Read Nzema Edw 71 Bible Online

Edw 71 - Nzema bible

Edw 71

¹O Ɛdɛnkɛma, ɛ kunlu yɛɛ menriandi mefea a; mmamaa me nyunlu gua aze ɛlɛ!

²Dua wɔ tenleneyɛlɛ ne azo boa me na die me; yɛ ɛnzonlɛ tie me, na die me!

³Yɛ me ɛvealeka bodane, me aranemgbole ɛsesebɛ, na die me. Ɔluakɛ ɛle me bodane nee me aranemgbole.

⁴O me Nyamenle, die me fi amumuyɛma asa anu, yɛɛ sonla atisesebɛ nee mɔɔ ɛnli pɛlepɛle la asa anu.

⁵Ɔluakɛ O Awulae, ɛle me anyelazo, O Ɛdɛnkɛma, me mgbavolɛ nu yɛɛ menvale me rɛle menwulale wɔ nu a.

⁶Ɔvi me awolɛ nu yɛɛ mengisale wɔ a, wɔmɔ yɛɛ ɛyele me ɛvile ɔmɔ akunlu a. Mebaye wɔ ayɛlɛ dahuu.

⁷Meyɛ ndonwo memaa dɔɔnwo, noko wɔmɔ yɛɛ ɛle me ɛvealeka ɛsesebɛ a.

⁸Meye wɔ ayɛlɛ mekɛ biala, na mebɔ wɔ anyunlunyia ne nolo alehyenlɛ biala.

⁹Mmakpo me wɔ me mrelera nu; saa me anwosesebɛ wie a, mmakpo me.

¹⁰Ɔluakɛ me kpɔvolɛma keha me nwo edwɛkɛ, bɛdabɛ mɔɔ bɛkpondɛ me bɛahu me la yia bɔ adwenle,

¹¹na bɛka kɛ, “Nyamenle ɛkpo ye; bɛvoa ye bɛhye ye, ɔluakɛ awie ɛnle ɛkɛ mɔɔ die ye a.”

¹²O Nyamenle, mmafi me nwo ɛkɔ moa; O me Nyamenle, ka ɛ nwo balie me!

¹³Maa menli mɔɔ keha me nwo edwɛkɛ ɛtane ɛtane la anyunlu ɛgua aze na bɛhu bɛ; maa nyiane nee anyiemgba ɛbia menli mɔɔ kpondɛ kɛ bɛkile me nyane la.

¹⁴Na mame, me anyelazo wɔ wɔ nu dahuu, yɛɛ mebaye wɔ ayɛlɛ kpole kpalɛ dahuu.

¹⁵Mebabɔ wɔ tenleneyɛlɛ, nee wɔ ngoanelielɛ ne nolo alehyenlɛ biala, ɔluakɛ bɛ somaa bo me ndelebɛbo zo.

¹⁶Mebalua Awulae Nyamenle ne nyɛleɛ mgbole zo meara; mebaye wɔ tenleneyɛlɛ ne, wɔ tenleneyɛlɛ ne ala ayɛlɛ.

¹⁷O Nyamenle, ɔvi me mgbavolɛ nu yɛɛ ɛvale me ɛhilehilelɛ a, yɛɛ metɛbɔ wɔ nwanwane nyɛleɛ ne mɔ nolo.

¹⁸Yemɔti saa menyi, na me ti zo ɛyɛ nwohyee a, O Nyamenle, mmakpo me, kɔkpula kɛ menwɔbɔ wɔ tumi kpole ne nolo menwɔmaa awolɛndoazo mɔɔ bara la kɛde bie.

¹⁹O Nyamenle, wɔ tumi nee wɔ kpalɛyɛlɛ dwu anwuma lɔ. Wɔyɛ ninyɛne mgbole, O Nyamenle, nwane a le kɛ ɛdawɔ a?

²⁰Ɛdawɔ mɔɔ wɔmaa menwu amaneɛ mgbole ɛhye mɔ la, ɛbakpogya me zo bieko wɔavi ɛbɛla kuma nu, saa mewɔ azɛlɛ kuma bo bɔbɔ a, ɛbaye me wɔavinde bieko.

²¹Ɛbamaa meanyia me nyunlu molozo, na wɔakyekye me rɛle bieko.

²²Medame noko mebava getaa kpole meaye wɔ ayɛlɛ, O me Nyamenle, wɔ wɔ nɔhalɛlilɛ ne ati. Mebava getaa ekyi meado edwɛne meaye wɔ ayɛlɛ, O Yizilayɛ Nwuanzanwuanza Ko ne.

²³Mebadea nu anyelielɛ nu, mekɛ mɔɔ menwɔha kɛ meye wɔ ayɛlɛ la; me ɛkɛla mɔɔ ɔdaye noko wɔlie ye la baye wɔ ayɛlɛ.

²⁴Mebaha wɔ tenlene moalɛ ne anwo edwɛkɛ dahuu, ɔluakɛ bɛdabɛ mɔɔ bɛkpondɛ me bɛahu me la anyunlu ɛgua aze, bɛbɔ anyiemgba.