Read Nzema Edw 92 Bible Online

Edw 92 - Nzema bible

Edw 92

¹Ɔle kpalɛ kɛ yɛkɛyɛ Ɛdɛnkɛma mo, yɛkɛdo edwɛne yɛkɛye wɔ duma ayɛlɛ, O Anwuma Anwumanli;

²yɛkɛbɔ wɔ ɛhulolɛ kpundii ne nolo nwonlomɔ ne, na aledwolɛ nu yɛkɛha wɔ nɔhalɛlilɛ ne anwo edwɛkɛ;

³wɔ mekɛ mɔɔ bɛlɛbɔ fulutu nee getaa mgbole, na bɛlɛbɔ getaa ngyikyi la.

⁴Ɔluakɛ, O Ɛdɛnkɛma, wɔ gyima ne ɛmaa me nye ɛlie; ɛ sa anloa gyima ne mɔ maa mefa anyelielɛ meto edwɛne.

⁵O Ɛdɛnkɛma, wɔ gyima le mgbole! Wɔ adwenle nu pi!

⁶Sonla mɔɔ ye adwenle andi la ɛnrɛnwu ye, sonla mɔɔ le koasea la ɛnrɛde ɛhye abo:

⁷kɛ amumuyɛma fifi yɛ dudokoo kɛ ndile, yɛɛ ɛtanema kpazi bɔbɔ ɛdeɛ, noko awieleɛ ne bɛbazɛkye bɛ bɔkɔɔ,

⁸na wɔmɔ, Ɛdɛnkɛma, ɛle tumivolɛ dahuu.

⁹Na nea, O Ɛdɛnkɛma, wɔ kpɔvolɛma, wɔ kpɔvolɛma ne amuala abo zo baminli; bɛbabɔ ɛtanema amuala asande.

¹⁰Wɔmaa me anwosesebɛ ɛyɛ kɛ ɛnlankɛ nyinli; wɔkpokpa me nwole fofolɛ.

¹¹Me nye ɛnwu me kpɔvolɛma azedɔlɛ, me nzo ɛde amumuyɛma ɛzunlɛ.

¹²Tenlenema bakpazi kɛ mrɛlɛ, na bɛanyi kɛ Lɛbanɔn sida mbaka.

¹³Bɛlua bɛ wɔ Ɛdɛnkɛma awuke nu, bɛnyi buzubuzu wɔ Nyamenle alienwo ɛkɛ.

¹⁴Bɛyɛ mrelera bɔbɔ a, bɛso ma, dahuu bɛle duhuduhu yɛɛ nzule wɔ bɛ nu,

¹⁵bɛkile kɛ Ɛdɛnkɛma di pɛlepɛle; ɔle me ɛvealeka, yɛɛ ɔnli mɔguazo.