Read Nzema Edw 68 Bible Online

Edw 68 - Nzema bible

Edw 68

¹[50] Nyamenle ɛdwazo ɔmaa ye kpɔvolɛma ɛbɔ asande; menli mɔɔ kyi ye la ɛnriandi ɛvi ɔ nyunlu!

²Wuda bɛ kɔ kɛ bɛwuda esike la; kolo bɛ kɛ senle kolo ɛyɛlɛ; maa amumuyɛma ɛminli Nyamenle anyunlu!

³Maa tenlenema ne anye ɛlie; maa bɛli wulupe wɔ Nyamenle anyunlu; maa bɛ nye ɛlie na bɛli fɛlɛko.

⁴Bɛdo edwɛne bɛmaa Nyamenle; bɛdo edwɛne bɛye ye duma ne ayɛlɛ; bɛdo edwɛne bɛmaa mɔɔ tɛnla amungu zo tia la; ye duma a le Ɛdɛnkɛma, bɛli wulupe wɔ ɔ nyunlu!

⁵Nrisa bɛ ze nee ahunlanvolɛ pepɛdievolɛ a le Nyamenle mɔɔ de ye nwuanzanwuanza ɛleka ne la.

⁶Nyamenle maa mɔɔ ɛnlɛ bie la awuke maa ɔboa nu; ɔye pilizama ɔfinde ɔmaa bɛkpazi; na ɔmaa atuadelɛma tɛnla azɛlɛ mɔɔ ɛhwie la azo.

⁷O Nyamenle, mɔɔ ɛnee ɛli wɔ menli ne anyunlu, mɔɔ ɛ nee bɛ lua ɛsɛlɛ ne azo la,

⁸ azɛlɛ kpusule, ezule dɔle, kɛ ɛdawɔ Nyamenle wɔye ɛ nyunlu a; Nyamenle, Yizilayɛ Nyamenle ne yele ɔ nyunlu la, Saenae Boka kpusule dikyidikyi.

⁹O Nyamenle, ɛmanle ezule dɔle dɔɔnwo wɔ ɛleka biala. na ɛmanle agyadeɛ mɔɔ ɛlɛsɛkye la yɛle boɛ.

¹⁰Wɔ nyɛmoa nyianle ɛleka nuhua dɛnlanle; wɔ kpalɛ ti, O Nyamenle, ɛmanle ɛhyianvolɛma nyianle bɛ kyɛfoa.

¹¹Awulae dendɛle tumi nu; na menli[51] mɔɔ vale edwɛkɛ ne hɔle la zonle.

¹²Bɛse, “Ɛlɔnema nee bɛ arelemgbunli ne mɔ ɛlɛnriandi, bɛlɛnriandi!” Mraalɛ bɔbɔ mɔɔ wɔ sua nu mɔɔ nee mboane a de la

¹³kyɛ konle nu afedeɛ ne fa: abubule ndɛbalɛ mɔɔ bɛholo dwɛtɛ fufule bɛgua nwo, yɛɛ bɛ ndɛkɛ mɔɔ bɛholo ezukoa nvutuke tagyee bɛgua nwo.

¹⁴Tumivolɛ ne bɔle arelemgbunli ne mɔ asande la, ezukɔtweaba dɔle Zalemɔn Boka.

¹⁵O boka kpole, Beehyan boka; O boka mɔɔ ati zonle, Beehyan Boka!

¹⁶O boka ati dɔɔnwo, duzu ati a ɛ nye ɛbolo boka ne mɔɔ Nyamenle kulo kɛ ɔtɛnla zo la ɛ? Ɛhɛe, ɛkɛ ne a Ɛdɛnkɛma badɛnla dahuu a.

¹⁷Ɔvale konle ehwili dɔɔnwo, apenle bulu mɔnwo, apenle apenle kɛyɛ nyɛ, Awulae vi Saenae rale ɛleka nwuanzanwuanza ne.

