Read Nzema Mrɛ 17 Bible Online

Mrɛ 17 - Nzema bible

Mrɛ 17

¹Ɔle kpalɛ kɛ sonla kɛli mgbosawe na ɔ nzo nu kɛdwo ye tɛla kɛ ɔkɛli ye sosɔɔ wɔ awuke mɔɔ nuhua le konle ngome la anu.

²Kanranli mɔɔ bɔ ye ɛbɛla nrɛlɛbɛ nu la bazie ralɛ nrenya mɔɔ lɛ agyadeɛ na ɔbɔ anyiemgba ɛbɛla la; ɔ nee ralɛ nrenya ne bahyɛ ye agyadeɛ ne anu kɛ asɛɛ ɔle adiema nrenya la.

³Bɛfa senle a bɛsɔ dwɛtɛ fufule nee ezukoa nvutuke bɛnea a, yɛɛ Ɛdɛnkɛma a sɔ ahonle kɔsɔɔti nea a.

⁴Sonla mɔɔ di ɛtane la tie amumuyɛnli anloa, yɛɛ sonla mɔɔ le adalɛ la tie ngunzinli anloa.

⁵Sonla mɔɔ si ehyianvolɛma amgbu la tindi ye Bɔvolɛ ne anyunlu, yɛɛ mɔɔ anye die munzule nwo la ɛnrɛva ɔ nwo dwɔɔ.

⁶Mgbanyinli anyelielɛ a le bɛ nlɔnra, yɛɛ mralɛ mrenya anyunlunyia a le bɛ ze mɔ.

⁷Koasea ɛnze ɛdendɛlɛ kɛnlɛma, yɛɛ adalɛbɔlɛ ɛnfɛta belemgbunli.

⁸Ndoloboa ɛmanlɛ le kɛ ngonyia bolɛ wɔ mɔɔ fa maa la anye zo; ɛleka biala mɔɔ ɔkɛdo ɔ sa la, ɔkpazi.

⁹Sonla mɔɔ fa ɛtane kyɛ la kpondɛ ɛhulolɛ, na mɔɔ sɔ edwɛkɛ nu a ɔngyakyi la kpakye agɔnwolɛ nu.

¹⁰Saa bɛtwi sonla mɔɔ lɛ ndelebɛbo la anyunlu a ɔyɛ ye nyane ɔtɛla koasea mɔɔ bɛkɛwulowula ye ahutuku ɛya la.

¹¹Sonlatane biala to mgbonde; bɛbazoa soanvolɛ atisesebɛ ɔ nwo zo.

¹²Ɔle kpalɛ kɛ sonla nee bedi belɛ mɔɔ bɛwua ɔ mra la kɛyia tɛla kɛ ɔkɛyia koasea mɔɔ ɛlɛyɛ ngoaseade la.

¹³Sonla mɔɔ fa ɛtane tua kpalɛ kakɛ la, munzule ɛnrɛkpa ye awuke nu ɛlɛ.

¹⁴Mgbonde bo ɛbɔlɛ le kɛ azuledukuelɛ, yemɔti twe ɛ nwo kolaa na butule ne abɔ ɔ bo.

¹⁵Sonla mɔɔ bua amumuyɛnli benle nee mɔɔ bua tenlenenli fɔlɛ la Ɛdɛnkɛma kyi bɛ mu nwiɔ.

¹⁶Duzu ati a koasea mɔɔ ɛnlɛ adwenle la kɛnyia ezukoa kɛva kɛdɔ nrɛlɛbɛ ɛ?

¹⁷Agɔnwolɛma lɛ ɛhulolɛ mekɛ biala, yɛɛ anwongyelelɛ ti a bɛwo adiema nrenya a.

¹⁸Sonla mɔɔ ɛnlɛ adwenle la bɔ ɛwɔkɛ na ɔfa ɔ nwo ɔdi ɔ gɔnwo agyinlanu.

¹⁹Sonla mɔɔ kulo mɛladonlɛ la kulo mgbonde; sonla mɔɔ buke ye anlenkɛ wanaanwo la kulo kɛ bɛsɛkye ye.

²⁰Sonla mɔɔ ɛnlɛ adwenle kpalɛ la ɛmkpazi, yɛɛ sonla mɔɔ anloa wowɔ la fa ɔ nwo to munzule nu.

²¹Ralɛ nrenya tindandi mɔɔ ɛnze nrɛlɛbɛ la maa ɔ ze di nyane, yɛɛ selɛ mɔɔ kɛwo koasea la anye ɛnlie.

²²Ɛzelekɛ le ayile kpalɛ, yɛɛ adwenleadwenle maa anwofofolɛ.

²³Sonla mɔɔ ati yɛ se la die ndoloboa a ɔdie ye ɔ sa amu nwiɔ ɔfa ɔsɛkye pɛlepɛlelilɛ adenle.

²⁴Sonla mɔɔ lɛ ndelebɛbo la fa sie ɔ nyunlu kɛ ɔsukoa nrɛlɛbɛ, na koasea anye deda.

²⁵Ralɛ nrenya koasea maa ɔ ze di nyane yɛɛ ɔyɛ ɛnwonle ɔmaa ɔ nli mɔɔ wole ye la.

²⁶Ɔnle kpalɛ kɛ bɛkɛbɔ sonla mɔɔ le tenlene la kakɛ; ɔle nvonleɛ kɛ bɛkɛbila sonla titile empele.

²⁷Sonla mɔɔ ɛndendɛ dɔɔnwo la lɛ adwenle, yɛɛ sonla mɔɔ ye ahonle la azule nu la lɛ ndelebɛbo.

²⁸Saa koasea bɔbɔ ka ɔ nloa to nu a, bɛfa ye kɛ ɔze nrɛlɛbɛ; saa yeambuke ɔ nloa a, bɛfa ye kɛ ye adwenle ɛdi.