Read Nzema Edw 78 Bible Online

Edw 78 - Nzema bible

Edw 78

¹O me menli, bɛdie me ngilehilelɛ; bɛyɛ ɛnzonlɛ bɛdie me nloa edwɛkɛ!

² Mebabuke me nloa meava mrɛlɛbulɛ meaha bɛ mɔmoane awozinli nu edwɛkɛ,

³edwɛkɛ mɔɔ yɛde na yɛze, yɛ nlenya mɔ a ɛha ɛhile yɛ a.

⁴Yɛnrɛva yɛnrɛvea bɛ nlɔnra, yɛbaha yɛahile awolɛndoazo mɔɔ bara la. Ɛdɛnkɛma lile gyima mgbole, ɔlɛ tumi, yɛɛ ɔyɛle nwanwane ninyɛne dɔɔnwo.

⁵Ɔvale ye ngyehyɛlɛ ɔmanle Gyekɔbo abo zo amra, na ɔlile mɛla ɔmanle Yizilayɛma, ɔzele yɛ nlenya mɔ kɛ bɛhilehile bɛ mra;

⁶amaa awolɛndoazo bieko anu amra nee bɛdabɛ mɔɔ bɛtɛwole bɛ la anwu ye, na bɛdabɛ bɛaha bɛahile bɛ mra;

⁷amaa bɛanyia Nyamenle nu anyelazo, amaa bɛ rɛle anvi Nyamenle gyima ne mɔ, na bɛali ye mɛla ne mɔ azo;

⁸amaa bɛanyɛ kɛ bɛ nlenya mɔ, bɛanyɛ awolɛndoazo atuadelɛma nee anzosesebɛ; awolɛndoazo mɔɔ ɛnnea ɛleka ko, mɔɔ ɛnli nɔhalɛ ɛmmaa Nyamenle la.

⁹Yifelaemma vale ɛda, noko konle kenle ne, bɛguale ɛbɔ nu.

¹⁰Bɛanli Nyamenle ngyekyeleɛ ne azo, na bɛkpole kɛ bɛnrɛlua ye mɛla adenle ne anu.

¹¹Bɛ rɛle vile mɔɔ yeyɛ, nee nwanwane ninyɛne mɔɔ yeyɛ yehile bɛ la.

¹² Ɔyɛle nwanwane ninyɛne ɔhilele bɛ nlenya mɔ wɔ Zowan fienemgbole nu, wɔ Yigyibiti azɛlɛ zo.

¹³ Ɔkpakyele nyevile ne anu nwiɔ ɔmanle bɛzenle, ɔmanle azule ne dwazole bolonwonwo yɛle kɛ bane.

¹⁴ Alehyenlɛ nu ɔyɛle amungu ɔlile bɛ nyunlu, aledwolɛ nu ɔyɛle senle guaanye.

¹⁵ Ɔkpukele bodane wɔ fienemgbole ne anu na ɔmanle bɛ nzule dɔɔnwo kɛ buma nu nzule la bɛnlonle.

¹⁶Ɔmanle azudenle vi bodane nu zenzenle, na ɔmanle nzule ne zenle kɛ azule.

¹⁷Noko bɛyɛle ɛtane dɔɔnwo bɛtiale ye, bɛdele Anwuma Anwumanli ne anwo atua wɔ ɛsɛlɛ ne azo.

¹⁸ Bɛ ahonle nu, bɛzɔle Nyamenle bɛnleanle, na bɛbizale aleɛ mɔɔ bɛdabɛ bɛkulo la.

¹⁹Bɛdendɛle bɛtiale Nyamenle bɛhanle kɛ, “Asoo Nyamenle kɛhola kɛmaa yɛ aleɛ wɔ ɛsɛlɛ ye azo?

²⁰Ɔbɔle bolɛ ne ɔmanle nzule vi nu vindele, na azudenle yile bule aze. Asoo eza ɔkɛhola ɔkɛmaa yɛ aleɛ, anzɛɛ ɔkɛmaa ye menli ne nane bɛkɛli?”

²¹Yemɔti mɔɔ Ɛdɛnkɛma dele la, ɔvale ɛya kpole, ye ɛya ne zɔle kɛ senle tiale Gyekɔbo abo zo amra ne, ye ɛya ne yɛle kpole wɔ Yizilayɛma anwo zo;

²²ɔboalekɛ bɛnlɛ diedi wɔ Nyamenle anu, yɛɛ bɛanva bɛ rɛle bɛanwula ye ngoanelielɛ tumi ne anu.