¹⁸ Ɛvole boka tendenle ne, ɛzanle menli mɔɔ ɛhyele bɛ la nyɛma zo ɛlile ɛ nzi. ɛliele ahyɛlɛ ninyɛne ɛvile menli ɛkɛ, atuadelɛma bɔbɔ hyɛle wɔ bie, amaa Ɛdɛnkɛma Nyamenle ne adɛnla ɛkɛ ne.

¹⁹Ayɛlɛyelɛ ɛha Awulae, mɔɔ soa yɛ adesoa ne mɔ dahuu la; Nyamenle le yɛ ngoanelielɛ.

²⁰Yɛ Nyamenle ne le ngoanelielɛ Nyamenle; na yɛ Awulae Nyamenle ne ati, yɛɛ yɛkola yɛnriandi ewule a.

²¹Nyamenle bagelegele ye kpɔvolɛma ati, bɛdabɛ mɔɔ bɛdua fɔlɛlilɛ ndenle nu la.

²²Awulae se, “Me nee bɛ vi Beehyan bazia ara, me nee bɛ vi nyevile kunlu lɔ bazia ara,

²³amaa bɛatietia mogya nu, na bɛ ahwea ne mɔ noko anyia bɛ afoa nu ɛdeɛ avi kpɔvolɛma ɛkɛ.”

²⁴O Nyamenle, awie biala ɛnwu wɔ konimlilɛ ɛlɔnwɔnedolɛ ne; me Nyamenle, me Belemgbunli ne ɛlɔnwɔne ne mɔɔ ɔdole ɔhɔle ye ɛleka nwuanzanwuanza ne la.

²⁵Edwɛndolɛma ne lumua, agolehanlɛma ne li bɛ nzi; mbɛlɛra mɔɔ wozo akɛya la li avinli.

²⁶Bɛto edwɛne kɛ, “Bɛye Nyamenle ayɛlɛ wɔ ye menli ɛwolaa ne ayia ne anu, bɛyeyɛ Ɛdɛnkɛma, O bɛmɛ Yizilayɛma abo zo amra!”

²⁷Bɛngyaman, bɛ nuhua kakula ne a lumua a, Dwuda arelemgbunli nee bɛ ɛlɔne, Zɛbulɛn arelemgbunli, Nafetalae arelemgbunli doa zolɛ.

²⁸O Nyamenle, kile wɔ tumi ne; O Nyamenle mɔɔ wɔho wɔmaa yɛ, kile wɔ anwosesebɛ ne.

²⁹Wɔ Ɛzonlenlɛ Sua ne mɔɔ wɔ Gyɛlusalɛm la ati, arelemgbunli soa ahyɛlɛ ninyɛne bɛlɛ wɔ.

³⁰Tea nanemgbole ne mɔ mɔɔ vea ndɔ ne mɔ abo, menli ne mɔɔ ɛyɛ bɛ nwo nlankɛ nyinli nee nlankɛ mralɛ la. Tietia menli mɔɔ anye bolo adwulelielɛ la anwo zo; bɔ menli mɔɔ anye die konle nwo la asande.

³¹Maa bɛva kɔbele bɛvi Yigyibiti bɛrɛla; maa Sudanema ɛyɛ ndɛ ɛmaa bɛ sa zo ɛmaa Nyamenle.

³²Azɛlɛ ye azo arelemgbunli maanle, bɛdo edwɛne bɛmaa Nyamenle; bɛdo ayɛlɛyelɛ edwɛne bɛmaa Awulae,

³³bɛdo edwɛne bɛmaa mɔɔ dua anwomanyunlu la, tete anwomanyunlu; bɛdie, ɔlɛtendɛ, ɔ ne kpole ne dielie.

³⁴Bɛbɔ Nyamenle kpoleyɛlɛ ne nolo, ye belemgbunlililɛ ne keda Yizilayɛma anwo zo, ye tumi ne wɔ anwomanyunlu.

³⁵O Nyamenle, ɛvi wɔ ɛleka nwuanzanwuanza ne ɛfinde a ɛ nwo yɛ ɛzulolɛ; Yizilayɛ Nyamenle ne, yemɔ yɛɛ ɔfa tumi nee anwosesebɛ ɔmaa ye menli a. Bɛye Nyamenle ayɛlɛ.