Read Nzema Edw 89 Bible Online

Edw 89 - Nzema bible

Edw 89

¹O Ɛdɛnkɛma, mebado wɔ ɛhulolɛ kpundii ne anwo edwɛne dahuu; mebabɔ wɔ nɔhalɛlilɛ ne nolo meahile awolɛndoazo kɔsɔɔti.

²Ɔluakɛ wɔ ɛhulolɛ kpundii ne wɔ ɛkɛ ne dahuu, wɔ nɔhalɛlilɛ ne gyi kpundii kɛ anwumaneamra.

³Ɛdawɔ wɔha kɛ, “Me nee me sonla ne mɔɔ mekpa nu meye ye la ɛyɛ ngyekyeleɛ, mebɔ me sonvolɛ Devidi ɛwɔkɛ kɛ,

⁴ ‘Mebamaa ɛ bo zo amra ali belemgbunli dahuu, na meabɔ wɔ belemgbunlililɛ ne anwo bane wɔ awolɛndoazo muala anu!’ ”

⁵O Ɛdɛnkɛma, maa anwumaneamra ɛye wɔ nwanwaneyɛlɛ ne nee wɔ nɔhalɛlilɛ ne ayɛlɛ wɔ nwuanzanwuanzama avinli.

⁶Nwane a wɔ anwuma lɔ mɔɔ nee Ɛdɛnkɛma sɛ a? Nwane a wɔ anwuma amra anu mɔɔ nee Ɛdɛnkɛma sɛ a?

⁷Ɔle Nyamenle mɔɔ nwuanzanwuanzama ayia ne sulo ye a; ɔle kpole, ɔ nwo yɛ ɛzulolɛ tɛla bɛdabɛ mɔɔ bɛbɔ bɛyia ye la.

⁸O Tumivolɛ Ɛdɛnkɛma Nyamenle, O Ɛdɛnkɛma, nwane a le tumivolɛ kɛ ɛdawɔ, mɔɔ nɔhalɛlilɛ ɛbɔ ɛyia wɔ a?

⁹Ɛlɛ tumi wɔ nyevile nwo zo; saa ye azɛlɛkye yɛ begyebegye a ɛmaa bɛgua.

¹⁰Ɛbubule nane anwo ɛzulolɛ Releehabe,[56] kɛ debie funli bie, ɛvale wɔ tumi kpole ne ɛbɔle wɔ kpɔvolɛma asande.

¹¹Anwuma le wɔ ɛdeɛ, azɛlɛ ye noko le wɔ ɛdeɛ; ewiade nee nuhua ninyɛne muala, ɛdawɔ a ɛbɔle a.

¹²Ɛdawɔ yɛɛ ɛbɔle sɔlɔ nee nyiakɛ a; Teebɔ Boka nee Hɛmɔn Boka fa anyelielɛ ye wɔ ayɛlɛ.

¹³Ɛlɛ tumi kpole; ɛ nwo yɛ se, wɔ tumi le kpole.

¹⁴Tenleneyɛlɛ nee pɛlepɛlelilɛ le wɔ belemgbunli ebia ne adiabo; ɛhulolɛ kpundii nee nɔhalɛlilɛ a gyi ɛ nyunlu a.

¹⁵O Ɛdɛnkɛma, nyilalɛ ɛha bɛdabɛ mɔɔ bɛfa edwɛndolɛ bɛtea nu bɛfɛlɛ wɔ, nee bɛdabɛ mɔɔ bɛdua wɔ ahunlunyele wienyi ne anu la.

¹⁶Nyilalɛ ɛha bɛdabɛ mɔɔ bɛfa wɔ duma ne bɛtu bɛ nwo, na bɛyeyɛ wɔ tenleneyɛlɛ ne la.

¹⁷Ɔluakɛ wɔmɔ a ɛle bɛ anwosesebɛ a; wɔ moalɛ zo yɛɛ ɛmaa bɛdi konim a.

¹⁸O Ɛdɛnkɛma, ɛdawɔ a ɛyele yɛ pepɛdievolɛ ne ɛmanle yɛ a. Yizilayɛ Nwuanzanwuanza Ko ne a manle yɛ yɛ belemgbunli ne a.

¹⁹Mɔmoane, ɛdendɛle ɛnyelɛzodeɛnwunlɛ nu ɛhilele wɔ nɔhalɛ sonvolɛ ne na ɛhanle kɛ, “Mezoa sonla mɔɔ le katakyie la belemgbunli kyɛlɛ, memaa sonla mɔɔ bɛkpa nu bɛye ye menli ne avinli la ɛyɛ kpole.

²⁰ Menwu me sonvolɛ Devidi; meva me nwole nwuanzanwuanza ne mekpokpa ye;

²¹amaa me tumi ne awoa ye nu dahuu, na yeamaa ye anwosesebɛ.

²²Kpɔvolɛ ne ɛnrɛhola ɔ nye zo ta ɛlɛ, amumuyɛnli ɛnrɛhola ɔ nwo zo konim di.

²³Mebabubu ye kpɔvolɛma wɔ ɔ nyunlu, na meabɔ bɛdabɛ mɔɔ bɛkyi ye la meagua.

