Read Nzema Edw 63 Bible Online

Edw 63 - Nzema bible

Edw 63

¹[46][47] O Nyamenle, wɔmɔ a ɛle me Nyamenle a, mekpondɛ wɔ, me ɛkɛla anwo ɛlɛdɔ wɔ; me sonla mumua ne ɛlɛpele akpondɛ wɔ, kɛ azɛlɛ resee mɔɔ ɛhwie na ɔlɛkpondɛ nzule la.

²Yemɔti menlea ɛ nyunlu wɔ wɔ ɛleka nwuanzanwuanza ne, na menwu wɔ tumi ne nee wɔ anyunlunyia ne.

³Kɛmɔ wɔ ɛhulolɛ kpundii ne le kpalɛ tɛla ngoane la, mebaye wɔ ayɛlɛ.

⁴Yemɔti sumunli kenle ala mɔɔ mede ngoane nu la, mebaye wɔ ayɛlɛ, mebakpogya me sa zo meabɔ wɔ duma.

⁵Bɛli me ɛkɛla adane bɛmaa yeyɛ belane toboo, na mefa fɛlɛkolilɛ meye wɔ ayɛlɛ.

⁶Saa mela me ɛkpa zo a medwenle ɛ nwo, na me adwenle gyinla ɛ nwo zo nɔe ne amuala.

⁷Ɔluakɛ wɔmɔ, wɔyɛ me moalɛ; na mefea ɛ ndɛba abo meto anyelielɛ edwɛne.

⁸Me ɛkɛla beta wɔ kyengye; ɛ sa fema ne lɛ me nu.

⁹Na bɛdabɛ mɔɔ bɛkpondɛ me bɛahu me la bahɔ azɛlɛ bo kuma nu;

¹⁰bɛbaye bɛ bɛamaa bɛawu dadeɛ nloa, na bɛayɛ nanemgbole aleɛ.

¹¹Na Nyamenle ati, belemgbunli ne anye balie; bɛdabɛ mɔɔ bɛfa ye bɛka ndane la anyunlu bara anyia; ɔluakɛ adalɛma baha bɛ nloa ado nu.