Read Nzema Edw 83 Bible Online

Edw 83 - Nzema bible

Edw 83

¹O Nyamenle, mmayɛ koonwu; O Nyamenle, mmayɛ kɛnlanana!

²Nea, wɔ kpɔvolɛma ne ɛlɛtu fonyia; bɛdabɛ mɔɔ bɛkyi wɔ la ɛmaa bɛ ti zo.

³Bɛhɔ wɔ menli ne ati akpamo, bɛtu bɛ nwo azukue wɔ menli ne mɔɔ wɔbɔ bɛ nwo bane la ati.

⁴Bɛse, “Bɛrɛla bɛmaa yɛbɔ bɛ maanle ne bɔkɔɔ; amaa bɛangakye duma Yizilayɛ ne bieko ɛlɛ.”

⁵Ɛhɛe, bɛ muala bɛbɔ nu bɛfa adwenle ko, bɛkyekye bɛkye ɔ bo bɛtia wɔ:

⁶Yidɔmma nee Yehyemeeyɛlema, Mowabema nee Hagelaema,

⁷Gibalema, Amɔnoma, nee Amalɛkema, Filisitiama yɛɛ menli mɔɔ wɔ Taya la.

⁸Aseleama noko boka bɛ nwo; bɛmɛ a bɛle Lɔɔto abo zo amra mɔɔ anwo yɛ se kpalɛ a.

⁹ Yɛ bɛ kɛ ɛyɛle Medeanema la, kɛ ɛyɛle Sesɛla nee Gyeeben wɔ Azule Kaehyɔn anloa,

¹⁰mɔɔ bɛzɛkyele bɛ wɔ Ɛndɔ, na bɛ avunli kpɔlɔle azɛlɛ ne azo la.

¹¹ Yɛ bɛ mgbanyima ne mɔ kɛ ɛyɛle Ɔlɛbe nee Ziibi la; na yɛ bɛ arelemgbunli ne mɔ kɛ ɛyɛle Ziba nee Zalemɛna,

¹²mɔɔ hanle kɛ, “Bɛmaa yɛhɔ Nyamenle adidileka ne yɛhɔva ye azɛlɛ ne bie yɛyɛ yɛ ɛdeɛ” la.

¹³O me Nyamenle, maa bɛyɛ kɛ munlutu mɔɔ anwoma ɛlɛbɔ nu la, bɛyɛ kɛ abonle mɔɔ luolua anwoma nu la.

¹⁴Maa bɛyɛ kɛ kpɔkɛ mɔɔ senle la nu la, bɛyɛ kɛ awoka mɔɔ senle ɛdɔ zolɛ la.

¹⁵Zɔhane ala yɛɛ fa wɔ ahumu ne si bɛ zo, na fa ahumu kpole tu bɛ nwo mɔra a.

¹⁶O Ɛdɛnkɛma, maa anyiemgba ɛha bɛ, amaa bɛakpondɛ ɛ bo zo.

¹⁷Maa bɛ nyunlu ɛgua aze, bɛ rɛle ɛbɔ dahuu; maa bɛ bo zo ɛbɔ anyiemgba nu.

¹⁸Maa bɛnwu kɛ ɛdawɔ ɛ ngomekye, mɔɔ wɔ duma a le Ɛdɛnkɛma la a ɛle Anwuma Anwumanli ne mɔɔ sie azɛlɛ ye a.