Read Nzema Edw 79 Bible Online

Edw 79 - Nzema bible

Edw 79

¹ O Nyamenle, menli mɔɔ ɛnzonle wɔ la ɛrawolo wɔ agyadeɛ ye anu, bɛgua wɔ Ɛzonlenlɛ Sua nwuanzanwuanza ne anwo evinli; bɛbɔ Gyɛlusalɛm bɔkɔbɔkɔ.

²Bɛva wɔ sonvolɛma ne mɔ avunli bɛmaa anwomanyunlu nloma kɛ bɛli, bɛva wɔ menli ne nwonane bɛmaa azɛlɛ ye azo nanemgbole.

³Bɛhwi bɛ mogya bɛgua kɛ nzule, bɛkponde ye Gyɛlusalɛm amuala, yɛɛ awie ɛnle ɛkɛ na yeazie bɛ.

⁴Maanle maanle mɔɔ ɛbɔ ɛyia yɛ la bɔ yɛ aholoba, bɛsi yɛ amgbu na bɛsele yɛ.

⁵O Ɛdɛnkɛma, na kenlenzu? Asoo ɛfa ɛya mɔɔ ɛnrɛgyakyi ɛlɛ? Asoo ɛmaa wɔ ɛya kpole ne azɔ kɛ senle?

⁶Wola wɔ ɛya ne gua maanle maanle mɔɔ ɛnze wɔ, nee arelemgbunli maanle mɔɔ ɛnzonle wɔ la anwo zo.

⁷Ɔluakɛ bɛhu Yizilayɛma amuala, na bɛmaa bɛ tɛnlabelɛ ɛdɔ mgbane.

⁸Mmatea yɛ wɔ yɛ nlenya mɔ ɛtane ne mɔ ati; maa wɔ anwunvɔnezelɛ ne ɛrɛla yɛ nwo zo ndɛndɛ, ɔluakɛ yɛ anyelazo ɛwie.

⁹O yɛ ngoanelielɛ Nyamenle, boa yɛ, wɔ wɔ duma ne anyunlunyia ti; fa yɛ ɛtane ne mɔ kyɛ yɛ na die yɛ, wɔ wɔ duma ne ati.

¹⁰Duzu ati yɛɛ ɔwɔ kɛ maanle maanle ka kɛ, “Bɛ Nyamenle ne wɔ nienwu?” a. Maa wɔ sonvolɛma mɔɔ bɛha bɛ mogya bɛgua la anwo nzenralɛ ɛrɛla maanle maanle ne mɔ anwo zo wɔ yɛdayɛ yɛ nye zo.

¹¹Maa bɛdabɛ mɔɔ bɛhye bɛ nuokɛ la ɛzunlɛ ɛdwu ɛ nyunlu; fa wɔ tumi kpole ne die bɛdabɛ mɔɔ bɛkahu bɛ la.

¹²O Awulae, maanle maanle mɔɔ ɛbɔ wɔ aholoba la, kile bɛdabɛ abodelɛ mɔnwo fane nsuu.

¹³Na wɔ menli, wɔ adidileka mboane, yɛbayɛ wɔ mo dahuu; ɔvi awolɛndoazo kɔdwu awolɛndoazo, yɛbaye wɔ ayɛlɛ.