Read Nzema Edw 7 Bible Online

Edw 7 - Nzema bible

Edw 7

¹O Ɛdɛnkɛma, me Nyamenle, wɔ nuhua yɛɛ menriandi mefea a; die me fi menli mɔɔ tu me mgbaliko la asa anu,

²anrɛɛ bɛkɛhakyi bɛ nwo awenade bɛkɛtete me, na bɛahwili me bɛahɔ mɔɔ awie ɛnrɛhola me die a.

³O Ɛdɛnkɛma, me Nyamenle, saa meyɛ ɛhye, saa meyɛ ɛtane bie,

⁴saa meva ɛtane medua me gɔnwo bie kakɛ, anzɛɛ mgbane gyɛne ne ala mesesa me kpɔvolɛ ninyɛne a,

⁵ɛnee maa me kpɔvolɛ ne ɛvoa me ɛhye me, maa ɔbɔ me ɔdo aze na ɔhu me, ɔgyakyi me funli azɛlɛ ne anwo.

⁶O Ɛdɛnkɛma, fa ɛya dwazo, dwazo tia me kpɔvolɛma ɛya kpole ne; O me Nyamenle, dwazo na wɔbua ndɛne ne wɔwie.

⁷Maa wɔ menli ne ɛyia nu wɔ ɛ nwo ɛkɛ, na ɛvi anwuma dwu bɛ avinli.

⁸Ɛdɛnkɛma bua menli ndɛne; O Ɛdɛnkɛma, bua me ndɛne, kɛmɔ me pɛlepɛlelilɛ si de nee me boɛ mɔɔ medi la anwo.

⁹ O maa amumuyɛma ɛgyakyi ɛtaneyɛlɛ; maa tenlenema ɛgyinla kpundii; ɛle pɛlepɛlelilɛ Nyamenle, mɔɔ kola sɔ ahonle nee adwenle nea a.

¹⁰Me enyinlike a le Nyamenle, ɔdie menli mɔɔ bɛ ahonle nu te la.

¹¹Nyamenle le pɛlepɛle ndɛnebuavolɛ, ɔle Nyamenle mɔɔ ɛnli ɛtane nzi fee a.

¹²Saa amumuyɛnli annu ɔ nwo a, Nyamenle bazi ye dadeɛ ne, yekpo ye ɛda ne, yezinla ye ɛda mbaka ne;

¹³yeziezie ye konle ninyɛne anwo ɛzulolɛ ne, yezua ye ɛda mbaka ati senle ne mɔ.

¹⁴Bɛnlea, amumuyɛnli ne nrenzɛ ɛtane, amumuyɛ ngome maa ɔ ko tu, na ɔwo adalɛ.

¹⁵Ɔyele ɔ nwo ɔfu kuma, na ɔtɔ kuma ne mɔɔ ɔdaye yevu la anu.

¹⁶Ye ngunzi ne bɔ ɔ ti, na ye konle adwenle ne bodɛboda ye.

¹⁷Mebayɛ Ɛdɛnkɛma mo mɔɔ fɛta ye pɛlepɛlelilɛ ne, na meado ayɛlɛyelɛ edwɛne meahanvo Ɛdɛnkɛma, Anwuma Anwumanli ne duma.