Read Nzema Edw 88 Bible Online

Edw 88 - Nzema bible

Edw 88

¹O Ɛdɛnkɛma, me Nyamenle, alehyenlɛ nu mefɛlɛ wɔ kɛ ɛboa me; aledwolɛ nu noko mesu mefɛlɛ wɔ.

²Maa me nzɛlɛlɛ ɛdwu ɛ nyunlu, yɛ ɛnzonlɛ tie me ɛzunlɛ.

³Edwɛkɛ dɔɔnwo ɛdo me, me ngoane ɛbikye Ɛbolɔ.

⁴Bɛtia me bɛboka bɛdabɛ mɔɔ bɛ nye gyi Ewule Kuma nu la; mele sonla mɔɔ menlɛ anwosesebɛ.

⁵Mele kɛ sonla mɔɔ ɛwu na bɛ rɛle ɛvi ye, mele kɛ sonla mɔɔ bɛhu ye bɛzie ye, mele kɛ bɛdabɛ mɔɔ ɛngakye bɛ bieko, na bɛye bɛ bɛvi wɔ tumi bo la.

⁶Wɔva me wɔdo Ewule Kuma ne abo lɔ, ɛleka anu kuloonwu anu awozinli ne anu.

⁷Wɔ ɛya ne wɔ me nwo zo kpole kpalɛ, na ye azɛlɛkye ɛbu ɛva me nwo zo.

⁸Wɔmaa me gɔnwo mɔ ɛkpo me; wɔmaa me nwo ɛha bɛ ɛzulolɛ. Meha avinli, mengola menvi ɛsalɛ;

⁹nyane ngome ɛbɔ me nye. O Ɛdɛnkɛma, alehyenlɛ biala mesu mefɛlɛ wɔ; na memaa me sa zo mesɛlɛ wɔ.

¹⁰Asoo ɛyɛ nwanwane ninyɛne ɛmaa mɔwuamra? Asoo bɛ nwomenle dwazo ye wɔ ayɛlɛ?

¹¹Asoo bɛka wɔ ɛhulolɛ kpundii ne anwo edwɛkɛ wɔ ɛbolɔ, anzɛɛ bɛka wɔ nɔhalɛlilɛ ne anwo edwɛkɛ wɔ Abadɔn?[55]

¹²Asoo bɛnwu wɔ nwanwane ninyɛne ne mɔ awozinli nu, anzɛɛ bɛka wɔ ngoanelielɛ moalɛ ne anwo edwɛkɛ wɔ bɛdabɛ mɔɔ bɛ rɛle ɛvi bɛ la maanle nu?

¹³Na mame, O Ɛdɛnkɛma, mesu mefɛlɛ wɔ; me nzɛlɛlɛ dwu ɛ nyunlu nwonlomɔ biala.

¹⁴O Ɛdɛnkɛma, duzu ati yɛɛ wɔkpo me a? Duzu ati a wɔva ɛ nye wɔvea me a?

¹⁵Ɔvi me ngakula nu, menwu amaneɛ toonwo asɛɛ mewu bɔbɔ, wɔ ndeanlɛ ne mɔ ɛmaa mewie debie yɛ.

¹⁶Wɔ ɛya ne ɛbo me nwo zo; wɔ ɛtetalɛ ɛzulolɛ ne bo me nwo zo.

¹⁷Alehyenlɛ biala bɛbɔ bɛyia me kɛ azuyilɛ; bɛbɔ nu bɛba me nwo zo.

¹⁸Wɔmaa kulovolɛ nee agɔnwolɛ ɛkpo me; me manivolɛ ala a le awozinli.