Read Nzema Edw 9 Bible Online

Edw 9 - Nzema bible

Edw 9

¹[5] Mebava me ahonle muala meayɛ Ɛdɛnkɛma mo; na meaha nwanwane gyima mɔɔ wɔyɛ la amuala.

²Wɔmɔ ɛ ti, mebava fɛlɛkolilɛ meadu me nwo, O Anwuma Anwumanli, mebado edwɛne meaye wɔ duma ayɛlɛ.

³Mɔɔ me kpɔvolɛma ziale bɛ nzi rale la, bɛdule koti na bɛ bo zo minlinle wɔ ɛ nyunlu.

⁴Ɔluakɛ wɔbua me benle; wɔbua wɔ ndɛne ne pɛlepɛle nu.

⁵Wɔdea maanle maanle mɔɔ ɛnze Nyamenle la, wɔzɛkye amumuyɛma; wɔminliminli bɛ duma ne abo zo bɔkɔɔ.

⁶Kpɔvolɛma ne abo zo ɛbɔ bɔkɔɔ; wɔbɔ bɛ azuamgbole ne mɔ; awie ɛngakye bɛ bieko.

⁷Noko Ɛdɛnkɛma le belemgbunli dahuu, yeziezie ye belemgbunli ebia ne kɛ ɔbua ndɛne.

⁸Ɔfa pɛlepɛlelilɛ ɔbua ewiade amra ndɛne; ɔbua menli ne ndɛne pɛlepɛle nu.

⁹Ɛdɛnkɛma le ɛvealeka maa mɔɔ bɛsisi ye la, ɔle ɛvealeka wɔ ngyegyelɛ mekɛ nu.

¹⁰Menli mɔɔ ze wɔ la fa bɛ rɛle wula wɔ nu, ɔluakɛ, O Ɛdɛnkɛma, ɛtɛkpole menli mɔɔ sonle wɔ la.

¹¹Bɛdo ayɛlɛyelɛ edwɛne bɛmaa Ɛdɛnkɛma mɔɔ wɔ Zayɔn! Bɛbɔ ye gyima ne mɔ nolo bɛhile maanle maanle.

¹²Ɔluakɛ Nyamenle ne mɔɔ di bɛ ti nzenralɛ la arɛle ɛtɛfile bɛ; ɔ rɛle ɛnvi nyanenwunlɛma ɛzunlɛ.

¹³O Ɛdɛnkɛma, nwu me anwunvɔne! Nea mɔɔ menwu ye wɔ bɛdabɛ mɔɔ bɛkyi me la asa anu a. Ye me fi ewule nu,

¹⁴amaa meadwu Gyɛlusalɛm anlenkɛ kpole ne anloa, na meado ayɛlɛyelɛ edwɛne meadia ninyɛne mɔɔ ɛmaa me nye ɛlie la, na me nye alie wɔ ngoanelielɛ ne anwo.

¹⁵Menli mɔɔ ɛnze Nyamenle la ɛzua ɛhane ɛhye bɛ nwo; bɛgua kuma mɔɔ bɛdabɛ bɛvu la anu.

¹⁶Ɛdɛnkɛma ɛhile kɛ ɔsi ɔde la, yebua ndɛne ne; amumuyɛma ɛdo bɛdabɛ mumua ne bɛ ɛhane.

¹⁷Amumuyɛma bawu ahɔ Ɛbolɔ, maanle maanle mɔɔ arɛle fi Nyamenle la, zɔhane ala.

¹⁸Ɔluakɛ Nyamenle arɛle ɛnrɛvi ehyianli dahuu, yɛɛ ehyianli anyelazo ɛnrɛwie ɛlɛ.

¹⁹O Ɛdɛnkɛma, dwazo, mmamaa sonla di ɛ nwo zo konim; maa bɛbua maanle maanle ne mɔ ndɛne wɔ ɛ nyunlu.

²⁰O Ɛdɛnkɛma, ka bɛ ɛzulolɛ! Maa maanle maanle kɔsɔɔti ɛnwu kɛ bɛle menli ala!