Read Nzema Edw 94 Bible Online

Edw 94 - Nzema bible

Edw 94

¹O Ɛdɛnkɛma, nzenralɛ Nyamenle, wɔmɔ nzenralɛ Nyamenle, kile wɔ tumi!

²O azɛlɛ ye ndɛnebuavolɛ, dwazo; ma mgbanyizonlema ɛnyia bɛ kyɛfoa!

³O Ɛdɛnkɛma, kenlenzu yɛɛ amumuyɛma kɛgyakyi bɛ nwo zo ɛmemalɛ a?

⁴Bɛka mgbole, amumuyɛma ɛhye mɔ, bɛtu bɛ nwo, bɛmemaa bɛ nwo zo.

⁵O Ɛdɛnkɛma, bɛfa atisesebɛ bɛsisi wɔ menli ne, na bɛkile bɛ nyane.

⁶Bɛku ahunlanvolɛ nee adenduvoma, na bɛku mɔɔ ɛnlɛ ɔ ze la;

⁷na bɛaha kɛ, “Ɛdɛnkɛma ɛnnwu ye; Gyekɔbo Nyamenle ne ɛnnwu ɛhwee.”

⁸O menli mɔɔ bɛ adwenle ɛmpi a, bɛde ɔ bo! Ahɔnwɔne, kenlenzu a bɛkɛnwu nrɛlɛbɛ a?

⁹Ahenle mɔɔ bɔle ɛnzonlɛ la, ɛnde edwɛkɛ ɔ? Yemɔ mɔɔ ɔbɔle ɛnyelɛ la, ɛnnwu debie ɔ?

¹⁰Yemɔ mɔɔ ɔtea maanle maanle la, ɛnrɛdea bɛ ɔ? Yemɔ a ɔkilehile menli nrɛlɛbɛ a.

¹¹ Ɛdɛnkɛma ze menli adwenle, ɔze kɛ bɛ adwenle le kɛ ɛnwomenle.

¹²O Ɛdɛnkɛma, nyilalɛ ɛha sonla ne mɔɔ ɛtea ye, na ɛfa wɔ mɛla ne ɛkilehile ye,

¹³kɛ ɛfa wɔazɔ ye wɔ ngyegyelɛ nu, kɔkpula kɛ bɛkɛpɛ amumuyɛnli ne kuma la.

¹⁴Ɔluakɛ Ɛdɛnkɛma arɛle ɛnrɛvi ye menli; ɔnrɛkpo menli ne mɔɔ le ɔdaye ye ɛdeɛ la;

¹⁵ɔluakɛ pɛlepɛlelilɛ bazia ahɔ tenlenema ɛkɛ, na bɛdabɛ mɔɔ bɛle tenlene la bali zolɛ.

¹⁶Nwane a dwazo atia amumuyɛma ne amaa me a? Nwane a gyinla atia ɛtanema amaa me a?

¹⁷Saa Ɛdɛnkɛma amboa me a, anrɛɛ yeangyɛ biala na meahɔ mɔwuamra anu.

¹⁸Mɔɔ mendwenlenle nwo kɛ, “Metele” la, O Ɛdɛnkɛma, wɔ ɛhulolɛ kpundii ne zɔle me.

¹⁹Saa adwenleadwenle bo me nwo zo a, ɛkyekye me rɛle ɛmaa medi fɛlɛko.

²⁰Asoo arelemgbunli atisesebɛ kola nee wɔ yɛ ko, bɛmɛ mɔɔ bɛfa amumuyɛ adwenle a bɛdi bɛ mɛla la?

²¹Bɛbɔ kpɔkɛ bɛtia tenlenema ngoane, na bɛbua mɔɔ ɛnze nwolɛ bie la ewule fɔlɛ.

²²Ɛdɛnkɛma ɛyɛ me aranemgbole; me Nyamenle ne le me ɛvealeka bodane.

²³Ɔbamaa bɛ ɛtane abu azia bɛ, na yeabɔ bɛ bo zo wɔ bɛ amumuyɛ ti; Ɛdɛnkɛma yɛ Nyamenle ne babɔ bɛ bo zo.