Read Nzema Edw 95 Bible Online

Edw 95 - Nzema bible

Edw 95

¹O bɛrɛla, bɛmaa yɛdo edwɛne yɛmaa Ɛdɛnkɛma; bɛmaa yɛva anyelielɛ yɛyeyɛ yɛ ngoanelielɛ bodane ne!

²Bɛmaa yɛva moyɛlɛ yɛrɛla ɔ nyunlu; bɛmaa yɛva anyelielɛ yɛdo ayɛlɛyelɛ edwɛne yɛmaa ye!

³Ɔluakɛ Ɛdɛnkɛma le Nyamenle kpole, yɛɛ ɔle Belemgbunli kpole ɔbo nyamenle muala anwo zo.

⁴Ɔ sa nu yɛɛ ewiade ye buma kɔsɔɔti wɔ a, yɛɛ awoka ndendenle ne mɔ noko le ye ɛdeɛ.

⁵Nyevile ne le ye ɛdeɛ, ɔdaye yɛɛ ɔyɛle a; ɔvale ɔ sa a ɔhyehyɛle azɛlɛ resee ne a.

⁶O bɛrɛla, bɛmaa yɛbɔ yɛ ti aze yɛzonle ye; bɛmaa yɛhoto Ɛdɛnkɛma, yɛ Bɔvolɛ ne.

⁷ Ɔluakɛ ɔle yɛ Nyamenle, yɛɛ yɛle ye adidileka menli, nee ɔ sa nu mboane. O anrɛɛ ɛnee ɛnɛ bɛkɛdie ɔ ne!

⁸ Bɛmmayɛ anzosesebɛ, kɛmɔ bɛyɛle wɔ Mɛleba, kɛmɔ mekɛ ne anu bɛyɛle wɔ Masa fienemgbole ne anu,

⁹mɔɔ bɛ nlenya mɔ zɔle me nleanle, na bɛgyegyele me, wɔ mekɛ mɔɔ ɛnee bɛnwu me gyima la.

¹⁰Mengyile awolɛndoazo zɔhane ɛvolɛ abulanla, na menganle kɛ, “Bɛle menli mɔɔ ɛsolo, na bɛmbu me ndenle ne mɔ bie a.”

¹¹ Yemɔti menvale ɛya na menganle ndane kɛ, bɛ gyakɛ ba ɛnrɛtia me ɛnwomenlelielɛ ne anu.