Read Nzema Edw 66 Bible Online

Edw 66 - Nzema bible

Edw 66

¹Ewiade amra amuala, bɛva anyelielɛ bɛdeɛdea nu bɛye Nyamenle ayɛlɛ.

²Bɛdo anyunlunyia edwɛne bɛhanvo ye duma ne; bɛyeyɛ ye anyunlunyia nu!

³Bɛha bɛhile Nyamenle kɛ, “Wɔ gyima yɛ ɛzulolɛ! Wɔ tumi ne kpole ti wɔ kpɔvolɛma tu gua ɛ nyunlu.

⁴Ewiade amuala sonle wɔ; bɛto ayɛlɛyelɛ edwɛne bɛmaa wɔ, bɛto edwɛne bɛye wɔ duma ayɛlɛ.”

⁵Bɛrɛla bɛranlea debie mɔɔ Nyamenle ɛyɛ la, ye gyimayɛlɛ wɔ menli avinli yɛ ɛzulolɛ.

⁶ Ɔmanle nyevile ne yɛle azɛlɛ resee; menli diale bɛ gyakɛ anu pɛle azule ne. Ɛkɛ ne yɛɛ yɛ nye liele ye nu a.

⁷Ye tumi ne kpole ti ɔdi belemgbunli dahuu, ɔ nye wɔ maanle maanle ne mɔ anwo zo; mmamaa menli mɔɔ ɛde atua la memaa bɛ nwo zo.

⁸Maanle maanle kɔsɔɔti, bɛye yɛ Nyamenle ne ayɛlɛ, bɛmaa bɛ ayɛlɛyelɛ ne ɛdwu ɛleka biala.

⁹Yemɔ yɛɛ ɔtɛmaa yɛtɛte aze, na ɔtɛmanle yɛtɛtɔle aze a.

¹⁰Ɔluakɛ wɔmɔ Nyamenle, wɔzɔ yɛ wɔnlea; wɔzɔ yɛ wɔnlea kɛ bɛsɔ dwɛtɛ fufule bɛnea la.

¹¹Ɛmanle yɛhɔguale ɛhane nu, na ɛzoale yɛ ɛnlomboɛ;

¹²ɛmanle menli tietiale yɛ nwo zo; yɛluale senle nee nzule nu, noko wɔva yɛ wɔra azɛlɛ mɔɔ tɛlɛ la azo.

¹³Mebava ɛyelalɛ azubɔdeɛ meara wɔ sua nu; mebaye me ɛwɔkɛ ne mɔ

¹⁴mɔɔ membɔle, wɔ mekɛ mɔɔ mewɔ amaneɛnwunlɛ nu la.

¹⁵Mebava nane mɔɔ ɛlɔ la meayɛ ɛyelalɛ azubɔdeɛ meamaa wɔ; mebava mboane nyinli meabɔ ɛyelalɛ azu meamaa wɔ; mebava nlankɛ nyinli nee mbɔnkye meabɔ azu meamaa wɔ, na ye esike adwu anwomanyunlu.

¹⁶Bɛdabɛ mɔɔ bɛsulo Nyamenle la, bɛrɛla bɛradie, na mebaha mɔɔ yeyɛ yemaa me la meahile bɛ.

¹⁷Menzunle kpole kpalɛ menvɛlɛle ye, yɛɛ eza menyeyɛle ye.

¹⁸Saa ɛnee ɛtane wɔ me ahonle nu a, anrɛɛ Ɛdɛnkɛma ɛnrɛdie me.

¹⁹Na nɔhalɛ, Nyamenle ɛdie me; yedie me nzɛlɛlɛ.

²⁰Ayɛlɛyelɛ ɛha Nyamenle, ɔboalekɛ yeamkpo me nzɛlɛlɛ ne, yɛɛ yeanye ye ɛhulolɛ kpundii ne me nwo zo!