Read Nzema Edw 75 Bible Online

Edw 75 - Nzema bible

Edw 75

¹O Nyamenle, yɛyɛ wɔ mo; yɛyɛ wɔ mo; yɛbɔ wɔ duma na yɛka wɔ nwanwane gyima ne mɔ.

²Nyamenle se, “Saa mekɛ ne mɔɔ mehile la dwu a, mebabua ndɛne wɔ ye adenle zo.

³Saa azɛlɛ kpusu, maa abɔdeɛ muala kpusu a, medame a mesɔ ye memaa ɔgyinla kpundii a.

⁴Meka mekile adubɛnwonli ne kɛ, ‘Gyakyi adubɛnwo,’ na mese amumuyɛnli ne kɛ, ‘Mmaka mgbole,

⁵mmaka mgbole ɛmemaa ɛ nwo zo, anzɛɛ mmatwe ɛ kɔme ɛka mgbole’ ”

⁶Ɔluakɛ ndɛnebualɛ ɛnvi aduduleɛ anzɛɛ adɔleɛ, yɛɛ ɔmkpogya ɔ nwo zo ɔnvi ɛsɛlɛ nu ɔmba;

⁷Nyamenle ala a bua ndɛne a, ɔbɛlɛ bie aze, ɔmaa bie zo.

⁸Ɔluakɛ Ɛdɛnkɛma lɛ kɔpo ɔ sa nu, ɔlɛ nwanye mɔɔ ɛwie be na ɔlɛwu awubue la wɔ nu; ɔbawola ekyi bie yeagua, na azɛlɛ ye azo amumuyɛma banlo ɔ muala.

⁹Na mame, me nye balie dahuu, mebado edwɛne meaye Gyekɔbo Nyamenle ne ayɛlɛ.

¹⁰Ɔbazɛkye amumuyɛma tumi ne na tenlenema tumi ne bayɛ kpole.