Read Nzema Mrɛ 10 Bible Online

Mrɛ 10 - Nzema bible

Mrɛ 10

¹Belemgbunli Sɔlɔmɔn mrɛlɛ ne mɔ mɔɔ ɔbule la ɛne: Ralɛ nrenya mɔɔ ze nrɛlɛbɛ la maa ɔ ze anye die, yɛɛ ralɛ nrenya koasea maa ɔ nli di nyane.

²Nvasoɛ biala ɛnle anwonyia mɔɔ sonla kɛlua amumuyɛ zo kɛnyia ye la azo, tenleneyɛlɛ die sonla fi ewule nu.

³Ɛdɛnkɛma ɛmmaa ɛhɔne ɛngu sonla mɔɔ le tenlene la, na ɔsɛkye amumuyɛnli ne anyebolo anwonyia ɛkpondɛlɛ.

⁴Ehyia ku mgbovonle, yɛɛ gyima ɛsesebɛ ɛyɛlɛ maa sonla nyia ɔ nwo.

⁵Ralɛ nrenya mɔɔ kuohua ye bɛyɔba nloa wɔ wawaa nu la ze nrɛlɛbɛ, na ralɛ nrenya mɔɔ da dafe wɔ ɛbuhenle mekɛ la bɔ anyiemgba.

⁶Sonla mɔɔ le tenlene la nyia nyilalɛ. Amumuyɛnli anloa edwɛkɛ kedɛheda ye kɔdiawu ɛbɛla zo.

⁷Tenlenema ɛhakyelɛ le nyilalɛ, na amumuyɛnli duma baminli.

⁸Sonla mɔɔ ze nrɛlɛbɛ la di mɛla zo, na koasea ɛdendɛzoma fa ɔ nwo to munzule nu.

⁹Sonla mɔɔ fa nɔhalɛlilɛ dua la anwo kɔlɔnwo, na sonla mɔɔ fa adwenle ɛtane dua la anwo bala zo.

¹⁰Sonla mɔɔ bu anyehoanlɛ la twe dwɛwɔlɛ ba, na mɔɔ buke ye munli nu tendɛ la fa anzonudwolɛ ba.

¹¹Sonlakpalɛ ɛdendɛlɛ le ngoane nzufeanvea, na amumuyɛnli anloa edwɛkɛ kedɛheda ye kɔdiawu ɛbɛla zo.

¹² Ɛkpɔlɛ twehwe konle, na ɛhulolɛ kedɛheda nvonleɛ kɔsɔɔti azo.

¹³Nrɛlɛbɛ wɔ sonla mɔɔ lɛ ndelebɛbo la ɛdendɛlɛ nu, na sonla mɔɔ ɛnlɛ adwenle la anzi fɛta empele.

¹⁴Menli mɔɔ ze nrɛlɛbɛ la lɛ adwenle, na koasea mɔɔ tendɛ kpukpakpukpa la twe munzule ba.

¹⁵Sukoavolɛ anwonyia le ye aranemgbole mɔɔ yɛ se; ehyia sɛkye ehyianli.

¹⁶Tenlenenli ahatualɛ a le ngoane, na amumuyɛnli nvasoɛ a le ɛtane.

¹⁷Sonla mɔɔ tie folɛdulɛ la lua ngoane adenle nu, na mɔɔ kpo ahwibɛnyunlu la minli.

¹⁸Sonla biala mɔɔ fea ɛkpɔlɛ zo la le adalɛ, yɛɛ mɔɔ le ngunzi la le koasea.

¹⁹Saa ɛdendɛlɛ so somasoma a, mɛladonlɛ ɛnli mgbanwo, na mɔɔ sɔ ɔ nloa la ze nrɛlɛbɛ.

²⁰Sonlakpalɛ ɛdendɛlɛ le dwɛtɛ fufule kpalɛ; amumuyɛnli adwenle nwo ɛnlɛ nvasoɛ biala.

²¹Sonlakpalɛ ɛdendɛlɛ maa menli dɔɔnwo nyia aleɛ di, na ahoasea wu, ɔluakɛ bɛnlɛ adwenle.

²²Ɛdɛnkɛma nyilalɛ maa sonla nyia ɔ nwo, yɛɛ ɔnva nyanelilɛ biala ɔmboka nwolɛ.

²³Koasea yɛ debie ɛtane a ɔfa ye nwɔhoalilɛ, na nrɛlɛbɛ nyɛleɛ maa sonla mɔɔ lɛ ndelebɛbo la di fɛlɛko.

²⁴Mɔɔ amumuyɛnli sulo ye la bara ɔ nwo zo, na sonlakpalɛ biala nyia debie mɔɔ ɔkpondɛ la.

²⁵Saa ahumu ne tu se a, amumuyɛnli ne ɛnle ɛkɛ ne bieko, na sonlakpalɛ ne wɔ ɛkɛ ne dahuu.

²⁶Kɛ nzanvinli si nyia egyele, nee kɛ esike si dɔ ɛnyelɛ la, zɔhane ala yɛɛ mgbovonle de maa menli mɔɔ soa ye la a.

²⁷Sonla mɔɔ sulo Ɛdɛnkɛma la lɛ ngoane tendenle, na amumuyɛma mekɛ le ezinraa.

²⁸Sonlakpalɛ anyelazo wie fɛlɛkolilɛ nu, na amumuyɛma anyelazo le mgbane.

²⁹Ɛdɛnkɛma le ɛvealeka kpole maa sonla mɔɔ di boɛ la, na ɔsɛkye bɛdabɛ mɔɔ bɛyɛ ɛtane la.

³⁰Bɛnrɛdu tenlenema ɛlɛ, na amumuyɛma ɛnrɛdɛnla azɛlɛ ne azo ɛlɛ.

³¹Tenlenenli ɛdendɛlɛ fa nrɛlɛbɛ ba, na sonla mɔɔ tendɛ mgbane mgbane la bɛbaye ye zo.

³²Tenlenema ze mɔɔ bɛka a menli die to nu la, na amumuyɛma ka mɔɔ futu ahonle la.