Read Nzema Mrɛ 20 Bible Online

Mrɛ 20 - Nzema bible

Mrɛ 20

¹Nwanye ɛnlonlɛ maa bɛsi sonla amgbu; nza ɛsesebɛ ɛnlonlɛ maa sonla gyibi; sonla mɔɔ kɛmaa nza kɛgya ye la ɛnze nrɛlɛbɛ.

²Belemgbunli fa ɛya a ɔle kɛ awenade mɔɔ ɛlɛkulu la; sonla mɔɔ kɛmaa belemgbunli kɛva ɛya la minli ye ngoane.

³Koasea biala di butule; sonla mɔɔ di ɔ nwo eni la twe ɔ nwo fi butule nwo.

⁴Ɛyazonlɛ mekɛ dwu a mgbovonle ɛnzo bie; ɛbuhenle ne dwu a ɔkpondɛ bie, na ɔnnyia bie.

⁵Sonla adwenle mɔɔ wɔ ɔ ti anu la le kɛ azule buma, mɔɔ lɛ ndelebɛbo la baza bie.

⁶Awie biala die ɔ nwo di, noko sonla mɔɔ di nɔhalɛ la bɛnnyia ye.

⁷Nyilalɛ ɛha mralɛ mrenya mɔɔ bɛ ze le tenlenenli na ɔfa adwenle ɔbɔ ye ɛbɛla la.

⁸Belemgbunli mɔɔ de ye ndɛnebualɛ ebia nu la fa ɔ nye kpɔla menli nu nwu mɔɔ ɛnle kpalɛ wɔ bɛ avinli la.

⁹Nwane a kɛhola kɛha kɛ, “Me ahonle nu te, ɛtane fee ɛnle me nwo” a?

¹⁰Adalɛ tone awolɛ ngakyile nee adalɛ ɛzuzudeɛ ngakyile kɔsɔɔti le Ɛdɛnkɛma kyibadeɛ.

¹¹Kakula bɔbɔ fa ye nyɛleɛ kile ye subane, saa ɔle kpalɛ o, ɔle ɛtane o.

¹²Ɛnzonlɛ mɔɔ te edwɛkɛ nee ɛnyelɛ mɔɔ nwu debie, Ɛdɛnkɛma a ɛbɔ bɛ mu nwiɔ a.

¹³Mmakulo nafelɛ somasoma, anrɛɛ ehyia kɛhu wɔ; fede ɛ nye yɛ gyima na ɛbanyia aleɛ dɔɔnwo.

¹⁴Sonla mɔɔ tɔ debie la edwɛkɛ a le, “Ɔnle kpalɛ, ye bolɛ yɛ se”, na ɔdwu sua nu a yeadu ɔ nloa anu wɔ nwolɛ.

¹⁵Ezukoa nvutuke wɔ ɛkɛ, yɛɛ ezukoa awolɛ mɔɔ sonle bolɛ la dɔɔnwo wɔ ɛkɛ, na ɛnloanlɛ mɔɔ tendɛ a nrɛlɛbɛ wɔ nuhua la le kpɔba mɔɔ sonle bolɛ.

¹⁶Saa sonla di ɛyɛvolɛ agyinlanu a, die ye adɛladeɛ ne mɔ sie nu, yɛɛ saa ɔdi menli mɔɔ ɛnvi maanle ne anu la agyinlanu a, fa ɔdaye mumua ne sie nu awoba.

¹⁷Saa sonla fa mɛlɛbɛla di awie aleɛ a ɔbayɛ ye fɛ bɔbɔ ɛdeɛ, na nzinlii ɔbayɛ ɔ nloa anu awozaka tɛkɛɛ.

¹⁸Folɛdulɛ zo yɛɛ bɛdua bɛfa adwenle a; dua nrɛlɛbɛ folɛdulɛ zo na wɔaha konle.

¹⁹Sonla mɔɔ tendɛ somasoma la ɛngola ɛnvea edwɛkɛ zo; yemɔti ɛ nee sonla mɔɔ tendɛ somasoma la mmatu.

²⁰Saa sonla wa ɔ ze anzɛɛ ɔ nli amonle a, ye kɛnlaneɛ banlu yeamaa awozinli kabii ava ye.

²¹Anyiabɛnwo ndɛndɛ awieleɛ ɛnwie nyilalɛ.

²²Mmaka kɛ, “Mebali nzenralɛ;” kendɛ Ɛdɛnkɛma na ɔbaboa wɔ.

²³Ɛzuzudeɛ ngakyile le Ɛdɛnkɛma kyibadeɛ, yɛɛ adalɛ tone ɛnle kpalɛ.

²⁴Ɛdɛnkɛma a maa sonla tudu ɔ gyakɛ a; kɛ ɔkɛyɛ na sonla ade ɔdaye mumua ne ye ɛbɛlabɔlɛ bo ɛ?

²⁵Ɔle munzule kɛ sonla kɛha ye ndɛndɛ kɛ, “Nwolɛ te,” na saa ɔbɔ ye ɛwɔkɛ ne ɔwie a akee nzinlii yeadɛnla yeadwenle nwolɛ.

²⁶Belemgbunli mɔɔ ze nrɛlɛbɛ la kola nwu sonla mɔɔ le amumuyɛ la, na ɔtea ye mɔɔ anwunvɔnezelɛ ɛnle nu a.

²⁷Sonla sunsum mɔɔ wɔ ye nuhua la le Ɛdɛnkɛma kɛnlaneɛ mɔɔ ɔfa ɔneɛnlea ye nuhua ɔnwu ye ɛleka biala a.

²⁸Belemgbunli mɔɔ di nɔhalɛ nee pɛlepɛle la di ebia kyɛ, na ye tenleneyɛlɛ maa ye belemgbunlililɛ di munli.

²⁹Mgbavolɛ anyunlunyia a le bɛ anwosesebɛ, yɛɛ mrenya mgbanyinli anwofɛlɛko a le bɛ egyɛne.

³⁰Ahɛlɛ mɔɔ kpakye la nrinzi ɛtane, yɛɛ empele ɛlielɛ nrinzi sonla munli nu ɛtane biala.