Read Nzema Edw 91 Bible Online

Edw 91 - Nzema bible

Edw 91

¹Sonla mɔɔ vea Anwuma Anwumanli ne anu, na ɔde Tumivolɛ ne tumi ne abo la,

²kola ka kɛ, “Ɛdɛnkɛma, ɛle me ɛvealeka nee me aranemgbole; ɛle me Nyamenle mɔɔ me rɛle wɔ wɔ nu a.”

³Ɔluakɛ ɔbaye wɔ yeavi munzuvolɛ ne ɛhane ne nee ewule nyane kɔsɔɔti anu.

⁴Ɔbava ɔ ndɛba yeaheda ɛ nwo zo, ɔ ndɛba abo yɛɛ ɛbavea a; ye nɔhalɛlilɛ ne le enyinlike nee nwowa.

⁵Ɛnrɛzulo nɔɔzo anu ɛzulolɛ ne, anzɛɛ alehyenlɛ nu ɛda ne.

⁶Ɛnrɛzulo nɔɔzo ewule nyane biala, anzɛɛ ewia henlema munzule biala.

⁷Apenle baho adɔ wɔ foa ko, apenle bulu baho adɔ wɔ fema zo, noko ɔnrɛbikye wɔ ɛlɛ.

⁸Ɛ nye ala yɛɛ ɛbava wɔanlea bɛ a, na wɔanwu kɛ bɛsi bɛtea amumuyɛma la.

⁹Kɛmɔ wɔva Ɛdɛnkɛma wɔyɛ wɔ ɛvealeka, na ɛde Anwuma Anwumanli ne nu la,

¹⁰munzule ɛnrɛdo wɔ ɛlɛ, senle ɛnrɛdɔ wɔ sua nu.

¹¹ Ɔluakɛ ɔbamaa ye soanvolɛma anlea ɛ nwo zo, azinza wɔ wɔ ndenle kɔsɔɔti anu.

¹² Bɛbalɛ wɔ bɛ sa zo, amaa ɛ gyakɛ amkpula bolɛ.

¹³ Ɛbatietia awenade nee bɔna nwo zo, ɛbatietia awenade nee nwɔlɛ anwo ɛzulolɛ nwo zo.

¹⁴Kɛmɔ ɔbeta me ɛhulolɛ nu la ati, mebalie ye; mebawowa ye, ɔboalekɛ ɔze me duma.

¹⁵Saa ɔfɛlɛ me a, mebalie ye zo; saa ɔkɔ ngyegyelɛ nu a, mebabikye ye, mebalie ye na meali ye eni.

¹⁶Mebamaa ye ngoane tendenle, na meamaa yeanwu me ngoanelielɛ ne.