²³Na ɔdendɛle ɔhilele anwomanyunlu, na ɔbukele anwuma nlenkɛ ne mɔ;

²⁴ ɔmanle mana dɔle kɛ ezule ɔmanle bɛ; na ɔmanle bɛ anwuma aleɛ bɛlile.

²⁵Menli lile anwuma soanvolɛma aleɛ; ɔmanle aleɛ bule bɛ nwo zo.

²⁶Ɔmanle aduduleɛ anwoma bɔle anwuma lɔ, na ɔvale ye tumi ne ɔhwenle nyiakɛ anwoma ne ɔhɔle.

²⁷Ɔmanle nane bule bɛ nwo zo kɛ munlutu, nloma yɛle dɔɔnwo kɛ ɛnweazo anwea.

²⁸Ɔmanle bɛtetele bɛguale bɛ azokoɛleɛ ɛkɛ ne, ɛleka mɔɔ bɛde la yɛle totɔɔ.

²⁹Bɛlile na bɛ ko yile, ɔboalekɛ ɔmanle bɛ mɔɔ bɛkpondɛ la.

³⁰Noko mɔɔ bɛ atiakunluwɔzo ne kaye, mɔɔ ɛnee bɛtɛwiele aleɛ ne di la,

³¹Nyamenle vale bɛ nwo ɛya, na ɔhunle bɛ nuhua mɔɔ anwo yɛ se kpalɛ la, na ɔmanle Yizilayɛ ɛlɔnema anwo hanle aze.

³²Noko ɛhye mɔ amuala anzi, bɛhɔle zo bɛyɛle ɛtane; ye nwanwane nyɛleɛ ne mɔ anzi, bɛanlie bɛanli.

³³Yemɔti ɔmanle bɛ mekɛ zenle waa kɛ ɛnwomenle, na ɔpɛle bɛ ngoane sinli ɛzulolɛ nu.

³⁴Ɔhunle bɛ la, bɛkpondɛle ɔ bo zo; bɛnlunle bɛ nwo na bɛkpondɛle Nyamenle ɛsesebɛ.

³⁵Bɛhakyele kɛ Nyamenle le bɛ bodane, Anwuma Anwuma Nyamenle ne le bɛ dievolɛ.

³⁶Noko bɛvale bɛ nloa bɛbɔle awuye ala; bɛbɔle adalɛ, bɛ nee ye lile amanie.

³⁷Bɛanva bɛ ahonle bɛammaa ye; bɛanli nɔhalɛ wɔ ye ngyekyeleɛ ne anwo.

³⁸Noko yemɔ, kɛmɔ ɔse anwunvɔne la ati, ɔvale bɛ ɛtane ɔhyɛle bɛ, yɛanzɛkye bɛ; mekɛ dɔɔnwo ɔmenle ye ɛya ne, yeanva ye ɛya ne amuala yeangua bɛ nwo zo.

³⁹Ɔhakyele kɛ bɛle nwonane ala, bɛle kɛ anwoma mɔɔ se na ɔnzia ko la.

⁴⁰Bɛdele ɔ nwo atua dɔɔnwo wɔ fienemgbole ne anu, bɛmanle ɔlile nyane wɔ ɛsɛlɛ ne azo.

⁴¹Bɛzɔle ye bɛnleanle fane dɔɔnwo, na bɛhanle Yizilayɛ Nwuanzanwuanza Ko ne ɛya.

⁴²Bɛanva ye tumi ne anzɛɛ kenle ne mɔɔ ɔyele bɛ ɔvile bɛ agbɔvolɛ asa nu la bɛangɔ adwenle nu bɔbɔ,

⁴³na yeayɛ ye nwanwane sɛkɛlɛneɛ mɔɔ ɔyɛle wɔ Yigyibiti, anzɛɛ nwanwane ninyɛne mɔɔ ɔyɛle wɔ Zowan fienemgbole nu la.

⁴⁴ Ɔhakyile bɛ azule ne mɔ mogya, mɔɔ ɛnee bɛngola nuhua nzule no a.

⁴⁵ Ɔyele nrɛzenra adɔka ɔmanle bɛgyegyele bɛ, ahɛlɛne ɔmanle bɛzɛkyele bɛ azɛlɛ ne.

⁴⁶ Ɔmanle nyangomango lile bɛ ɛbɔ nu aleɛ, ɔmanle abɛbɛ lile bɛ egyinli nu aleɛ.

⁴⁷ Ɔvale ezuawolɛ ɔzɛkyele bɛ vanye egyinli, na ɔvale nzulemungu ɔzɛkyele bɛ sekamɔ mbaka.

⁴⁸Ɔdɔle ezuawolɛ ɔhunle bɛ nlankɛ, yɛɛ ɛsɛnlɛmanye pepenle bɛ mboane nwo zo hunle bɛ.

