Read Nzema Mrɛ 12 Bible Online

Mrɛ 12 - Nzema bible

Mrɛ 12

¹Sonla mɔɔ kulo kɛ ye adwenle nu buke la kulo kɛ saa ɔfo a bɛka bɛkile ye, na mɔɔ ɛngulo kɛ bɛtendɛ ɔ nyunlu la le kɔnwɔne.

²Sonlakpalɛ biala sɔ Ɛdɛnkɛma anye, na ɔtea sonla mɔɔ bɔ adwenle ɛtane la.

³Amumuyɛ sonla ɛmkpazi, na sonla tenlene sɔ ndinli, ɛtu ye a ɔndu.

⁴Yelɛ kpalɛ le ɔ hu kyɛlɛ zo kpɔba, na yelɛ mɔɔ bɔ ɔ hu anyiemgba la le ewule wɔ ɔ hu mbowule nu.

⁵Tenlenenli biala adwenle le fɔɔnwo; amumuyɛnli folɛdulɛ le mɛlɛbɛla.

⁶Amumuyɛnli edwɛkɛ kɔ mogyahanlɛ nwo nzia, na sonla mɔɔ le fɔɔnwo la anloa edwɛkɛ die menli ngoane.

⁷Amumuyɛma badu agua, bɛ bo zo aminli, na tenlenema awuke bagyinla.

⁸Sonla adwenle kpalɛ yɛɛ bɛfa bɛkanvo ye a, na sonla mɔɔ ye adwenle ɛnle kpalɛ la, bɛkpo ye.

⁹Sonla bɛlɛvo mɔɔ yɛ ɔ ti anwo gyima la le kpalɛ tɛla sonla mɔɔ memaa ɔ nwo zo na ɔ nloa anu aleɛ bɔ ye la.

¹⁰Sonla tenlene biala dwenle ye nyɛmoa nwo, na amumuyɛnli anwunvɔnezelɛ le atisesebɛyɛlɛ.

¹¹Sonla mɔɔ so ɛya la nyia aleɛ dɔɔnwo, na mɔɔ di ninyɛne mgbane mgbane nzi la ɛnlɛ adwenle.

¹²Amumuyɛnli tawa mɔɔ gyi kpundii la bubu gua, na tenlenenli sɔ ndinli gyinla kpundii.

¹³Ɛtanenli anloa edwɛkɛ kakyi ɛhane kye ye, na tenlenenli ye ɔ nwo fi ngyegyelɛ nu.

¹⁴Sonla anloa edwɛkɛ maa ɔnyia debie kpalɛ, ɔ kunlu dwo ɔ nwo, yɛɛ sonla biala asa anloa gyima sia ba ye ɛkɛ.

¹⁵Koasea biala adenle le kpalɛ wɔ ɔdaye ɔ nye zo, na nrɛlɛbɛvolɛ biala tie folɛdulɛ.

¹⁶Koasea ɛyavalɛ da ali ndɛndɛ, na badwemafo ɛndwenle aholoba ɛbɔlɛ nwo.

¹⁷Sonla mɔɔ ka nɔhalɛ la daselɛlilɛ le fɔɔnwo, na mɔɔ di dasewia la bɔ adalɛ.

¹⁸Sonla ne bie anloa edwɛkɛ wowɔ kɛ dadeɛ, na nrɛlɛbɛvolɛ edwɛkɛ le ayile.

¹⁹Edwɛkɛ nɔhalɛ gyi kpundii mekɛ biala, edwɛkɛ adalɛ ɛngyɛ na yeaminli.

²⁰Bɛdabɛ mɔɔ bɛbɔ adwenle ɛtane la bɔ adalɛ, na menli mɔɔ dwenle adwenle kpalɛ la anye die.

²¹Munzule ɛndo tenlenenli biala, na amumuyɛnli anwo lɛ edwɛkɛ ngome.

²²Ɛdɛnkɛma kyi menli mɔɔ bɔ adalɛ la, na ɔ nye die menli mɔɔ di nɔhalɛ la anwo.

²³Badwemafo ɛnva mɔɔ ɔze ye la ɛndu ɔ nwo, na ahoasea bɔ bɛ koasea ne nolo.

²⁴Sonla mɔɔ kola gyima yɛ la sie maanle, yɛɛ mgbovonle yɛ mianlera nu gyima.

²⁵Adwenleadwenle maa sonla yɛ basaa, na edwɛkɛ kpalɛ maa sonla di fɛlɛko.

²⁶Sonlakpalɛ biala twe ɔ nwo fi ɛtane nwo, na amumuyɛnli adenle maa ɔminli.

²⁷Mgbovonle sonla biala ɛnrɛnyia mɔɔ ɔkpondɛ la, na mɔɔ anye bolo yɛ gyima la nyia ɔ nwo.

²⁸Tenleneyɛlɛ le ngoane adenle, yɛɛ ɛtaneyɛlɛ adenle wie ewule.