Read Nzema Mrɛ 14 Bible Online

Mrɛ 14 - Nzema bible

Mrɛ 14

¹Raalɛ nrɛlɛbɛvolɛ kyekye awuke, na raalɛ koasea bɔ awuke.

²Sonla mɔɔ dua pɛlepɛle adenle nu la sulo Ɛdɛnkɛma, na mɔɔ ye ndenle nu kyeɛhyea la kpo ye.

³Koasea anloa edwɛkɛ maa ɔdie mbaka, na nrɛlɛbɛvolɛ anloa sinza ye.

⁴Ɛleka mɔɔ nlankɛ nyinli ɛnle la, abɛlɛ ɛnle ɛkɛ, aleɛ dɔɔnwo ɛnyianlɛ vi ɛnlankɛ nyinli anwosesebɛ.

⁵Dasevolɛ nɔhavo ɛmbɔ adalɛ, na mɔɔ di dasewia la edwɛkɛ le adalɛ ngome.

⁶Adubɛnwo sonla ɛnnwu nrɛlɛbɛ ɛlɛ, na sonla mɔɔ lɛ ndelebɛbo la lɛ adwenle.

⁷Ɛ nee koasea mmatu, ɔluakɛ ɛnrɛde nrɛlɛbɛ edwɛkɛ biala ɛnrɛvi ye ɛkɛ.

⁸Badwemafo nrɛlɛbɛ maa ɔnwu ye adenle nu boɛ, na ahoasea nrɛlɛbɛ le mɛlɛbɛla.

⁹Nyamenle ɛmbu amumuyɛma, na mɔɔ di boɛ la sɔ ɔ nye.

¹⁰Ahonle a ze ɔdaye ye nyane mɔɔ ɔdi la a, yɛɛ ɔlɛdi fɛlɛko a awie gyɛne ɛnli bie.

¹¹Amumuyɛnli awuke babɔ, na mɔɔ di boɛ la awuke bagyinla.

¹² Adenle ne bie wɔ ɛkɛ ne a ɔle kpalɛ wɔ sonla nye zo, na ye awieleɛ wie ewule.

¹³Ɛzelekɛ nu bɔbɔ, ahonle ne di nyane; anyelielɛ awieleɛ wie nyanelilɛ.

¹⁴Sonla mɔɔ di ɛtane la nyɛleɛ babu azia ye, yɛɛ mɔɔ di boɛ la banyia ye nyɛleɛ kpalɛ nwo ahatualɛ.

¹⁵Sonla mɔɔ ye adwenle ɛtɛtinle la die debie biala di, na badwemafo nea ɛleka mɔɔ ɔlɛtudu ɔ gyakɛ yeahɔ la.

¹⁶Nrɛlɛbɛvolɛ nea boɛ na ɔtwe ɔ nwo ɔfi munzule nwo, na koasea ɛndwenle ɔ nwo, yɛɛ ɔle mgbaha.

¹⁷Sonla mɔɔ ye ahonle bikye ye la yɛ ye debie koasea nu, na sonla mɔɔ anye gyi ɔ ti anwo la lɛ abotane.

¹⁸Sonla mɔɔ ye adwenle ɛtɛtinle la yɛ koasea, na mɔɔ anye gyi ɔ ti anwo la lɛ adwenle.

¹⁹Ɛtanema bɔ bɛ ti aze wɔ kpalɛma anyunlu, yɛɛ amumuyɛma dwu tenlenema anyunlu a bɛtoto bɛ nwo aze.

²⁰Ehyianli biala anwo amra bɔbɔ ɛngulo ye, noko sukoavolɛ lɛ agɔnwolɛma dɔɔnwo.

²¹Sonla mɔɔ kpo ɔ gɔnwo la le ɛtanevolɛ; nyilalɛ ɛha sonla ne mɔɔ se ehyianvolɛma anwunvɔne la.

²²Bɛdabɛ mɔɔ bɛbɔ adwenle ɛtane la yɛ ɛtane; bɛdabɛ mɔɔ bɛdwenle kpalɛ la menli bu bɛ yɛɛ bɛdi nɔhalɛ bɛkile bɛ.

²³Nvasoɛ wɔ gyimayɛlɛ kɔsɔɔti azo, na ɛdendɛlɛ mgbane maa bɛdi ehyia.

²⁴Nrɛlɛbɛvolɛma abɔtile a le bɛ nrɛlɛbɛ, na ahoasea kɔme ndweabane a le bɛ koasea.

²⁵Mɔɔ di daselɛ nɔhalɛ nu la die ngoane, na mɔɔ bɔ adalɛ la le maamɔvo.

²⁶Sonla mɔɔ sulo Ɛdɛnkɛma la arɛle gyi pi wɔ ye nu, yɛɛ ɔ mra nyia ɛvealeka wɔ Nyamenle anu.

²⁷Ɛdɛnkɛma ɛzulolɛ le ngoane nzufeanvea, amaa sonla abɔ ahoane ewule ngane ne mɔ.

²⁸Belemgbunli biala anyunlunyia a le ye menli ne dɔɔnwo, belemgbunli mɔɔ ɛnlɛ menli la nwu amaneɛ.

²⁹Sonla mɔɔ ɔkyɛ na yeava ɛya la ndelebɛbo le kpole, na mɔɔ ɛngyɛ na ye ahonle afutu la maa ye koaseayɛlɛ yɛ kpole.

³⁰Anzonudwolɛ maa nwonane ba bɛ nwo, na nyanenwunlɛ maa bɛkakyi mbowule.

³¹Mɔɔ sisi ehyianli la tindi ye Bɔvolɛ ne anyunlu, na mɔɔ nwu mɔɔ ɛhyia la anwunvɔne la di ye Bɔvolɛ ne eni.

³²Amumuyɛnli ninyɛndane ɛyɛlɛ maa ɔkpo aze, na tenlenenli nyia ɛvealeka wɔ ye nɔhalɛlilɛ nwo.

³³Sonla mɔɔ lɛ ndelebɛbo la ze nrɛlɛbɛ, ahoasea ɛnze nrɛlɛbɛ deɛ holɛ.

³⁴Tenleneyɛlɛ kpogya maanle zo, yɛɛ ɛtaneyɛlɛ gua maanle biala anyunlu aze.

³⁵Sonvolɛ mɔɔ bɔ ye ɛbɛla nrɛlɛbɛ nu la sɔ belemgbunli anye, belemgbunli anyebolo wɔ mɔɔ bɔ anyiemgba ɛbɛla la anwo zo.