Read Nzema Edw 81 Bible Online

Edw 81 - Nzema bible

Edw 81

¹Bɛdea nu bɛdo edwɛne bɛmaa Nyamenle yɛ anwosesebɛ ne; bɛva anyelielɛ bɛdea nu bɛmaa Gyekɔbo Nyamenle ne!

²Bɛvɛlɛ edwɛne ne, bɛbɔ akɛya ne, bɛbɔ getaa ngyikyi ne nee mgbole ne mɔ.

³ Siane ne fi fofolɛ a bɛwu aweɛne tendenle ne anu, siane ne yɛ mumua a bɛwu nu bɛli ɛvoyia ne.

⁴Ɔluakɛ ɔle mɛla ɔmaa Yizilayɛma, ɔle Gyekɔbo Nyamenle ne mɛla.

⁵Ɔluale Dwosefi abo zo amra anwo zo ɔyɛle ye mɛla, mekɛ mɔɔ ɔtetale Yigyibitima la. Mete ɛnelɛ bie mɔɔ metɛtele ye ɛlɛ a; ɔse,

⁶“Menyele bɛ kɔme zo adesoa; menliele bɛ ahɛndɛne menvile bɛ sa nu.

⁷ Bɛvɛlɛle me wɔ bɛ anwongyelelɛ nu, na menliele bɛ; mewɔ me feabelɛ wɔ ahumu ne anu la, menliele bɛ zo; menzɔle bɛ meneanle wɔ Mɛleba nzubula ne mɔ azo.

⁸Bɛdie, O me menli, mebɔ bɛ kɔkɔ, O Yizilayɛ, saa bɛkɛdie me angome ɛdeɛ a!

⁹ Ɔnle kɛ bɛnyia nyamenle gyɛne biala bɛ avinli; bɛmmabɔ bɛ ti aze bɛmaa nyamenle gyɛne biala.

¹⁰Medame a mele Ɛdɛnkɛma bɛ Nyamenle ne, mɔɔ yele bɛ vile Yigyibiti azɛlɛ zo rale la. Bɛbuke bɛ nloa kpalɛ, na menwɔmaa bɛ aleɛ.

¹¹“Na me menli ne andie me ne; Yizilayɛma ɛnva me ɛnyɛ ɛhwee.

¹²Yemɔti mengyakyile bɛ memanle bɛdabɛ bɛ anzosesebɛ ne, kɛ bɛdabɛ bɛyɛ mɔɔ bɛkulo la.

¹³O anrɛɛ me menli ne adie me, anrɛɛ Yizilayɛma alua me adenle ne anu!

¹⁴Ɔnrɛhyɛ biala na meali bɛ kpɔvolɛma anwo zo konim, na meava me sa meazie menli mɔɔ kyi bɛ la anwo.

¹⁵Bɛdabɛ mɔɔ bɛkyi Ɛdɛnkɛma la baradane ye, bɛ ndeanlɛ bo ɛnrɛdu ɛlɛ.

¹⁶Mebava hwiiti kpalɛ meadane bɛ, na meamaa bɛ bodane nu wolɛ bɛanlo.”