Read Nzema Edw 80 Bible Online

Edw 80 - Nzema bible

Edw 80

¹ O Yizilayɛma anwo zo neavolɛ, tie yɛ, wɔmɔ, ɛhanle Dwosefi abo zo amra kɛ mboane na ɛlile bɛ nyunlu. Wɔmɔ mɔɔ wɔ belemgbunli ebia gyi tease abɔdeɛma azo a, ta bɛla,

²maa Yifelaem, Bɛngyaman, yɛɛ Manasɛ ɛnwu ye. Kile wɔ tumi ne, na balie yɛ!

³O Nyamenle, fa yɛ sie yɛ gyinlabelɛ dɛba ne; kile wɔ anwunvɔnezelɛ ne yɛ nwo zo, amaa yɛanyia ngoane.

⁴O Tumivolɛ Ɛdɛnkɛma Nyamenle, ɛfa wɔ menli ne nzɛlɛlɛ nwo ɛya wɔahɔdwu kenlenzu?

⁵Wɔmaa bɛ nyane kɛ bɛli kɛ aleɛ, wɔmaa bɛ monle kɛ nzule kɛ bɛnlo bɛmaa ɔde bɛ.

⁶Maanle maanle mɔɔ ɛbɔ ɛyia yɛ la zo konle doa yɛ, yɛɛ yɛ kpɔvolɛma yia nu a bɛsele yɛ.

⁷O Tumivolɛ Nyamenle, fa yɛ sie yɛ gyinlabelɛ dɛba ne; kile wɔ anwunvɔnezelɛ ne yɛ nwo zo, amaa yɛanyia ngoane

⁸Ɛvale vanye baka ɛvile Yigyibiti ɛrale; ɛvoanle maanle maanle ne mɔ na ɛluale.

⁹Ɛzieziele azɛlɛ ne ɛmanle ye; ɔzɔle ndinli ɔhɔle aze kpalɛ na ɔvale azɛlɛ ne.

¹⁰Ye alubo hedale awoka ne mɔ azo, ɔvale ye ngane ɔguale sida mbaka mgbole zo;

¹¹ye ngane dwule Mɛdetɛlenia nyevile nu, ɔdendenle ɔdwule Azule Yufileti ne anloa.

¹²Duzu ati a akee wɔbubu ye bane ne mɔ, na bɛdabɛ mɔɔ bɛfa adenle ne azo la tete ye ma ɛ?

¹³Kɔkɔte vi kpɔkɛ nu batietia zo, yɛɛ ɛbɔ nu debie biala di bie.

¹⁴O Tumivolɛ Nyamenle, kakyi ɛ nye bieko! Wɔ anwuma nehane, to ɛ nye nea, na bu vanye baka ɛhye bie,

¹⁵baka ne mɔɔ ɛvale wɔ tumi ɛluale, ɛnleanle ɛmanle ɔyɛle kpole ɔmanle wɔ la.

¹⁶Bɛpɛ ye bɛdo aze, bɛva senle bɛdo nu; twi bɛ nyunlu na bɔ bɛ bo zo.

¹⁷Fa ɛ sa to sonla ne mɔɔ wɔ wɔ fema zo la anwo zo, sonla ra ne mɔɔ wɔwula ye anwosesebɛ wɔmaa ɛ nwo la!

¹⁸Yɛnrɛhakyi yɛ nzi yɛnrɛzi wɔ bieko; maa yɛ ngoane, na yɛkɛzonle wɔ.

¹⁹O Tumivolɛ Ɛdɛnkɛma, fa yɛ sie yɛ gyinlabelɛ dɛba ne, kile wɔ anwunvɔnezelɛ ne yɛ nwo zo, amaa yɛanyia ngoane.