²⁴Me nɔhalɛlilɛ ne nee me ɛhulolɛ kpundii ne nee ye badɛnla, na me duma nu yɛɛ ye tumi ne bayɛ kpole a.

²⁵Mebamaa yeanyia nyevile nwo zo tumi, na yeanyia azule muala anwo zo tumi.

²⁶Ɔbazu yeavɛlɛ me kɛ, ‘Wɔmɔ a ɛle me Ze a; ɛle me Nyamenle nee me ngoanelielɛ Bodane.’

²⁷ Na mebayɛ ye me ra mɔɔ lumua, mɔɔ le belemgbunli mɔɔ bo arelemgbunli muala anwo azo wɔ azɛlɛ ye azo a.

²⁸Mebahile me ɛhulolɛ kpundii ne ɔ nwo zo dahuu, yɛɛ me ngyekyeleɛ ne bagyinla ɛkɛ ne kpundii amaa ye.

²⁹Mebamaa ye abusua ɛlɔnwɔne ne adɛnla ɛkɛ dahuu, na ye belemgbunlililɛ adɛnla ɛkɛ ne dahuu kɛ anwumaneamra

³⁰“Na saa ɔ bo zo amra kpo me mɛla ne na bɛanli me ngyehyɛlɛ ne mɔ azo,

³¹saa bɛtietia me mɛla ne mɔ azo, na bɛanli me mɛla ne mɔ azo a,

³²mebava baka meadua bɛ kakɛ wɔ bɛ mɛladonlɛ ti, na meava empele meabila bɛ wɔ bɛ ɛtane ti.

³³Noko menrɛye me ɛhulolɛ kpundii ne ɔ nwo zo, yɛɛ mebali nɔhalɛ meamaa ye dahuu.

³⁴Menrɛtulu me ngyekyeleɛ ne, yɛɛ menrɛhakyi edwɛkɛ mɔɔ vi me nloa anu vindele la.

³⁵“Meva me nwuanzanwuanzayɛlɛ ne mebɔ ɛwɔkɛ; menrɛbɛlɛbɛla Devidi.

³⁶Ɔ bo zo amra bali belemgbunli dahuu, ye belemgbunlililɛ bagyinla zo kɛ sɛnzɛne wɔ me nyunlu.

³⁷Ɔbayɛ kɛ siane la yeadɛnla ɛkɛ dahuu; suzuamgba ala mɔɔ anwomanyunlu wɔ ɛkɛ ne la, ɔbagyinla ɛkɛ dahuu.”

³⁸Noko wɔva wɔ belemgbunli ne mɔɔ wɔkpa nu wɔye ye la anwo ɛya, wɔkpo ye na wɔvuandi ye wɔdo.

³⁹Wɔtulu ngyekyeleɛ ne mɔɔ ɛ nee wɔ sonvolɛ kyekyele la; wɔdu ye belemgbunli kyɛlɛ ne wɔdo ndɛtɛlɛ nu.

⁴⁰Wɔbubu ɔ nwo bane kɔsɔɔti wɔgua; wɔgologolo ye aranemgbole ne mɔ wɔgua.

⁴¹Bɛdabɛ mɔɔ bɛse ɛkɛ ne la amuala wua ye; ye agɔnwolɛma muala sele ye.

⁴²Wɔmaa ye kpɔvolɛma ɛli konim; wɔmaa ye kpɔvolɛma anye ɛlie.

⁴³Ɛhɛe, wɔmaa ye konle dadeɛ ɛtili, wɔammaa yeangola konle ne anloa gyinla.

⁴⁴Wɔlie ye belemgbunli tumi ne ɔ sa nu, wɔvuandi ye belemgbunli ebia ne wɔdo aze.

⁴⁵Wɔpɛ ye kpavolɛlilɛ zo; wɔgua ɔ nyunlu aze.

⁴⁶O Ɛdɛnkɛma, kenlenzu? Asoo ɛfa ɛ nye wɔavea yɛ dahuu? Wɔ ɛya ne sɔ kɛ senle la ahɔdwu kenlenzu?

⁴⁷O Awulae, kakye kɛ ngoane tendenle si de la, ɔluakɛ menli mɔɔ wɔbɔ bɛ la kɔsɔɔti bawu.

⁴⁸Sonla boni a badɛnla aze dahuu na ɔnrɛwu ɛlɛ a? Nwane a kɛhola kɛlie ye ɛkɛla kɛvi Ɛbolɔ a?

⁴⁹Awulae, wɔ mɔmoane ɛhulolɛ kpundii ne, mɔɔ ɛluale zo ɛbɔle Devidi nɔhalɛ ɛwɔkɛ ne la wɔ nienwu?

⁵⁰O Awulae, kakye kɛ bɛsi bɛbu wɔ sonvolɛ ne sonlamgbane la; wɔ menli ne anwo ndeanlɛ kɔsɔɔti gua me nwo zo.

⁵¹O Ɛdɛnkɛma, yemɔ ala ati, wɔ kpɔvolɛma sele, bɛgolo wɔ belemgbunli ne mɔɔ wɔkpa nu wɔye ye la anwo wɔ ɔ gyakɛ biala mɔɔ ɔtu la anwo.

⁵²Ayɛlɛyelɛ ɛha Ɛdɛnkɛma dahuu! Amen, Amen!