Read Nzema Edw 86 Bible Online

Edw 86 - Nzema bible

Edw 86

¹O Ɛdɛnkɛma, yɛ ɛnzonlɛ tie me, na die me zo, ɔluakɛ meyɛ anwunvɔne yɛɛ mehyia.

²Die me fi ewule nu, ɔluakɛ mesonle wɔ; die wɔ sonvolɛ mɔɔ ɛva ɔ rɛle ɛwula wɔ nu la.

³Wɔmɔ a ɛle me Nyamenle a, O Awulae, nwu me anwunvɔne, ɔluakɛ wɔmɔ yɛɛ mesu mefɛlɛ wɔ alehyenlɛ muala a.

⁴Maa wɔ sonvolɛ ɛli fɛlɛko, ɔluakɛ, O Awulae, wɔmɔ yɛɛ mebodo mesɛlɛ wɔ a.

⁵Ɔluakɛ, O Awulae, ɛle kpalɛ yɛɛ fakyɛ wɔ wɔ afoa, ɛkile wɔ ɛhulolɛ kpundii ne wɔ bɛdabɛ mɔɔ bɛsu bɛfɛlɛ wɔ la anwo zo.

⁶O Ɛdɛnkɛma, tie me nzɛlɛlɛ; tie me modolɛ nzɛlɛlɛ.

⁷Kenle biala mekɔ ngyegyelɛ nu a mesu mefɛlɛ wɔ, ɔboalekɛ mefɛlɛ wɔ a ɛdie me zo.

⁸O Awulae, nyamenle biala nee wɔ ɛnzɛ, yɛɛ gyima biala ɛndɛla wɔ gyima ne mɔ.

⁹ Maanle maanle kɔsɔɔti mɔɔ wɔbɔ bɛ la babɔ bɛ ti aze amaa wɔ, O Awulae, na bɛaye wɔ duma ne ayɛlɛ.

¹⁰Ɔluakɛ ɛle kpole yɛɛ ɛyɛ nwanwane ninyɛne, ɛ ngomekye ala yɛɛ ɛle Nyamenle a.

¹¹O Ɛdɛnkɛma, kilehile me wɔ adenle ne, amaa mealua wɔ nɔhalɛ adenle ne anu; fa me ahonle beta ɛ nwo maa ɔzulo wɔ.

¹²O Awulae me Nyamenle, mefa me ahonle muala meyɛ wɔ mo, yɛɛ mebaye wɔ duma ne ayɛlɛ dahuu.

¹³Ɔluakɛ wɔ ɛhulolɛ kpundii ne mɔɔ ɛlɛ ye me nwo la le kpole; wɔye me ɛkɛla wɔvi Ɛbolɔ

¹⁴O Nyamenle, adubɛnwoma ɛdwazo me nwo zo; menli amgbamgbanvolɛ kpondɛ ahu me, bɛndwenle ɛ nwo bɔbɔ.

¹⁵Na wɔmɔ, O Awulae, ɛle ɛlolɛ nee anwunvɔnezelɛ Nyamenle, ɛnva ɛya mgbane mgbane, yɛɛ ɛhulolɛ kpundii nee nɔhalɛlilɛ ɛyi wɔ tɛkɛɛ.

¹⁶Kakyi ɛ nye me nwo zo na nwu me anwunvɔne; fa wɔ anwosesebɛ ne maa wɔ akɛlɛ, na die wɔ sonvolɛ raalɛ ne ara nrenya ye.

¹⁷Kile me wɔ kpalɛyɛlɛ ne anwo sɛkɛlɛneɛ, amaa menli mɔɔ kyi me la anwu ye na bɛ nyunlu agua aze, ɔboalekɛ wɔmɔ, Ɛdɛnkɛma, wɔboa me na wɔkyekye me rɛle.