Read Nzema Edw 60 Bible Online

Edw 60 - Nzema bible

Edw 60

¹[42][43] O Nyamenle, wɔkpo yɛ, wɔgologolo yɛ nwo banebɔlɛ; wɔva yɛ nwo ɛya; O, fa yɛ sie yɛ bo zo ne.

²Wɔmaa azɛlɛ ɛkpusu, wɔmaa yekpuke; ka mua nwolɛ, na ɔlɛwaye.

³Wɔmaa wɔ menli ne ɛnwu amaneɛ dɔɔnwo; wɔmaa yɛ nwanye yɛnlo yɛyɛ tindaanwu.

⁴Wɔvola fɛlɛnra wɔmaa bɛdabɛ mɔɔ bɛsulo wɔ la, kɛ bɛnriandi bɛradane ye.

⁵Amaa wɔalie menli mɔɔ kulo wɔ la ngoane la, bua yɛ nwolɛ na maa ɛ sa fema zo, maa yɛli konim.

⁶Nyamenle ɛdendɛ wɔ ye ɛleka nwuanzanwuanza ne, ɔse, “Mebahyɛ Hyikɛm anu konimlilɛ nu na meahyɛ Sɛko Bɔnza meamaa me menli ne.

⁷Geleade le me ɛdeɛ; Manasɛ le me ɛdeɛ; Yifelaem le me kyɛlɛ; Dwuda le me tumi kpɔma;

⁸Mowabe le me kyɛnze bonkuma mɔɔ menrinzi me sa anwo nu, mefuandi me mgbɔlaboa megua Yidɔm anwo zo; metea nu konimlilɛ nu megua Filisitiama anwo zo.”

⁹Nwane a kɛva me kɛhɔ suakpole ne mɔɔ bɛhye nwo la azo a? Nwane a kɛva me kɛhɔ Yidɔm a?

¹⁰O Nyamenle, asoo ɛtɛkpole yɛ ɛ? O Nyamenle, ɛ nee yɛ ɛlɔnema ne angɔ.

¹¹O boa yɛ wɔ kpɔvolɛ ne ati, ɔluakɛ sonla moalɛ le mgbane.

¹²Saa Nyamenle boka yɛ nwo a yɛbaho yɛadɔ zo; yemɔ yɛɛ ɔbaha kpɔvolɛma ne yeagua a.