Read Nzema Edw 74 Bible Online

Edw 74 - Nzema bible

Edw 74

¹O Nyamenle, duzu ati a wɔpɛ yɛ wɔgua bɔkɔɔ ɛ? Duzu ati a wɔ ɛya kpu esike yelɛyela wɔ adidileka mboane ɛ?

²Kakye wɔ menli ne mɔɔ mɔmoane ɛvale bɛ ɛyɛle wɔ ɛdeɛ, na wɔlie bɛ wɔyɛ bɛ wɔ agyadeɛ, abusua ekpunli la. Kakye Zayɔn Boka mɔɔ wɔdɛnla zolɛ ɛlɛ la.

³Kpɔsa ninyɛne ne mɔɔ ɛzɛkye bɔkɔɔ la avinli; yɛ kpɔvolɛma ɛzɛkye Ɛzonlenlɛ Sua ne anu debie biala.

⁴Wɔ kpɔvolɛma ɛva konimlilɛ ɛdeɛdea nu wɔ wɔ Ɛzonlenlɛ Sua ne anu; bɛdabɛ bɛkpɔnla bɛ sɛkɛlɛneɛ wɔ sɛkɛlɛneɛ zo.

⁵Bɛvale akuma bɛbubule anwuma anuhɔlɛ ne anlenkɛ ne.

⁶Bɛvale hamenle nee akuma bɛbubule taboa biala mɔɔ bɛli adwinli bɛgua zo la.

⁷Bɛdole senle wɔ Ɛzonlenlɛ Sua ne anu; bɛyelale wɔ Ɛleka Nwuanzanwuanza ne wee.

⁸Bɛhanle bɛhilele bɛ nwo kɛ, “Yɛtɛnla bɛ kɔme zo kpalɛ kpalɛ;” bɛyelale Nyamenle nyianu ɛleka ne mɔ mɔɔ wɔ maanle ne anu la amuala.

⁹Yɛnnwu yɛ sɛkɛlɛneɛ ne mɔ; Nyamenle kpɔmanvolɛ bieko ɛnle ɛkɛ, yɛɛ awie ɛnze kenle mɔɔ ɛhye mɔ kɛze a.

¹⁰O Nyamenle, kenlenzu yɛɛ kpɔvolɛ ne kɛgyakyi agolobɛnwo ye a? Asoo ɔwɔ kɛ kpɔvolɛ ne sɛkye wɔ duma bɔkɔɔ?

¹¹Duzu ati a wɔdo ɛ sa wɔbɛla nu na wɔva ɛ sa fema ne wɔwula ɛ nvɔnlɔma anu ɛ?

¹²Noko ɔvi tete, ɛle Nyamenle, me Belemgbunli mɔɔ die ngoane wɔ azɛlɛ ye azo a.

¹³ Ɛvale wɔ tumi ne ɛhyɛle nyevile ne anu, na ɛgelegelele nane anwo ɛzulolɛ ne ati azule nye.

¹⁴ Ɛgelegelele Lɛveatan[53] ati, na ɛvale ye nane ɛmanle fienemgbole nu nanemgbole lile.

¹⁵Ɛmanle nzufeanvea nee azule mralɛ zenzenle, na ɛmanle azudenle sesanle wele resee.

¹⁶Alehyenlɛ nee aledwolɛ ne le wɔ ɛdeɛ; ɛdawɔ a ɛbɔle sɛnzɛne nee anwumaneamra a.[54]

¹⁷Ɛdawɔ a ɛhyehyɛle ɛleka mɔɔ ɔwɔ kɛ azɛlɛ ne dwu la a; ɛdawɔ a ɛbɔle wawaa nee fɔsɛlɛ a.

¹⁸O Ɛdɛnkɛma, kakye ɛhye, nee kpɔvolɛ ne agolobɛnwo ne, menli mɔɔ ɛnze Nyamenle la sɛkye wɔ duma.

¹⁹Mmaye wɔ abubule ne ɛmaa ɛbɔ nu nanemgbole; mmamaa ɛ rɛle fi wɔ menli mɔɔ ɛhyia la fee.

²⁰Kakye wɔ ngyekyeleɛ ne, ɔluakɛ ahɔdiawu ɛhɔ nzia wɔ azɛlɛ ye azo ahodoka anu awozinli ne mɔ anu.

²¹Mmamaa mɔɔ bɛsisi ye la anyunlu gua aze; maa ehyianli ne nee mɔɔ ɛhyia la ɛye wɔ ayɛlɛ.

²²O Nyamenle, dwazo, na die wɔ duma ne sie aze. Kakye kɛ anzenyamenlema si golo ɛ nwo dahuu la.

²³Mmamaa ɛ rɛle fi wɔ kpɔvolɛma mɔɔ di wulupe, nee bɛ alɛra mɔɔ bɛyɛ ye dahuu la.