Read Nzema Edw 84 Bible Online

Edw 84 - Nzema bible

Edw 84

¹O Tumivolɛ Ɛdɛnkɛma, Wɔ tɛnlabelɛ ne le kɛnlɛma!

²Me kunlu a anrɛɛ mewɔ ɛkɛ, me nwo dɔ Ɛdɛnkɛma Ɛzonlenlɛ Sua ne anu. Me ahonle nee me nwonane to edwɛne anyelielɛ nu maa tease Nyamenle ne.

³Ngɛsanloma bɔbɔ lɛ ye sane, yɛɛ nyamenleakatiba lɛ ɔ ti anwo sane mɔɔ ɔfa ɔ mra ɔgua nu, wɔ wɔ azukponle ne anwo, O Tumivolɛ Ɛdɛnkɛma, me Belemgbunli nee me Nyamenle.

⁴Nyilalɛ ɛha bɛdabɛ mɔɔ bɛde wɔ sua nu la, bɛto wɔ ayɛlɛyelɛ edwɛne dahuu.

⁵Nyilalɛ ɛha bɛdabɛ mɔɔ bɛfa bɛ ahonle muala bɛkɔ Zayɔn kɛ bɛkazɛlɛ la.

⁶Bɛlua Beeka Bɔnza ne anu a, bɛmaa ɛkɛ ne yɛ nzubula dɔɔnwo; alumua ezule ne maa nzule gyinlegyinla.

⁷Bɛnyia anwosesebɛ kpole kpalɛ wɔ bɛ ɛhɔlɛ nu; bɛbanwu nyamenle ne mɔ Nyamenle ne wɔ Zayɔn.

⁸O Tumivolɛ Ɛdɛnkɛma Nyamenle, tie me nzɛlɛlɛ; O Gyekɔbo Nyamenle, yɛ ɛnzonlɛ tie me.

⁹O Nyamenle, nea yɛ enyinlike ne; nea sonla ne mɔɔ wɔkpa nu wɔye ye la.

¹⁰Wɔ sua nu ɛkɛ ne kenle ko ɛdɛnlanlɛ le kpalɛ tɛla kenle apenle wɔ ɛleka gyɛne. Menwɔhulo kɛ menwɔyɛ anlenkɛ sinzavolɛ wɔ me Nyamenle ne sua nu tɛla kɛ menwɔdɛnla amumuyɛma ndanlɛ sua nu.

¹¹Ɔluakɛ Ɛdɛnkɛma Nyamenle ne le sɛnzɛne nee enyinlike, ɔdaye a ɔmaa ɛlolɛ nee enililɛ a. Ɛdɛnkɛma ɛnva debie kpalɛ biala ɛnvea bɛdabɛ mɔɔ bɛle tenlenema la.

¹²O Tumivolɛ Ɛdɛnkɛma, nyilalɛ ɛha sonla ne mɔɔ arɛle wɔ wɔ nu la.