Read Nzema Mrɛ 11 Bible Online

Mrɛ 11 - Nzema bible

Mrɛ 11

¹Ɛdɛnkɛma kyi tone mɔɔ bɛwua nu la, na ɔ nye die tone mɔɔ bɛnwua nu la anwo.

²Saa adubɛnwo yɛ kpole a, anyiemgba a li ɔ nzi a; na mɔɔ le bɛlɛvo la nwu nrɛlɛbɛ.

³Sonlakpalɛ biala nɔhalɛlilɛ a sinza ye a, na asiayɛ biala ngunziyɛlɛ sɛkye ye.

⁴Anwonyia nwo ɛnlɛ nvasoɛ wɔ ɛya kenle ne anu, na tenleneyɛlɛ die sonla fi ewule nu.

⁵Nɔhalɛlilɛ maa sonlakpalɛ ɛbɛlabɔlɛ toa zo fɔɔnwo, na amumuyɛnli amumuyɛ bu sia ye.

⁶Sonlakpalɛ tenleneyɛlɛ die ye fi munzule nu, na ngunzinli atiakunluwɔzo ɛtane kye ye nuokɛ.

⁷Saa amumuyɛnli wu a, ye anyelazo minli, yɛɛ sonla mɔɔ ɛnze Nyamenle la anyelazo ɛnyɛ zɔ ɛlɛ.

⁸Bɛdie tenlenenli ne bɛfi ngyegyelɛ nu, na amumuyɛnli ne tɔ nu.

⁹Sonla mɔɔ ɛnze Nyamenle la fa ɔ nloa sɛkye ɔ gɔnwo, na tenlenema fa adwenle die bɛ nwo.

¹⁰Saa ɔyɛ boɛ ɔmaa tenlenenli a, suakpole ne azo amra amuala anye die, na saa amumuyɛnli wu a, zolɛ le fɛlɛkolilɛ ngome.

¹¹Tenlenema nyilalɛ kpogya suakpole zo, na amumuyɛma anloa bɔ suakpole.

¹²Sonla mɔɔ ɛmbu ɔ gɔnwo bie la ɛnlɛ adwenle, na sonla mɔɔ lɛ ndelebɛbo la ka ɔ nloa to nu.

¹³Sonla mɔɔ duolua nuhua toamatoama keha edwɛkɛ la fa fealera nu edwɛkɛ finde, na sonla mɔɔ bɛkola bɛfa bɛ rɛle bɛwula ye nu la fa edwɛkɛ sie.

¹⁴Maanle mɔɔ ɛnlɛ ye sinzavolɛ la ɛngyɛ na abɔ; na maanle mɔɔ folɛdulɛma dɔɔnwo wɔ nu la, anwondɔlɛ wɔ nu.

¹⁵Sonla mɔɔ di ɛyɛvolɛ agyinlanu la bavu ɔ nwo, na mɔɔ kyi agyinlanulilɛ la anwo tɔ ye.

¹⁶Raalɛ mɔɔ di ɔ nwo eni la, bɛdi ye eni, yɛɛ mrenya mɔɔ kulo konle la nyia bɛ nwo.

¹⁷Sonla mɔɔ atiakunlu le kpalɛ la nyia ye kpalɛyɛlɛ ne azo nvasoɛ, na atisesebɛnli ne boda ɔ ngome ɔ nwo.

¹⁸Amumuyɛnli ahatualɛ ɛngyinla, na sonla mɔɔ dua tenleneyɛlɛ ma la nyia ahatualɛ kpalɛ.

¹⁹Sonla mɔɔ gyi kpundii wɔ tenleneyɛlɛ nu la banyia ngoane, na mɔɔ di ɛtaneyɛlɛ nzi la bawu.

²⁰Ɛdɛnkɛma kyi menli mɔɔ lɛ adwenle ɛtane la, na ɔ nye die bɛdabɛ mɔɔ bɛdi boɛ la anwo.

²¹Nwu ye kɛ sonla mɔɔ di ɛtane la ɛnrɛva ɔ nwo dwɔɔ, na bɛdabɛ mɔɔ bɛbɔ tenlene ɛbɛla la anwo bavi nu.

²²Raalɛ anwofɛlɛko mɔɔ ɛnlɛ adwenle la le kɛ ezukoa nvutuke kpɔdelera wɔ kpolike bonyi nu.

²³Mɔɔ tenlenenli kpondɛ la wie boɛ; mɔɔ amumuyɛnli anye la zo la wie ɛya nu.

²⁴Sonla ne bie buke ɔ sa nu fa maa, noko ɔnyia ɔ nwo; bie noko ɛnva ɛhwee ɛmmaa, noko ɔdi ehyia.

²⁵Sonla mɔɔ buke ye ahonle nu fa maa la banyia ɔ nwo, yɛɛ mɔɔ yɛ ahunlunyele la, bɛnwu ye anwunvɔne.

²⁶Sonla mɔɔ fa ye abɛlɛ bɔ abokɛ la, menli wa ye amonle, na mɔɔ fa ye ma finde tɔne ye la nyia nyilalɛ.

²⁷Sonla mɔɔ pele kpondɛ kpalɛ bo zo la nyia ɔ nyunlu, yɛɛ munzule to mɔɔ kpondɛ munzule bo zo la.

²⁸Sonla mɔɔ fa ɔ rɛle wula ye anwonyia nu la babɔ aze, na mɔɔ le tenlene la bayɛ duhuduhu kɛ nya amolɛ.

²⁹Sonla mɔɔ gyegye ye awuke nu amra la bali anwoma agya, yɛɛ koasea bayɛ nrɛlɛbɛvolɛ sonvolɛ.

³⁰Ma mɔɔ tenlenenli so la le ngoane, na sonla mɔɔ to nzaka la kuhu menli.

³¹ Saa bɛbadua tenlenenli kakɛ wɔ azɛlɛ ye azo wɔ ye nyɛleɛ nwo a, ɛnee kɛ amumuyɛma nee ɛtanema kɛzi kɛwie ye ɛ!