Read Nzema Edw 69 Bible Online

Edw 69 - Nzema bible

Edw 69

¹[52] O Nyamenle, die me! ɔluakɛ azule ɛyi ɛva me.

²Memi moto kpole nu; mennyia debie menzɔ nu. Mehɔ azukunlu kpalɛ, yɛɛ azuyilɛ ne se me nwo zo.

³Mevɛlɛ dedee me ɛnwomenle ɛwie; me kɔmenzia ɛyɛ resee. Mehendɛ me Nyamenle ne toonwo, akee me nye ɛha adenle zo.

⁴ Bɛdabɛ mɔɔ bɛkpɔ me mgbane gyɛne la zonle tɛla me ti enrinli; menli mɔɔ kpondɛ ahu me la anwo yɛ se, yɛɛ adalɛ ala a bɛbɔ ye me nwo a. Debie mɔɔ meanwua la, ɔwɔ kɛ metua ɔ?

⁵O Nyamenle, ɛdawɔ ɛze koasea mɔɔ meyɛ la, ɛtane biala mɔɔ meyɛ la la ɛ nyunlu.

⁶Mmamaa ɔdua me nwo zo bɛdabɛ mɔɔ bɛ anyelazo wɔ wɔ nu la anyunlu gua aze, O Tumivolɛ Awulae Nyamenle; mmamaa ɔdua me nwo zo bɛdabɛ mɔɔ bɛkpondɛ ɛ bo zo la anyunlu gua aze, O Yizilayɛ Nyamenle.

⁷Ɔluakɛ wɔmɔ ɛ ti yɛɛ bɛbɔ me aholoba, na nyiane ɛkpɔlɔ me betaa a.

⁸Meyɛ ɛyɛvolɛ wɔ me mediema avinli, ɔmɔ akunlu mralɛ bɔbɔ ɛnze me.

⁹ Ɔluakɛ wɔ Ɛzonlenlɛ Sua ne anwo ɛhulolɛ sɔ kɛ senle wɔ me nu, yɛɛ aholoba mɔɔ bɛbɔ wɔ la amuala gua me nwo zo.

¹⁰Mɔɔ menzunle mengyele ɛhɔne la, menli bɔle me nwolɛ aholoba.

¹¹Menvale ɛrele mengedale la, menyɛle ɛfenle memanle bɛ.

¹²Me nwo edwɛkɛ ala yɛɛ bɛgua a bɛka a, yɛɛ nzabovoma fa me to edwɛne.

¹³Na mame, O Ɛdɛnkɛma, me nzɛlɛlɛ la ɛ nyunlu. O Nyamenle, wɔ mekɛ kpalɛ ne dwu a, dua wɔ ɛhulolɛ kpundii kpole ne azo bua me.

¹⁴Fa wɔ nɔhalɛ moalɛ ne die me, mmamaa memi mekɔ moto ne abo; die me fi me kpɔvolɛma asa anu, nee azule buma ne anu.

¹⁵Mmamaa azuyilɛ ne fa me, anzɛɛ menoma buma ne abo, anzɛɛ ewule kuma keda me nwo zo.

¹⁶O Ɛdɛnkɛma, wɔ ɛhulolɛ kpundii ne di munli na bua me, wɔ anwunvɔnezelɛ bebelebe ne ati, kakyi ɛ nye nea me.

¹⁷Mmaye ɛ nye wɔ wɔ sonvolɛ anwo zo; ɔluakɛ melɛnwu amaneɛ na ka ɛ nwo bua me.

¹⁸Twe bikye me, kpɔne me; maa menyia me ti wɔ kpɔvolɛma asa anu.

¹⁹Ɛdawɔ ɛze aholoba mɔɔ bɛbɔ me la, ɛze me nyiane nee me anyiemgba; ɛze me kpɔvolɛma amuala.

²⁰Aholoba ne akee ɛbo me nwo zo, akee meyɛ ɛhwee a ɔnyɛ boɛ. Memkpondɛle anwunvɔnezelɛ, na meannyia bie; memkpondɛle arɛlekyekyelɛ, na meannyia bie.

²¹ Ɛhɔne ku me la, bɛmanle me pɔyezen, nzuhɔne ku me la, bɛmanle me nzanvinli.

²² Maa bɛ ɛkponledolɛ ɛhakyi ɛhane; na bɛ ɛvoyialilɛ ɛyɛ ɛhane.

²³Maa bɛ nye ɛzi mɔɔ bɛnnwu debie a; na bɛ gyakɛ ɛbili dahuu kɛ atɛ.

²⁴Wola wɔ ɛya ne gua bɛ nwo zo, na maa wɔ ɛya ne ɛzɔ ɛyela bɛ.

²⁵ Maa bɛ azokoɛleɛ ɛdɔ mgbane, mmamaa awie tɛnla bɛ ndanlɛ azua ne mɔ anu.

²⁶Ɔluakɛ bɛyɛ mɔɔ wɔdea ye la kpɔdekpɔde, na bɛkondɔ mɔɔ wɔboda ye la nganlɛ.

²⁷Tea bɛ molozo molozo, mmamaa bɛfa bɛ nwo dwɔɔ.

²⁸ Ye bɛ aluma fi teasema buluku ne anu; mmakɛlɛ bɛ aluma ɛboka tenlenema anwo.

²⁹Melɛnwu amaneɛ, mete nyane; O Nyamenle, maa me zo na die me.

³⁰Mebado edwɛne meaye Nyamenle ayɛlɛ; mebava moyɛlɛ meabɔ ye kpoleyɛlɛ ne nolo.

³¹Ɛhye bazɔ Ɛdɛnkɛma anye adɛla ɛnlankɛ, anzɛɛ ɛnlankɛ nyinli mɔɔ ɛwie nyi la.

³²Maa bɛdabɛ mɔɔ bɛlɛsisi bɛ la ɛnwu ɛhye na bɛ nye ɛlie, bɛdabɛ mɔɔ bɛkpondɛ Nyamenle la, bɛzi bɛ ahonle.

³³Ɔluakɛ Ɛdɛnkɛma te bɛdabɛ mɔɔ bɛhyia la ane, yɛɛ ɔmkpo ye ɛdeɛ ne mɔ mɔɔ wɔ ngyelelɛ nu la.

³⁴Anwuma nee aze ɛye Nyamenle ayɛlɛ, nyevile nee mɔɔ wɔ nu la amuala ɛye ye ayɛlɛ.

³⁵Ɔluakɛ Nyamenle balie Zayɔn, na yeakyekye Dwuda azua ne mɔ fofolɛ; ye sonvolɛma badɛnla ɛkɛ na bɛava azɛlɛ ne;

³⁶bɛ bo zo amra bava ayɛ bɛ agyadeɛ, na bɛdabɛ mɔɔ bɛkulo ye duma ne la badɛnla ɛkɛ.