsonle.

¹⁵Maa ewule ɛhu bɛ; maa bɛzie bɛ anyewɔzo! Amumuyɛ ɛyi bɛ awuke nee bɛ ahonle nu tɛkɛɛ.

¹⁶Mesu mefɛlɛ Nyamenle; na Ɛdɛnkɛma balie me.

¹⁷Nɔsolɛ nu, nwonlomɔ nee ewiazo meka me nyane na mesu, na ɔbadie me ne.

¹⁸Ɔbalie me ɛkɛla yeara ngoane nu, yeavi konle ɛhye mɔɔ megyi ɔ nloa la anu, ɔluakɛ bɛdabɛ mɔɔ bɛ nee me ɛlɛko la zonle.

¹⁹Nyamenle badie me, na yeaha bɛ aze, yemɔ mɔɔ ɔvi tete ɔle belemgbunli la; ɔboalekɛ bɛnli mɛla zo, yɛɛ bɛnzulo Nyamenle.

²⁰Me gɔnwo denrɛle ɔ sa tiale ɔ gɔnwo mɔ, ɔtulule ye ngyekyeleɛ ne.

²¹Ɔ nloa anu menlemenle tɛla ngyenle, noko konle ala yɛɛ ɔzo ɔlua a. Ye edwɛkɛ yɛ fɛ tɛla asikyelɛ, noko bɛpɛ kɛ konle dadeɛ.

²²Fa wɔ adesoa ne maa Ɛdɛnkɛma, na ɔbazɔ wɔ nu; ɔnrɛmaa tenlenenli ɛnrɛkpo aze.

²³Na wɔmɔ, O Nyamenle, ɛbavuandi bɛ wɔagua kuma kpole ne anu; ahɔdiawu nee ngunzima ɛnrɛli bɛ mekɛ ne foa ko bɔbɔ. Na mame, mebava me rɛle meawula wɔ nu.