⁴⁹Ɔgyakyile ye ɛya ne anu ɔguale bɛ nwo zo, ɔvale ɛya, abodelɛ, yɛɛ nyane ɔ rale bɛ nwo zo kɛ anwuma soanvolɛma la ɔrazɛkyele bɛ.

⁵⁰Ɔkpakyele adenle ɔmanle ye ɛya ne; yeanlie biala yeanvi ewule nu, na ɔmanle ewule nzane hunle bɛ muala.

⁵¹ Ɔhunle Yigyibiti belamunli mralɛ mrenya kɔsɔɔti, Ham awuke biala anu nyianle ye ɛdeɛ.

⁵² Akee ɔhanle ye menli ne kɛ mboane na ɔlile bɛ nyunlu, na ɔwowale bɛ wɔ fienemgbole ne anu.

⁵³ Ɔbɔle bɛ nwo bane, yemɔti bɛanzulo; na nyevile ne bule vale bɛ kpɔvolɛma ne anwo zo.

⁵⁴ Ɔvale bɛ ɔrale ye azɛlɛ nwuanzanwuanza ne azo, awoka ne mɔ mɔɔ yeva ye tumi yelie la anu.

⁵⁵ Ɔvoanle maanle maanle ɔvile bɛ nye zo; ɔhyɛle azɛlɛ ne ɔmanle bɛvale bɛyɛle bɛ ɛdeɛ, na ɔmanle Yizilayɛma dɛnlanle bɛ azua ne mɔ anu.

⁵⁶ Noko bɛzɔle Anwuma Anwuma Nyamenle ne bɛnleanle, na bɛdele ɔ nwo atua; bɛanli ye mɛla ne mɔ azo.

⁵⁷Bɛkpole ye na bɛyɛle ngunzi kɛ bɛ nlenya mɔ; bɛhyibale bɛ nwo kɛ ɛdabaka kyealera.

⁵⁸Bɛvale bɛ ɛleka mɔɔ bɛsonle la bɛhanle ye ɛya; bɛvale bɛ ananze mɔɔ bɛguale la bɛfutule ye ahonle.

⁵⁹Nyamenle nwunle ye la, ɔvale ɛya kpole, na ɔkpole Yizilayɛma bɔkɔɔ.

⁶⁰ Ɔkpole ye tɛnlabelɛ ne mɔɔ wɔ Hyaelo, ɛleka mɔɔ ɔdɛnlanle ye menli ne avinli la.

⁶¹ Ɔmanle bɛhyele ye tumi ne nuokɛ, ɔyele ye anyunlunyia ɔwulale kpɔvolɛma ne asa anu.

⁶²Ɔmanle bɛhunle ye menli ne, na ɔkpule ye ɛya ne ɔguale bɛ nwo zo.

⁶³Bɛ mgbavolɛ ne mɔ hale esike nu, yɛɛ bɛ mbɛlɛra ne mɔ annyia agyalɛ angɔ.

⁶⁴Bɛ sɛlɛvolɛma dɔle dadeɛ nloa, yɛɛ bɛ ahunlanvolɛ angola awolɛ ye.

⁶⁵Akee Awulae dwazole kɛ asɛɛ ɔvi nafelɛ nu, na ɔlɛtea kɛ katakyie mɔɔ nza wɔ ɔ nye zo la.

⁶⁶Ɔmanle ye kpɔvolɛma guale ɛbɔ nu, na ɔguale bɛ nyunlu aze kpɔtɔɔ.

⁶⁷Ɔkpole Dwosefi awuke nu amra, yeanva Yifelaem abusua ekpunli ne;

⁶⁸ɔnleanle nu ɔyele Dwuda abusua ekpunli ne, Zayɔn Boka mɔɔ ɔkulo ye somaa la.

⁶⁹Ɔzile ye Ɛleka Nwuanzanwuanza ne kɛ ye sua nu mɔɔ wɔ anwuma la; ɔzile ye kpundii kɛ azɛlɛ ye mɔɔ yebɔ, na ɔla ɛkɛ ne dahuu la.

⁷⁰ Ɔnleanle nu ɔyele ye sonvolɛ Devidi, ɔyele ye ɔvile mboane zo ɛnleanlɛ,

⁷¹ɔmanle ɔgyakyile mboane mralɛ ɛnleanlɛ, na ɔ nee ye rale kɛ ɔranlea ye menli Gyekɔbo abo zo amra, Yizilayɛma mɔɔ le ye agyadeɛ la.

⁷²Ɔvale ahonle kpalɛ ɔnleanle bɛ, na ɔvale nrɛlɛbɛ kpole ɔzinzale bɛ.