Read Nzema Edw 77 Bible Online

Edw 77 - Nzema bible

Edw 77

¹Metea nu kpole mefɛlɛ Nyamenle, metea nu kpole, amaa Nyamenle ade me ne.

²Mekpondɛ Awulae wɔ me amaneɛnwunlɛ mekɛ nu; aledwolɛ nu metɛlɛdɛlɛ me sa nu mesɛlɛ, menvɛ fee; me ɛkɛla ɛmkponle kɛ bɛkɛkyekye ɔ rɛle.

³Medwenle Nyamenle anwo a, megu ɛnwomenle, medwenledwenle nwo nzɛlɛlɛ nu a, me rɛle bɔ.

⁴Ɛlɛ me nye anzi nwoma ne anu, ɛmmaa menlafe; me rɛle ɛbɔ kpole, mengola tendɛ.

⁵Medwenle mekɛ mɔɔ ɛze ɛhɔ la anwo, mekakye ɛvolɛ dɔɔnwo mɔɔ ɛze ɛhɔ la.

⁶Mendole edwɛne nɔɔzo wɔ me ahonle nu; medwenledwenle nwo meneɛnlea me ahonle nu kɛ:

⁷“Asoo Awulae bakpo me dahuu, mɔɔ ɔnrɛnwu me anwunvɔne ɛlɛ a?

⁸Asoo ye ɛhulolɛ kpundii ne ɛkpa nwo bɔkɔɔ? Asoo ye ɛwɔkɛbɔlɛ ne ɛwie bɔkɔɔ?

⁹Asoo Nyamenle arɛle ɛvi kɛ ɔkɛyɛ ahunlunyele? Asoo yeva ɛya yeminli ye anwunvɔnezelɛ ne?”

¹⁰Na mese, “Medame me nyane mɔɔ medi la yɛɛ ɛmaa Anwuma Anwumanli ne tumi ɛhakyi a.”

¹¹Mebahakye mɔɔ Ɛdɛnkɛma ɛyɛ la amuala; ɛhɛe, mebahakye wɔ mɔmoane nwanwane gyima ne.

¹²Mebadwenledwenle wɔ gyima ne amuala anwo, na meadwenle wɔ gyima mgbole ne mɔ anwo.

¹³O Nyamenle, wɔ adenle le nwuanzanwuanza; nyamenle boni a le kpole kɛ yɛ Nyamenle ne a?

¹⁴Wɔmɔ a ɛle Nyamenle mɔɔ yɛ nwanwane ninyɛne, mɔɔ wɔhile wɔ tumi ne wɔ menli avinli a.

¹⁵Ɛvale wɔ tumi ne ɛliele wɔ menli, Gyekɔbo nee Dwosefi abo zo amra.

¹⁶O Nyamenle, mɔɔ azule ne mɔ nwunle wɔ la, mɔɔ azule ne mɔ nwunle wɔ la, bɛzulole; ɛhɛe, buma fonyianle.

¹⁷Nzulemungu dɔle ezule bilididi, anwomanyunlu hulule; wɔ ɛda ne mɔ vedele ɛleka biala.

¹⁸Wɔ ɛhululɛ ne liele ahumuakyima ne anu, wɔ ɛsɛnlɛmanye ne mɔ kpakyele dale ewiade amuala; azɛlɛ kpusule dikyidikyi.

¹⁹Wɔ adenle la nyevile ne anu, ɛ gyakɛ abo adenle la buma mgbole ne mɔ anu, noko awie anwu ɛ gyakɛ abo zo.

²⁰Ɛhanle wɔ menli ne kɛ mboane na ɛlile bɛ nyunlu, Mosisi nee Aalɔn a nleanle bɛ nwo zo a.