Read Nzema Edw 72 Bible Online

Edw 72 - Nzema bible

Edw 72

¹O Nyamenle, kilehile belemgbunli ne wɔ pɛlepɛlelilɛ ne, na kilehile ɔ ra nrenya ne wɔ tenleneyɛlɛ ne.

²Maa ɔva tenleneyɛlɛ ɔbua ye menli ne ndɛne, na ɔva pɛlepɛle ɔbua ehyianvolɛma ndɛne.

³Maa menli mɔɔ wɔ azɛlɛ ne azo la ɛkpazi, na awoka ne mɔ azo ɛhye aleɛ ɛmaa menli ne, na tenleneyɛlɛ ɛyi maanle ne tɛkɛɛ.

⁴Maa belemgbunli ne ɛlie ehyianvolɛma ati, ɔye mɔɔ ɛnlɛ bie la ɔvi ɛhyianlɛ nu, na ɔbubu mɔɔ di nzisi la dwɔkɔdwɔkɔ.

⁵Maa wɔ menli ne ɛzonle wɔ alehyenlɛ nee aledwolɛ ɔhɔdwu awolɛndoazo kɔsɔɔti anu.

⁶Maa belemgbunli ɛyɛ kɛ ezule mɔɔ tɔ doɔloa ndile, ɔyɛ kɛ nyenyensuo, ɔzia azɛlɛ ye.

⁷Maa tenleneyɛlɛ ɛdende ye mekɛ zo, na anzonudwolɛ ɛrɛla dahuu mekɛ mɔɔ ɛnlɛ awieleɛ.

⁸ Maa ye belemgbunlililɛ ɛdwu ɛnwea ɛnwea, ɔvi Azule Yufileti ne anloa ɔhɔdwu azɛlɛ ye awieleɛ.

⁹Maa ɛsɛlɛ zo amra ɛbu ndwɛlɛ wɔ ɔ nyunlu, na ye kpɔvolɛma ɛli anwea.

¹⁰Maa Sepeen nee bɔra ne mɔ arelemgbunli ɛdua adwule ɛmaa ye, na Areleebea nee Yiteɔpea arelemgbunli ɛhyɛ ye ninyɛne.

¹¹Maa arelemgbunli kɔsɔɔti ɛdu ɛgua ɔ nyunlu, na maanle maanle kɔsɔɔti ɛzonle ye.

¹²Ɔluakɛ mɔɔ ɛnlɛ bie la fɛlɛ a ɔdie ye zo, ɔdie ehyianli nee mɔɔ ɛnlɛ boavolɛ la zo.

¹³Ɔnwu mɔɔ ɛnlɛ anwosesebɛ nee mɔɔ ɛnlɛ bie la anwunvɔne, na ɔdie mɔɔ ɛnlɛ bie la ngoane.

¹⁴Ɔdie bɛ ɔfi nzisi nee konle nu; bɛ mogya sonle bolɛ wɔ ɔ nye zo.

¹⁵Belemgbunli ɛnyi ɛhyɛ! Maa bɛva Areleebea ezukoa nvutuke bɛrɛlɛ ye. Maa bɛyɛ nzɛlɛlɛ bɛmaa belemgbunli ne, na bɛzɛlɛ nyilalɛ bɛmaa ye dahuu.

¹⁶Maa aleɛ ɛbu azɛlɛ ne azo; maa abɛlɛ ɛzi agole wɔ awoka ne mɔ azo, na bɛvievia mralɛ kɛ Lɛbanɔn ɛdeɛ ne la. Maa menli ɛyi azuamgbole ne mɔ azo gbudugbudu, na bɛ nwo ɛzo kɛ ɛbɔ nu ndile.

¹⁷Ye duma ɛdɛnla ɛkɛ ne dahuu, na ye anyunlunyia ɛda kɛ sɛnzɛne. Menli kɔsɔɔti ɛva ye ɛyila bɛ nwo, na maanle maanle ɛzuzu ye boɛ.

¹⁸Bɛye Ɛdɛnkɛma, Yizilayɛ Nyamenle ne ayɛlɛ, ɔ ngomekye ala a ɔyɛ nwanwane ninyɛne a.

¹⁹Bɛye ye duma nwuanzanwuanza ne ayɛlɛ dahuu; bɛmaa ye anyunlunyia ɛyi ewiade tɛkɛɛ! Amen. Amen!

²⁰Gyɛsi ara Devidi nzɛlɛlɛ ne mɔ awieleɛ ɛne.