Read Nzema Edw 85 Bible Online

Edw 85 - Nzema bible

Edw 85

¹Ɛdɛnkɛma, ɛnwunle wɔ azɛlɛ ne anwunvɔne; ɛmanle Yizilayɛma kpazile bieko.

²Ɛvale wɔ menli ne ɛtane ɛhyɛle bɛ, na ɛmanle bɛnyianle bɛ ti bɔkɔɔ.

³Ɛmenle wɔ ɛya ne amuala; ɛgyakyile ɛya biala mɔɔ ɛvale la.

⁴O yɛ ngoanelielɛ Nyamenle, fa yɛ sie yɛ gyinlabelɛ dɛba ne, na maa ɛ kunlu ɛdwo yɛ nwo.

⁵Asoo ɛfa yɛ nwo ɛya dahuu? Asoo wɔ ɛya ne bawa aha awolɛndoazo muala?

⁶Maa yɛ nwo ɛyɛ se bieko, amaa ɛdawɔ ti wɔ menli ne ali fɛlɛko.

⁷O Ɛdɛnkɛma, kile wɔ ɛhulolɛ kpundii ne yɛ nwo zo, na maa yɛ wɔ ngoanelielɛ ne.

⁸Maa mendie mɔɔ Ɛdɛnkɛma Nyamenle ne baha la, ɔluakɛ ɔbaha anzonudwolɛ edwɛkɛ yeahile ye menli ne, ɔdaye ye menli ne mɔɔ ɛva bɛ ahonle ɛmaa ye la.

⁹Nɔhalɛ, ye ngoanelielɛ ne ɛbikye bɛdabɛ mɔɔ bɛsulo ye la, amaa anyunlunyia aha yɛ maanle ye.

¹⁰Ɛhulolɛ kpundii nee nɔhalɛlilɛ bayia; tenleneyɛlɛ nee anzonudwolɛ bayɛ bɛ nwo atuu.

¹¹Nɔhalɛlilɛ vi aze bafifi, na tenleneyɛlɛ vi anwuma anlea aze.

¹²Ɛhɛe, Ɛdɛnkɛma bava mɔɔ le kpalɛ la amaa, na yɛ azɛlɛ ye bamaa yɛ aleɛ dɔɔnwo.

¹³Tenleneyɛlɛ bali Ɛdɛnkɛma anyunlu, na yeaziezie adenle ne yeamaa ye.