Read Nzema Mrɛ 13 Bible Online

Mrɛ 13 - Nzema bible

Mrɛ 13

¹Kakula nrɛlɛbɛvolɛ tie ɔ ze ngilehilelɛ, na mgbanyizonle biala ɛndie ahwibɛnyunlu.

²Sonlakpalɛ ɛdendɛlɛ kpalɛ maa ɔdi ninyɛne kpalɛ, na mɔɔ ngunzinli kpondɛ la a le konle.

³Sonla mɔɔ sinza ɔ nloa la sinza ye ngoane, yɛɛ mɔɔ buke ɔ nloa mgbane mgbane la yia munzule.

⁴Mgbovonle sonla biala akunlu anu a anrɛɛ, noko ɔnnyia ɛhwee; na mɔɔ anye bolo yɛ gyima la nyia ninyɛne dɔɔnwo.

⁵Tenlenenli kyi adalɛbɔlɛ, na amumuyɛnli yɛ ye ninyɛne anyiemgba nu.

⁶Tenleneyɛlɛ sinza mɔɔ di boɛ la, yɛɛ ɛtane bu sia amumuyɛnli.

⁷Sonla ne bie yɛ ɔ nwo kɛ yenyia ɔ nwo, noko ɔnlɛ ɛhwee; bie noko yɛ ɔ nwo kɛ ɔnlɛ bie, noko yenyia ɔ nwo kpole kpalɛ.

⁸Debie mɔɔ sonla fa kpɔne ɔ nwo fi ɛbɛlabɔlɛ awoba nu la a le ye anwonyia, na ehyianli ɛnlɛ bie mɔɔ ɔfa ɔdie ɔ nwo a.

⁹Tenlenenli wienyi ta kpole kpalɛ; amumuyɛnli kɛnlaneɛ ɛngyɛ na anlu.

¹⁰Sonla mɔɔ ɛnde folɛ la mgbanyizonle ne fa ye kɔ ngyegyelɛ nu, na mɔɔ te folɛ la ze nrɛlɛbɛ.

¹¹Anyiabɛnwo ndɛndɛ wie ndɛndɛ azebɔlɛ, na mɔɔ kuohua ye ngyikyi ngyikyi la nyia bie dɔɔnwo.

¹²Anyelazo kyɛ a, ɔyɛ anwobubulɛ; na ɛnyia ye a ɔyɛ anyelielɛ.

¹³Sonla mɔɔ kpo folɛdulɛ la fa ɔ nwo to munzule nu, na mɔɔ di mɛla zo la banyia nwolɛ ahyɛlɛdeɛ.

¹⁴Nrɛlɛbɛvolɛ ngilehilelɛ le ngoane nzufeanvea, amaa mɔɔ tie la abɔ ahoane ewule ngane ne mɔ.

¹⁵Adwenle kpalɛ ɛvalɛ maa sonla sɔ ɛnyelɛ, na mɔɔ bɛfa bɛ adwenle bɛto ɔ nwo zo a ɔnyɛ boɛ la adenle kɔ munzule nu.

¹⁶Badwemafo fa adwenle yɛ ye debie biala, na koasea ye ye koasea ne kile.

¹⁷Soanvolɛ ɛtane fa menli kɔ ngyegyelɛ nu, yɛɛ ɛbɔfoɔ kpalɛ fa anzonudwolɛ ba.

¹⁸Sonla mɔɔ ɛnde folɛ la di ehyia na ɔbɔ anyiemgba, na mɔɔ kponle zo maa bɛtwi ɔ nyunlu la nyia ɔ nyunlu.

¹⁹Saa ɛkpondɛ na ɛnyia ye a ɔmaa anwondɔlɛ, na ɔle bɛkyi ɔmaa ahoasea kɛ bɛkɛhwe bɛ nwo bɛkɛvi ɛtane nwo.

²⁰Sonla mɔɔ nee nrɛlɛbɛvolɛma tu la nwu nrɛlɛbɛ, na mɔɔ nee ahoasea tu la nwu ɔ nyunlu.

²¹Munzule tu ɛtanevolɛma mgbaliko, yɛɛ ɛkpazilɛ le tenlenema ahatualɛ.

²²Sonlakpalɛ gyakyi ye nlɔnra agyadeɛ, na ɛtanenli anwonyia wɔ ɛkɛ ne maa tenlenema.

²³Ehyianli azɛlɛ mɔɔ kɛla kɛhyɛ la maa ɔnyia aleɛ dɔɔnwo, noko amile nu ala bɛsa ye bɛdie.

²⁴Sonla mɔɔ ɛngulo ɔ ra la kyi kɛ ɔkɛdea ye, na mɔɔ kulo ɔ ra la anye bolo tea ye.

²⁵Tenlenenli lɛ mɔɔ sa ye di la; amumuyɛnli ako ɛnyi ɛlɛ.