Read Nzema Edw 96 Bible Online

Edw 96 - Nzema bible

Edw 96

¹O bɛdo edwɛne fofolɛ bɛmaa Ɛdɛnkɛma; ewiade amra, bɛdo edwɛne bɛmaa Ɛdɛnkɛma.

²Bɛdo edwɛne bɛmaa Ɛdɛnkɛma, na bɛyeyɛ ye; bɛbɔ ye ngoanelielɛ ne nolo alehyenlɛ biala.

³Bɛbɔ ye anyunlunyia ne nolo wɔ maanle maanle avinli, bɛbɔ ye nwanwane gyima ne mɔ nolo bɛhile menli kɔsɔɔti.

⁴Ɛdɛnkɛma le bedevinli, yɛɛ ɔwɔ kɛ bɛye ye ayɛlɛ kpole; ɔwɔ kɛ bɛsulo ye bɛtɛla nyamenle kɔsɔɔti.

⁵Ɔluakɛ maanle maanle nyamenle ne mɔ le mmonle; Ɛdɛnkɛma a bɔle anwumaneamra a.

⁶Enililɛ nee tumi ɛbɔ ɛyia ye, anwosesebɛ nee kɛnlɛma ɛyi ye Ɛzonlenlɛ Sua ne.

⁷ O ewiade mbusua kɔsɔɔti, bɛyeyɛ Ɛdɛnkɛma, bɛyeyɛ ye anyunlunyia nee ye tumi ne.

⁸Bɛwula Ɛdɛnkɛma anyunlunyia mɔɔ fɛta ye; bɛva azubɔdeɛ bɛrɛlɛ ye, na bɛrɛla ye Ɛzonlenlɛ Sua ne anu.

⁹Bɛva anwoziezielɛ nwuanzanwuanza bɛzonle Ɛdɛnkɛma; ewiade amra, bɛzulo ye.

¹⁰Bɛha bɛhile maanle maanle kɔsɔɔti kɛ, “Ɛdɛnkɛma le belemgbunli! Ɛhɛe, ewiade ye gyi pi, awie ɛnrɛhola ɔ bo tu; ɔbava pɛlepɛlelilɛ yeabua menli kɔsɔɔti ndɛne.”

¹¹Bɛmaa anwuma amra ɛli fɛlɛko, na ewiade amra anye ɛlie; bɛmaa nyevile ne nee mɔɔ wɔ nu la amuala ɛhulu;

¹²bɛmaa azɛlɛ ye nee mɔɔ wɔ zo la amuala ɛli fɛlɛko! Akee ɛbɔ nu mbaka bava anyelielɛ ado edwɛne

¹³wɔ Ɛdɛnkɛma anyunlu, ɔluakɛ ɔlɛba, ɔlɛba yearabua ewiade amra ndɛne. Ɔbava tenleneyɛlɛ yeabua ewiade amra ndɛne, ɔbabua menli kɔsɔɔti ndɛne nɔhalɛ nu.