Read Nzema Mrɛ 18 Bible Online

Mrɛ 18 - Nzema bible

Mrɛ 18

¹Sonla mɔɔ ɛnzo menli avinli la bua ɔ nwo benle ɔfa ɔsɛkye ndɛnebualɛ kpalɛ biala.

²Koasea anye ɛnlie ndelebɛbo nu, ye ɛdeɛ mɔɔ wɔ ye adwenle nu la ala yɛɛ ɔkulo kɛ ɔka a.

³Saa amumuyɛ ye ɔ ti a, mɛladonlɛ a li ɔ nzi a, yɛɛ saa enililɛ wie a, anyiemgba a doa ye a.

⁴Sonla anloa edwɛkɛ le azule buma, yɛɛ nrɛlɛbɛ dɔɔnwo le kɛ azule mɔɔ ɛdukue la.

⁵Ɔnle kpalɛ kɛ bɛkɛhyea bɛ nzo bɛkɛli sonla mɔɔ le amumuyɛ la edwɛkɛ anzɛɛ bɛkɛbua sonla mɔɔ le tenlene la mgbɔvodɛne.

⁶Koasea anloa twehwe mgbonde, yɛɛ ɔ nloa edwɛkɛ twehwe ɛbolɛ.

⁷Koasea anwubɛnyunlu vi ɔ nloa; ɔ nloa edwɛkɛ le ɛhane maa ɔdaye mumua ne.

⁸Sonla mɔɔ tu azukue la anloa edwɛkɛ yɛ fɛ kɛ aleɛ fɛlɛko; ɔdwu bɛ kunlu ɛleka biala.

⁹Sonla mɔɔ le mgbaha wɔ gyimayɛlɛ nu la adiema nrenya a le sonla mɔɔ sɛkye ninyɛne la.

¹⁰Ɛdɛnkɛma duma ne le aranemgbole; sonla mɔɔ le tenlene la nriandi kɔfea nu a, ɔ nwo kɔlɔnwo.

¹¹Sukoavolɛ anwonyia le ye suakpole ɛsesebɛ; ɔle kɛ bane tendenle ɔbɔ ɔ nwo bane.

¹²Sonla mɔɔ memaa ɔ nwo zo la sɛkye ɔ nwo, na mɔɔ bɛlɛ ɔ nwo aze la, bɛdi ye eni.

¹³Andeamua le koasea; ɔ nyunlu gua aze.

¹⁴Saa sonla nwo to ye a ye kpɔkɛdelɛ a le ɔdaye ye adwenle, na saa ɔngola ɔ nwo sɔ a, nwane a sɔ ye a?

¹⁵Sonla mɔɔ lɛ adwenle la nyia adwenlenubukelɛ, yɛɛ nrɛlɛbɛvolɛ buke ɔ nzo tie adwenlenubukelɛ edwɛkɛ.

¹⁶Sonla ahyɛlɛdeɛ buke adenle maa ye na ɔfa ye ɔfinde menli mgbole nyunlu.

¹⁷Sonla mɔɔ dumua ka ye tendile la, ɛnea a ɛnee ɔdi benle, kyesɛ ko ne ɔdaye ɔka ye tendile na ɔbizebiza ye kpuyia.

¹⁸Adunyi pɛ butule biala azo na ɔkpɔda menli mɔɔ ko tia bɛ nwo la.

¹⁹Saa ɛboa adiema nrenya a ɔle kɛ suakpole mɔɔ bɛbɔ nwolɛ bane la, na saa ɛ nee ye di butule a ɔle kɛ wɔdo ɛ nwo efiade la.

²⁰Sonla anloa edwɛkɛ a maa ɔ kunlu dwo ɔ nwo a; ye ɛdendɛlɛ a maa ye anzonudwolɛ a.

²¹Ɛtafinlimalɛ tumi nu yɛɛ ewule nee ngoane wɔ a; bɛdabɛ mɔɔ bɛkulo la di ye nzoleɛ.

²²Nrenya mɔɔ kɛgya raalɛ la ɛkpondɛ debie kpalɛ; ɔmaa ɔsɔ Ɛdɛnkɛma anye.

²³Ehyianvolɛ tendɛ a ɔkpa kyɛlɛ, na sukoavolɛ bua nwolɛ a ɔka ye mgbane mgbane.

²⁴Agɔnwolɛma bie mɔ wɔ ɛkɛ a, bɛyɛ bɛ nwo kɛ bɛle agɔnwolɛma, na agɔnwolɛ ne bie tɛla bɛ nli akunlu.