Read Nzema Edw 97 Bible Online

Edw 97 - Nzema bible

Edw 97

¹Ɛdɛnkɛma le belemgbunli; bɛmaa ewiade amra anye ɛlie; bɛmaa maanle maanle mɔɔ gua nyevile nloa la ɛli fɛlɛko!

²Amungu nee awozinli kabii ɛbɛnra ɛyia ye; ye belemgbunli ebia ne adiabo a le tenleneyɛlɛ nee pɛlepɛlelilɛ.

³Senle tudu di ɔ nyunlu, na ɔyela ye kpɔvolɛma amuala.

⁴Ye ɛsɛnlɛmanye ne mɔ kpakye ta ewiade ye wienyi; ewiade amra nwu ye na bɛ nwo wozo bɛ.

⁵Awoka kolo kɛ ehuaba[57] wɔ Ɛdɛnkɛma anyunlu, ewiade ye amuala Awulae ne anyunlu.

⁶Anwumaneamra bɔ ye tenleneyɛlɛ ne nolo, yɛɛ menli kɔsɔɔti nwu ye anyunlunyia ne.

⁷Bɛdabɛ mɔɔ bɛsonle ananze la anyunlu ɛgua aze; bɛdabɛ mɔɔ bɛfa mmonle bɛtu bɛ nwo la anyunlu ɛgua aze; nyamenle kɔsɔɔti bɔ bɛ ti aze maa ye.

⁸Zayɔnoma te na bɛdi fɛlɛko, yɛɛ Dwudama anye die wɔ wɔ ndɛnebualɛ ne mɔ ati, O Nyamenle.

⁹Ɔluakɛ wɔmɔ, Ɛdɛnkɛma, ɛle kpole ɛtɛla ewiade amuala; ɛle bedevinli ɛtɛla nyamenle kɔsɔɔti.

¹⁰Ɛdɛnkɛma kulo bɛdabɛ mɔɔ bɛkyi ɛtane la; ɔbɔ ɔdaye ye menli ne anwo bane; ɔdie bɛ ɔfi amumuyɛma asa anu.

¹¹Wienyi ta tenlenema anwo zo, yɛɛ mɔɔ ahonle nu te la anye die.

¹²O bɛmɛ tenlenema, Ɛdɛnkɛma ati, bɛli fɛlɛko, na bɛyɛ ye duma nwuanzanwuanza ne mo.