Read Nzema Mrɛ 1 Bible Online

Mrɛ 1 - Nzema bible

Mrɛ 1

¹ Belemgbunli Devidi ara nrenya Sɔlɔmɔn, Yizilayɛ belemgbunli ne mrɛlɛ mɔɔ bule la ɛne:

²Ɔbule mrɛlɛ ne mɔ amaa menli azukoa nrɛlɛbɛ, anyia ngilehilelɛ, na bɛade edwɛkɛ mɔɔ anu pi la abo,

³bɛadie ngilehilelɛ mɔɔ fane nrɛlɛbɛ ɛbɛla, tenleneyɛlɛ, pɛlepɛlelilɛ, nee boɛlilɛ nwo,

⁴amaa mɔɔ ɛnze nrɛlɛbɛ la anwu nrɛlɛbɛ na mgbavolɛ adwenle nu abuke.

⁵Sonla mɔɔ ze nrɛlɛbɛ la bade na yeazukoa yeamaa ye adwenle adi, na mɔɔ lɛ ndelebɛbo la anyia adwenle mɔɔ anu pi,

⁶na yeade ɛrɛlɛbulɛ nee edwɛkɛndonwo, nrɛlɛbɛvolɛma edwɛkɛ nee bɛ abɛladolɛ ne mɔ abo.

⁷ Ɛdɛnkɛma ɛzulolɛ le adwenle nu ɛbukelɛ mɔlebɛbo, ahoasea kyi nrɛlɛbɛ edwɛkɛ nee ngilehilelɛ.

⁸Me ra nrenya, tie ɛ ze ngilehilelɛ, yɛɛ mmakpo ɛ nli folɛdulɛ,

⁹ɔluakɛ bɛle ndotolo kɔtɔlɔba abɔtile bɛmaa wɔ, yɛɛ bɛle ɛ kɔme avikpa.

¹⁰Me ra nrenya, saa ɛtanevolɛma bɛlɛbɛla wɔ ali wɔ adwenle a, mmakponle zolɛ.

¹¹Saa bɛka bɛkile wɔ kɛ, “Maa yɛhɔ nzia wɔ adenle nu, yɛhu menli mɔɔ ɛnze nwolɛ bie;

¹²maa yɛyɛ yɛ nwo kɛ Ɛbolɔ, yɛme bɛ anyewɔzo, kɛ Ewule Kuma me menli mɔɔ wu la,

¹³na yɛbanyia ninyɛne mɔɔ sonle bolɛ la dɔɔnwo; yɛbanyia ninyɛne dɔɔnwo wɔ yɛ azua nu;

¹⁴yemɔti ɛ nee yɛ ɛyɛ ko na yɛ muala yɛ gya ɛyɛ ko” a,

¹⁵me ra nrenya, ɛ nee bɛ mmatu fee,

¹⁶ɔluakɛ bɛ gyakɛ ɛdudulɛ ne fa bɛ kɔ munzule nu, yɛɛ bɛle ahɔdiawu.

¹⁷Ɔluakɛ saa anloma anye gyi ɛ nwo na ɛgua ye asawu a, ɛgua ye mgbane.

¹⁸Menli ɛhye mɔ kɔ bɛdabɛ bɛ ngome bɛ ngoane nwo nzia, bɛdabɛ bɛ ngome bɛ mogya yɛɛ bɛkɔ nwolɛ nzia a.

¹⁹Bɛdabɛ mɔɔ bɛfa menli ɛhunlɛ bɛkpondɛ anwonyia la adenle kɛ de la ɛne; bɛdabɛ bɛ ngome bɛ kɔdiawu anwonyia ne pɛ ɔ nwo ku bɛ.

²⁰ Nrɛlɛbɛ ane la nu wɔ guabile ne mɔ azo, bɛte ɔ ne wɔ gua ne mɔ anu,

²¹ɔ ne dielie bane ne mɔ ati zo nee suakpole ne nlenkɛ mgbole ne mɔ anloa na ɔlɛka kɛ:

²²“O bɛmɛ anzenwolɛbiema, bɛkulo kɛ bɛka bile nu toonwo ɔkɔdwu kenlenzu? Agolobɛnwoma, bɛ nye die bɛ agolobɛnwo nu toonwo yeahɔdwu kenlenzu, na ahoasea akpo adwenlenubukelɛ ahɔdwu kenlenzu?

²³Saa metwi bɛ nyunlu a anrɛɛ bɛdie. Nea, mebaha me adwenle kɔsɔɔti meahile bɛ. Mebamaa bɛade me edwɛkɛ ne mɔ abo wienyi.

²⁴Kɛmɔ mevɛlɛ bɛ na bɛkpo kɛ bɛnrɛdie me, medɛlɛ me sa nu, na awie biala ambandɔ nu,

²⁵na bɛkpɔla bɛ nzo anzi wɔ me folɛdulɛ muala anwo, na bɛyɛ kɛ bɛnrɛva bɛ nyunlu mɔɔ metwi la bɛnrɛyɛ ɛhwee la,

²⁶medame noko mebazele bɛ wɔ bɛ anwubɛnyunlu nu. Saa bɛ nye zo ta bɛ a, mebazi bɛ amgbu.

²⁷Saa edwɛkɛ to bɛ maa bɛ nye zo ta bɛ kɛ menli mɔɔ ahumu ɛva bɛ, na munzule bigyi bɛ kɛ ahumuakyima, na nyane nee amaneɛnwunlɛ fa bɛ aze a, mebazele bɛ.

²⁸Akee bɛbazu bɛavɛlɛ me, na menrɛdɛne bɛ zo, bɛbakpondɛ me kpalɛ kpalɛ, na bɛnrɛnwu me.

²⁹Kɛmɔ bɛhyile adwenlenubukelɛ, na bɛanzulo Ɛdɛnkɛma,

³⁰kɛmɔ bɛyɛle kɛ bɛnrɛbu me folɛdulɛ ne bie, na bɛkpole kɛ menwɔhwi bɛ nyunlu la,

³¹mɔɔ bɛyɛ la anwo aleɛ yɛɛ bɛbali a, na bɛdabɛ bɛ ngome bɛ adwenle ɛtane ne abɔ bɛ ti.

³²Bɛdabɛ mɔɔ bɛnze nwolɛ bie la kakyi bɛ nzi si nrɛlɛbɛ na bɛwu, yɛɛ ahoasea ahunlundwolɛ sɛkye bɛ;

³³na mɔɔ tie me ne la badɛnla anzonudwolɛ nu, ɔ nwo adɔ ye, mɔɔ ɔnrɛzulo munzule biala a.”