Read Nzema Edw 73 Bible Online

Edw 73 - Nzema bible

Edw 73

¹Nɔhalɛ, Nyamenle le kpalɛ maa mɔɔ di boɛ la, ɔle kpalɛ ɔmaa bɛdabɛ mɔɔ bɛ ahonle nu te la.

²Na mame, mendule koti menwiele, me gyakɛ ɛdudulɛ nu, ɔhale kyɛkyɛ na meatele.

³Ɔluakɛ me nye bolole adubɛnwoma, mekɛ mɔɔ menwunle kɛ amumuyɛma ɛkpazi la.

⁴Ɔboalekɛ bɛnde nyane; bɛte kpɔkɛ, bɛ nwonane tutoboo.

⁵Bɛ nwo ɛngyele bɛ kɛ bie mɔ la; edwɛkɛ ɛndo bɛ kɛ bie mɔ la.

⁶Yemɔti bɛgua adubɛnwo ndweabane; bɛwulowula nzisi adɛladeɛ.

⁷Ɛhyenlɛ ngome ɛmaa bɛ nyunlu ɛyɛ totofoo, mgbane mgbane ɛyɛlɛ ɛyi bɛ ahonle ne mɔ.

⁸Bɛle agolobɛnwo, bɛka ɛtane; bɛtu bɛ nwo na bɛbɔ adwenle kɛ bɛsisi awie mɔ.

⁹Bɛtendɛ bɛtia anwuma, bɛka mgbole wɔ azɛlɛ ye azo ɛleka biala.

¹⁰Ɔlua zo menli tu toa bɛ na bɛyeyɛ bɛ; bɛnnwu ɛtane biala wɔ bɛ nwo.

¹¹Na bɛka kɛ, “Kɛ ɔkɛyɛ na Nyamenle anwu ye ɛ? Asoo Anwuma Anwumanli ne lɛ nwolɛ adwenle?”

¹²Nea, kɛ amumuyɛma de la ɛne; bɛnyia anwonyia dɔɔnwo, dahuu bɛ nwo tɔ bɛ.

¹³Meyɛ me ahonle nu bɔkɔbɔkɔ mgbane, menrinzi me sa anwo kɛ menze nwolɛ bie mgbane.

¹⁴Ɔluakɛ alehyenlɛ muala menwu amaneɛ, nwonlomɔ biala menyia ndeanlɛ.

¹⁵Saa menganle kɛ, “Mebaha ye zɛhae” a, anrɛɛ meanga nɔhalɛ meangile ɛ mra awolɛndoazo ye.

¹⁶Na mɔɔ mendwenlenle kɛ menwɔzi menwɔde ɛhye abo la, ɔyɛle me nye zo gyima ɛsesebɛ bie,

¹⁷kɔkpula kɛ mengɔle Nyamenle Ɛzonlenlɛ Sua ne anu; na menwunle bɛ muala bɛ awieleɛ la.

¹⁸Nɔhalɛ, ɛfa bɛ ɛsie ɛleka teteletetele; ɛmaa bɛtu bɛgua, bɛ bo zo minli bɔkɔɔ.

¹⁹Ndɛndɛ ne ala ɛnee bɛ bo zo ɛbɔ, bɛ bo zo ɛminli ɛzulolɛ ɛzulolɛ bie.

²⁰Bɛle kɛ sonla mɔɔ kɛlafe kɛdunwue la ɛlalɛ, ɔtunwue a ɛmbu ye ɛlalɛ ne bie.

²¹Mekɛ mɔɔ nyane hanle me, mekɛ mɔɔ me ahonle futule la,

²²menyɛle koasea anzenwolɛbie, menyɛle kɛ nane la mentiale wɔ.

²³Noko akee dahuu me nee wɔ a de a; ɛlɛ me sa fema ne anu dahuu.

²⁴Ɛfa wɔ ngilehilelɛ ne ɛsinza me, na nzinlii ɛbalie me anyunlunyia nu.

²⁵Menlɛ awie wɔ anwuma kɛ ɛdawɔ, yɛɛ memkpondɛ ɛhwee wɔ ewiade kɛ wɔmɔ.

²⁶Me nwonane bawie, me ahonle ayɛ bɛtɛɛ, noko Nyamenle le me anwosesebɛ nee me kyɛfoa dahuu.

²⁷Na nea, bɛdabɛ mɔɔ bɛ nee wɔ bɛ avinli twe la baminli; ɛmaa bɛdabɛ mɔɔ bɛnli nɔhalɛ bɛmmaa wɔ la abo zo bɔ.

²⁸Na mame, ɔle kpalɛ kɛ menwɔbikye Nyamenle; meyɛ Awulae Nyamenle ne me ɛvealeka, amaa meabɔ wɔ gyima ne mɔ nolo.