Read Nzema Mrɛ 15 Bible Online

Mrɛ 15 - Nzema bible

Mrɛ 15

¹Nyelebɛnloa bɛtɛɛ maa ɛya dwo, na ɛdendɛlɛ katekate ka ɛya.

²Nrɛlɛbɛvolɛ anloa edwɛkɛ maa adwenle, na koasea ka ngoaseasɛm.

³Ɛdɛnkɛma anye wɔ ɛleka biala, ɔnwu mɔɔ le kpalɛ nee mɔɔ le ɛtane la amuala.

⁴Ɛdendɛlɛ bɛtɛɛ le ngoane baka, na amumuyɛ ɛdendɛlɛ ku sunsum.

⁵Koasea kpo ɔ ze ngilehilelɛ, na badwemafo kulo folɛdulɛ.

⁶Anwonyia dɔɔnwo wɔ tenlenenli sua nu; amumuyɛnli anwonyia nwo lɛ munzule.

⁷Nrɛlɛbɛvolɛma ɛdendɛlɛ maa adwenle tende. Ahoasea adwenle ɛnle zɔhane.

⁸Amumuyɛnli azubɔlɛ le kyibadeɛ maa Ɛdɛnkɛma; Ɛdɛnkɛma anye die sonla mɔɔ di pɛlepɛle la nzɛlɛlɛ nwo.

⁹Amumuyɛma adenle ne le kyibadeɛ maa Ɛdɛnkɛma, na ɔkulo mɔɔ di pɛlepɛle nzi la.

¹⁰Mɔɔ kpo adenle la, bɛtea ye kpole kpalɛ; mɔɔ kyi ndeanlɛ la bawu.

¹¹Ɛbolɔ nee Abɛdɛn gua ɛkɛ ne wienyi wɔ Ɛdɛnkɛma anyunlu; mɔɔ vea ahonle nu la ɛnvea Ɛdɛnkɛma.

¹²Adubɛnwo sonla biala ɛngulo folɛdulɛ; ɔyɛ se kɛ ɔkɛhɔ nrɛlɛbɛvolɛ ɛkɛ.

¹³Fɛlɛkolilɛ maa sonla nyunlu yɛ ɛzelekɛzelekɛ, yɛɛ nyanelilɛ maa sonla nwo bubu ye.

¹⁴Sonla mɔɔ lɛ ndelebɛbo la kpondɛ adwenlenubukelɛ, na ahoasea buke bɛ nloa a ngoaseasɛm ngome.

¹⁵Mɔɔ ɛlɛnwu amaneɛ la mekɛ kɔsɔɔti le munzule, na mɔɔ ɛlɛdi fɛlɛko la mekɛ kɔsɔɔti le anyelielɛ.

¹⁶Sonla lɛ ekyi na ɔsulo Ɛdɛnkɛma a ɔle kpalɛ ɔtɛla anyiabɛnwo kpole mɔɔ nwolɛ le amaneɛ ngome la.

¹⁷Ɔle kpalɛ kɛ menli kɛva ɛhulolɛ kɛli nya nya tɛla kɛ bɛkɛva ɛkpɔlɛ bɛkɛli ɛnlankɛ dɔlera nane.

¹⁸Sonla mɔɔ ɛngyɛ na yeava ɛya la twehwe kpolera, na mɔɔ ɛnva ɛya mgbane mgbane la si kpolera aze.

¹⁹Mgbovonle adenle nu le mbowule ngome, na pɛlepɛle adenle nu le kpolomgbolo.

²⁰Ralɛ nrenya nrɛlɛbɛvolɛ maa ɔ ze anye die, na ralɛ nrenya koasea kpo ɔ nli.

²¹Mɔɔ ɛnlɛ adwenle la, mgbane mgbane ɛyɛlɛ yɛ ye fɛ, na sonla mɔɔ lɛ ndelebɛbo la kɔ fɔɔnwo.

²²Adwenle ngyehyɛlɛ mɔɔ folɛdulɛ ɛnle nwo la kyea, na saa folɛdulɛma dɔɔnwo wɔ nwo a ɔwie boɛ.

²³Nyelebɛnloa kɛnlɛma maa sonla nye die, yɛɛ edwɛkɛ kpalɛ wɔ ye mekɛ nloa le kpalɛ somaa!

²⁴Nrɛlɛbɛvolɛ adenle fa ye kɔ ngoane nu, amaa yeangɔ Ɛbolɔ.

²⁵Ɛdɛnkɛma bubu mgbanyizonlema azua gua, na ɔgya ahunlanvolɛ mraalɛ ɛweɛne.

²⁶Ɛdɛnkɛma kyi amumuyɛma adwenle ɛvalɛ, na ɔ nye die mɔɔ anwo te la edwɛkɛ ɛhanlɛ nwo.

²⁷Sonla mɔɔ anye sɔ kpondɛ nvasoɛ amile nu la twehwe edwɛkɛ maa ye sua nu amra, na mɔɔ kyi ndoloboa la lɛ ngoane.

²⁸Tenlenenli dwenle na yeabua edwɛkɛ nwo, na amumuyɛnli buke ɔ nloa a, munzule ngome.

²⁹Ɛdɛnkɛma nee amumuyɛma ɛmbɔ ɛweɛne, na ɔtie tenlenema nzɛlɛlɛ.

³⁰Fɛlɛkolilɛ maa sonla nyunlu yɛ ɛzelekɛzelekɛ, yɛɛ amaneɛ fɛlɛko maa sonla te kpɔkɛ.

³¹Sonla mɔɔ gyele ɔ nzo tie folɛdulɛ kpalɛ la nee nrɛlɛbɛvolɛma badɛnla.

³²Sonla mɔɔ ɛndie ngilehilelɛ la kpo ɔdaye mumua ne ɔ nwo, na mɔɔ tie folɛdulɛ la nyia ndelebɛbo.

³³Ɛdɛnkɛma ɛzulolɛ le nrɛlɛbɛ ɛzukoalɛ, yɛɛ mɛlɛbɛnwoaze nee enililɛ a lua a.