Read Nzema Edw 59 Bible Online

Edw 59 - Nzema bible

Edw 59

¹[40][41] O me Nyamenle, die me fi me kpɔvolɛma asa anu, bɔ me nwo bane wɔ menli mɔɔ dwazo me nwo zo la asa anu,

²die me fi menli mɔɔ bɔ amumuyɛ ɛbɛla la asa anu, na die me fi ahɔdiawu ne mɔ asa anu.

³Ɔluakɛ, nea, bɛhɔ me nwo nzia, menli atisesebɛ ɛli me ti amonle. O Ɛdɛnkɛma, metɛyɛle ɛtane, metɛtonle mɛla biala,

⁴metɛfonle, noko bɛnriandi bɛkɔ me nwo nzia. Maa ɛ nwo zo, bɛla baboa me, na nea!

⁵Wɔmɔ, Tumivolɛ Ɛdɛnkɛma Nyamenle, ɛle Yizilayɛ Nyamenle. Dwazo tea maanle maanle ne mɔ kɔsɔɔti; mmafavi amumuyɛma atisesebɛ ye anu biala.

⁶Nɔɔzo biala bɛsia bɛba me nwo zo, bɛkpo kɛ ahwea bɛbɔ suakpole ye mgbɔlɔka.

⁷Kɛ bɛlua lɔ ɛ, bɛlɛtea kɛ bɛli tweanga, na bɛnrese bɛ gye, bɛ edwɛkɛ se, “Nwane a kɛde yɛ ne a?”

⁸Na wɔmɔ, O Ɛdɛnkɛma, ɛsele bɛ, ɛsi maanle maanle mɔɔ ɛnzonle wɔ la amgbu.

⁹O me Anwosesebɛ, mebado edwɛne meaye wɔ ayɛlɛ, ɔluakɛ wɔmɔ, O Nyamenle, ɛle me aranemgbole.

¹⁰Me Nyamenle balua ye ɛhulolɛ kpundii ne azo ayia me; me Nyamenle bamaa meanwu kɛ me kpɔvolɛma ne ɛho ɛdɔ.

¹¹Mmaku bɛ, anrɛɛ me menli ne arɛle kɛvi; fa wɔ tumi ne maa bɛyɛ gyigyiligyigyili, na ka bɛ gua aze, O Awulae, yɛ wowavolɛ.

¹²Bɛ nloa edwɛkɛ nee bɛ munzule adwenle biala ati maa bɛ mgbanyizonle ɛbu ɛzia bɛ. Kɛmɔ bɛbɔ adalɛ na bɛwa amonle la,

¹³maa wɔ ɛya kpole ne ɛyela bɛ wee, ɛmaa bɛdɔ nzonle, bɛ bo zo ɛminli, amaa menli anwu kɛ Nyamenle le belemgbunli wɔ Yizilayɛ toonwo ɔdwu ewiade ɛleka biala.

¹⁴Nɔɔzo biala bɛsia bɛba me nwo zo, bɛkpo kɛ ahwea bɛbɔ suakpole ye mgbɔlɔka.

¹⁵Bɛduolua nu bɛkpondɛ aleɛ, na saa bɛ ko anyi a ɛnee bɛlɛkpo.

¹⁶Na mame, mebado wɔ anwosesebɛ nwo edwɛne; mebado wɔ ɛhulolɛ kpundii ne anwo edwɛne nwonlomɔ, ɔluakɛ wɔyɛ me aranemgbole nee me ɛvealeka wɔ me amaneɛnwunlɛ mekɛ nu.

¹⁷O me Anwosesebɛ, mebado edwɛne meaye wɔ ayɛlɛ, ɔluakɛ wɔmɔ, O Nyamenle, ɛle me aranemgbole, Nyamenle ne mɔɔ kile ye ɛhulolɛ kpundii me nwo zo la.