Read Nzema Edw 90 Bible Online

Edw 90 - Nzema bible

Edw 90

¹O Ɛdɛnkɛma, wɔmɔ a wɔyɛ yɛ ɛvealeka wɔ awolɛndoazo kɔsɔɔti anu a.

²Mekɛ mɔɔ ɛkabɔ awoka, anzɛɛ azɛlɛ ye nee ewiade ye la, ɔvi tete, mɔɔ kɔdwu mekɛ mɔɔ ɛnlɛ awieleɛ, ɛle Nyamenle.

³Ɛmaa sonla sia kɔ ndɛtɛlɛ nu, na ɛse ye kɛ, “O sonla ra, sia ɛ nzi!”

⁴ Ɔluakɛ ɛvolɛ apenle ko le ɛ nye zo kɛ anoma ala mɔɔ ɛze ɛhɔ, anzɛɛ nɔɔzo dɔnehwele bie mɔɔ ɛze la.

⁵Ɛkpoa menli ɛgua; bɛle kɛ ɛlalɛ, bɛle kɛ mangyee ndile,

⁶nwonlomɔ ɛnee bɛyɛ dudokoo, bɛ nwo yɛ fɛ; nɔsolɛ ɛnee bɛkpa, bɛnwoso.

⁷Ɛfa ɛya a ɛnee ahonle ɛdu; wɔ ahonle futu a ɛnee yɛwie wu bɔkɔɔ.

⁸Yɛ ɛtane ne mɔ amuala gua ɛ nyunlu, yɛ fealera nu ɛtane bɔbɔ ɛ nye gyi nwolɛ.

⁹Ɛfa ɛya a yɛ ngoane pɛ sinli, yɛ mekɛ se kɛ ɛnwomenlegulɛ ko.

¹⁰Yɛ ngoane mekɛ le ɛvolɛ abulasuu, saa anwosesebɛ wɔ nu a, abulatwɛ; noko nuhua le ɛvɛlɛ nee nyane ngome; ɔngyɛ ɛnee bɛpɛ nu, ɛnee yɛminli.

¹¹Nwane a kɛnwu wɔ ɛya ne kpole, anzɛɛ wɔ ahonle futu a ɔnrɛzulo wɔ a?

¹²Yemɔti kilehile yɛ maa yɛnwu yɛ mekɛ, amaa yɛazukoa nrɛlɛbɛ.

¹³O Ɛdɛnkɛma, sia bɛla! Kenlenzu? Nwu wɔ sonvolɛ anwunvɔne.

¹⁴Maa wɔ ɛhulolɛ kpundii ne ɛyi yɛ nwonlomɔ biala, amaa yɛ nye alie na yɛali fɛlɛko yɛ ngoane mekɛ nu.

¹⁵Maa yɛ fɛlɛkolilɛ mekɛ ne ɛwa kɛ yɛ nyanelilɛ mekɛ ne, nee ɛvolɛ dodo mɔɔ yɛnwu amaneɛ la.

¹⁶Maa wɔ sonvolɛ ɛnwu wɔ gyima ne, na ye wɔ tumi kpole ne kile bɛ mra.

¹⁷Maa yɛ Awulae yɛ Nyamenle ne anwunvɔnezelɛ ne ɛrɛla yɛ nwo zo, na maa yɛ sa anloa gyima ɛyɛ kpalɛ ɛmaa yɛ, ɛhɛe, maa yɛ sa anloa gyima ɛyɛ kpalɛ.